རྒྱ་ནག་མཐོ་སློབ་ཡིག་རྒྱུགས་གཏོང་མཁན་ལ་སྲུང་སྐྱོབ་གནང་རྒྱུ།

༄༅༎ཉེ་ཆར་རྒྱ་ནག་ནང་སློབ་ཕྲུག་གི་ཐོག་ལ་དྲག་པོའི་རྒོལ་རྡུང་བཏང་བའི་དོན་རྐྱེན་རིམ་པ་ཐོན་པར་བརྟེན་ནས་རྒྱ་ནག་གཞུང་གིས་རྒྱ་ནག་ནང་དུ་མཐོ་རིམ་སློབ་གྲ་འཛུལ་ཞུགས་ཀྱི་ཡིག་རྒྱུགས་གཏོང་བར་བསྐྱོད་མཁན་སློབ་ཕྲུག་གི་སྲུང་སྐྱོབ་ཆེད་དུ་ཉེན་སྲུང་གི་ལས་དོན་དམ་བསྒྲགས་བྱ་རྒྱུ་ཡིན་པ་རེད།

དེ་ཡང་རེས་གཟའ་ཉི་མའི་ཉིན་རྒྱ་ནག་གི་ཤེས་ཡོན་ལྷན་ཁང་གི་ཁྱབ་ཁོངས་ཡིག་རྒྱུགས་ལས་ཁུངས་ཀྱི་འགན་འཛིན་གཞོན་པ་ལིའུ་ཅན་དབྱི་ ཡིས་བཤད་དོན། རྒྱ་ནག་རྒྱལ་ཡོངས་སུ་མཐོ་རིམ་སློབ་གྲ་འཛུལ་ཞུགས་ཀྱི་ཡིག་རྒྱུགས་ཆེན་མོ་རེས་གཟའ་ཟླ་བ་ནས་འགོ་བཙུགས་ཀྱི་ཡོད་པ་དང༌། མཐོ་རིམ་སློབ་གཉེར་ཁང་གི་འཛུལ་ཞུགས་ཡིག་རྒྱུགས་དེ་ནི་སློབ་ཕྲུག་ཚོའི་མ་འོངས་པའི་མི་ཚེའི་མདུན་ལམ་འཚོལ་ཐབས་ཀྱི་གལ་འགངས་ཆེན་པོ་ཡིན་པར་བརྟེན་ཡིག་རྒྱུགས་ལ་ཕྱིའི་འགོག་རྐྱེན་མི་ཡོང་བའི་ཆེད་དུ་འབྲེལ་ཡོད་ཚན་པ་ཁག་དང་ས་གནས་གཞུང་སོ་སོའི་ཐོག་ནས་ཡིག་རྒྱུགས་ཆེན་མོའི་དུས་ཡུན་རིང་ལ་ཛ་དྲག་གི་ཉེན་སྐྱོན་འདྲ་བྱུང་བ་ཡིན་ཚེ་དེར་ཁ་གཏད་གདོང་ལེན་བྱེད་ཆོག་གི་གྲ་སྒྲིག་ཨང་སར་ཡོད་ལུགས་གསུངས་འདུག