རྒྱ་ནག་དང་རྒྱ་གར་གཉིས་ནི་མཛའ་གྲོགས་རྒྱལ་ཁབ་ཡིན་སྐོར།

༄༅༎དེ་རིང་རེས་གཟའ་མིག་དམར་ཉིན་རྒྱ་ནག་གཞུང་གིས་རྒྱ་གར་དང་རྒྱ་ནག་གཉིས་ནི་ཕན་ཚུན་དགྲ་བོ་མིན་པ་མཛའ་གྲོགས་ཀྱི་རྒྱལ་ཁབ་ཅིག་ཡིན་པ་བཤད་དེ། ཡུལ་གྲུ་གཉིས་བར་ལ་ཚོང་འབྲེལ་གྱི་མ་རྩ་འཛུགས་རྒྱུ་སོགས་ཚོང་ལས་ཀྱི་འབྲེལ་ལམ་ནུས་ཤུགས་ཆེ་རུ་གཏོང་དགོས་པའི་འབོད་སྐུལ་ཞུས་ཡོད་པ་རེད།

རྒྱ་ནག་གི་ཚོང་ལས་བློན་ཆེན་ཁྲེན་ཏེ་མིང་གིས་རྒྱ་གར་གྱི་ཚོང་དོན་བློན་ཆེན་ཨ་ནན་ཤར་མ་མཆོག་དང་མཇལ་འཛོམས་གྲོས་མོལ་གྲུབ་པའི་རྗེས། གསར་འགོད་ལྷན་ཚོགས་ཤིག་གི་ཐོག་ལ། ང་ཚོ་རྒྱལ་ཁབ་གཉིས་ཀྱི་གཞི་ཁྱོན་ཆེ་ལོས་ལ་ལྟོས་པའི་རྒྱལ་ཁབ་གཉིས་ཀྱི་ཚོང་ལས་ཀྱི་འབྲེལ་ལམ་དེ་ཙམ་གྱི་གཞི་རྒྱ་ཆེན་པོ་མེད་པ་དང། དེར་བརྟེན་རྒྱལ་ཁབ་གཉིས་ཕན་ཚུན་བར་ལ་དཔལ་འབྱོར་གྱི་མ་རྩ་འཛུགས་རྒྱུའི་ལས་གཞི་གཞི་རྒྱ་ཆེ་རུ་གཏོང་རྒྱུ་ནི་ཧ་ཅང་གལ་འགངས་ཆེན་པོ་ཡིན་པ་བཤད་ཡོད་པ་རེད། རྒྱ་གར་དང་རྒྱ་ནག་བར་ལ་ཕྱི་ལོ་༢༠༠༩ལོར་ཨ་རིའི་ཌོ་ལར་ཐེར་འབུམ་༤༣དང་གྲངས་ཆུང་༣གྱི་ཚོང་འབྲེལ་བྱུང་ཡོད་པ་དེ་ནི། ཕྱི་ལོ་༢༠༠༨ལོར་ཚོང་འབྲེལ་ཨ་རིའི་ཌོ་ལར་ཐེར་འབུམ་༥༢ཙམ་བྱུང་ཡོད་པ་དང་བསྡུར་ན། ༢༠༠༩ལོར་ཨ་རིའི་ཌོ་ལར་ཐེར་འབུམ་༡༠ཙམ་ཚོང་འབྲེལ་མར་ཆགས་ཏེ་ཚོང་ལས་གཞི་ཡུལ་ཆེན་པོ་བྱུང་མེད་པ་རེད། དེར་བརྟེན་རྒྱ་ནག་གི་ཚོང་དོན་བློན་ཆེན་ཁྲེན་གྱིས་རྒྱ་གར་དང་རྒྱ་ནག་གི་ཚོང་དོན་ལྷན་ཚོགས་ཤིག་ཐོག་ལ། རྒྱ་ནག་དང་རྒྱ་གར་ཡུལ་གྲུ་གཉིས་པོ་ནི་ཚོང་ལས་ཀྱི་འབྲེལ་ལམ་ཡོད་པ་ཞིག་དང། མཛའ་གྲོགས་ཀྱི་ཁྱིམ་མཚེས་ཤིག་ཡིན་པ་ལས། ང་ཚོ་ཕན་ཚུན་དགྲ་དང་ཁ་གཏད་གང་ཡང་མེད་ཅེས་དང། ང་ཚོ་ཨེ་ཤི་ཡའི་ཁྱིམ་མཚེས་རྒྱལ་ཁབ་གཉིས་བར་དུ་གནས་པའི་གནས་ཚུལ་གོ་ནོར་ཐེབས་བཞིན་པ་དང། ཕྱོགས་རེས་ཀྱི་བསམ་བློ་དོར་ཏེ། རྒྱལ་ཁབ་གཉིས་བར་ལ་ཚོང་ལས་གཅིག་གྱུར་ཡོང་ཐབས་ཀྱི་ཁ་ཕྱོགས་སུ་མདུན་བསྐྱོད་བྱ་རྒྱུའི་ལས་དོན་ཐོག་ནུས་པ་འདོན་སྤེལ་བྱ་དགོས་པའི་སྐོར་བཤད་ཡོད་པ་རེད།