གསེར་རྟ་ནང་བསྟན་སློབ་གླིང་རྒྱ་ཆུང་དུ་གཏོང་དགོས་པའི་བཀའ་རྒྱ།

༄༅།།བོད་ཀྱི་དཀར་མཛེས་ཁུལ་གྱི་གསེར་རྟ་རྗོང་གི་ཁྱབ་ཁུངས་སུ་ཡོད་པའི་གསེར་རྟ་ནང་བསྟན་སློབ་གླིང་གི་གྲ་ཁང་༡༥༠༠་འདི་ལོའི་ཕྱི་ཟླ་བཅུ་པའི་ཚེས་༣༠་ནང་ཚུད་དུ་བཤིག་རྒྱུ་ཡིན་པ་དང་མི་གྲངས་་༥༠༠༠་ལ་ཚོད་འཛིན་ལག་བསྟར་བྱེད་རྒྱུ་ཡིན་པའི་གནས་ཚུལ་ཤེས་རྟོགས་བྱུང་འདུག  འདི་ག་རླུང་འཕྲིན་ཁང་ནས་ཡིག་ངག་གཉིས་ཀྱི་བརྒྱུད་ནས་གནས་ཚུལ་ཤེས་རྟོགས་བྱུང་དོན་ལྟར་ན།  རྒྱ་ནག་གི་སྐབས་༦་པའི་བོད་ཁུལ་ལས་སྒྲུབ་གྲོས་མོལ་ཚོགས་འདུ་དང་རྒྱལ་ཡོངས་ཆོས་ལུགས་ལས་དོན་ཚོགས་འདུ་གཉིས་ཀྱི་ཐོག་ནས་གཏན་འདེབས་བྱུང་བ་ལྟར། བླ་རུང་ཆོས་སྒར་གྱི་མི་གྲངས་ཚོད་འཛིན་དེ་ཕྱི་ལོ་༢༠༡༧་ཟླ་བ་དགུ་པའི་ཚེས་༣༠་ནང་ཚུད་ལ་༥༠༠༠་ལ་གཏན་འབེབས་དགོས་པ་དང་།  འདི་ལོ་ཁོ་ནའི་ནང་གྲ་བཙུན་༡༢༠༠་ཕྱིར་འབུད་གཏོང་རྒྱུ་དང་ གྲ་ཁང་༡༥༠༠་ཙམ་འདི་ལོའི་ཕྱི་ཟླ་བཅུ་པའི་ཚེས་་༣༠་ནང་དུ་གཏོར་བཤིག་འགྲུབ་དགོས་པའི་སྐོར་བཀའ་བཏང་ཡོད་པ་རེད་འདུག  རྒྱ་ནག་གི་འཆར་གཞི་འདི་དཀར་མཛེས་འཐབ་ཕྱོགས་གཅིག་གྱུར་ཁང་དང་ཁུལ་མི་རིགས་ཆོས་ལུགས་ལས་དོན་ཁང་། ཁུལ་སློབ་གསོ་ཁང་། ཁུལ་ཉེན་རྟོག་ལས་ཁུངས་ཁུལ།  གྲོང་སྡེ་འཛུགས་བསྐྲུན་ལས་ཁུངས།  གསེར་རྟ་རྗོང་སྲིད་གཞུང་དང་བླ་རུང་སྒར་གྱི་འབྲེལ་ཡོད་མི་སྣ་བཅས་ཀྱི་མཉམ་འབྲེལ་འགན་ལེན་བྱས་ནས་མི་གྲངས་གྱི་ཚོད་འཛིན་དུས་བཀག་ཕྱི་ལོ་་༢༠༡༧་ཕྱི་ཟླ་དགུ་པའི་ཚེས་་༣༠་ནང་དུ་ཚར་བ་དགོས་ཀྱི་ཡོད་པའི་བཀའ་བཏང་ཡོད་པ་རེད་འདུག འདི་ལོའི་ཕྱི་འབུད་བྱེད་རྒྱུའི་མི་གྲངས་༡༢༠༠་ནང་དུ་རྒྱ་ནག་གི་ཞིང་ཆེན་གཞན་ནས་ཡོང་བའི་མི་གྲངས་༦༠༠་ཡོད་པ་དང་། གྲ་ཁང་༡༥༠༠་གཏོར་བཤིག་བྱེད་རྒྱུ་དེ་དག་ཕྱིར་འབུད་བྱས་ཟིན་པའི་གྲ་བཙུན་གྱི་ཁང་པ་དང་། སྒྲིག་འགལ་གྱིས་གསར་རྒྱག་བྱས་པ་སོགས་ཡིན་པ་རྒྱ་ནག་གི་ཡིག་ཆ་དེའི་བཀོད་ཡོད་པ་རེད་འདུག  ཕྱི་ལོ་༢༠༡༦་གཅིག་པུའི་ནང་མི་གྲངས་་༢༢༠༠་ཕྱིར་འབུད་བྱེད་དགོས་པ་དང་དེའི་གྲས་སུ་དགེ་བསྙེན་མི་གྲངས་་༡༠༢༩་ཐེ་ཡོད་པའི་སྐོར་དང་།  གལ་ཏེ་རྒྱ་ནག་གི་འཆར་གཞི་ལྟར་མི་གྲངས་ཀྱི་ཚོད་འཛིན་༥༠༠༠་དུ་ལག་བསྟར་བྱས་མི་ཐུབ་པ་བྱུང་ཚེ་ཕྱི་ལོ་་༢༠༡༧་ལོའི་ཕྱིར་འབུད་གྱི་གྲངས་ཚད་དེ་ཇེ་མང་དུ་གཏོང་རྒྱུ་ཡིན་པའི་ཉེན་བརྡ་ཀྱང་བཏང་ཡོད་པ་རེད་འདུག།  
གསར་འགོད་པ་ཀརྨ་རྡོ་རྗེ།