རྒྱ་ནག་ནང་དབྱེ་འབྱེད་འགོག་སྲུང་ལས་འགུལ་བ་འཇུ་བཟུང་།

རྒྱ་ནག་ནང་མཆིན་ནད་སོཊ་དབྱེ་འབྱེད་འགོག་སྲུང་བྱེད་མཁན་གྱི་གཞུང་འབྲེལ་མིན་པའི་ཚོགས་པའི་ཚོགས་མི་གཉིས་འཇུ་བཟུང་བྱས་བ།
དེ་ཡང་རྒྱ་ནག་གི་ཉེན་རྟོག་པས་པེ་ཅིན་ནང་རྟེན་གཞི་བྱས་པའི་Yirenpingཟེར་བ་སྤྱི་ཚོགས་ནང་དབྱེ་འབྱེད་འགོག་སྲུང་བྱེད་མཁན་གྱི་གཞུང་འབྲེལ་མིན་པའི་ཚོགས་པའི་ཚོགས་མི་གཉིས་ཁ་སྔོན་རེས་གཟའ་པ་སངས་ཉིན་འཛིན་བཟུང་བྱས་ཡོད་པ་དང་། གཞུང་འབྲེལ་མིན་པའི་ཚོགས་པ་དེས་རྒྱ་ནག་ནང་མཆིན་པའི་གཉན་ཚད་Hepatitis Bདང་། ཨེ་ཙི་འགོས་ནད་HIVའམ་AIDSནད་གཞིའི་དབར་དབྱེ་འབྱེད་འགོག་སྲུང་གི་ཁྲིམས་མཐུན་ཟབ་སྦྱོང་དང་། སློབ་གསོའི་ལས་འགུལ་སྤེལ་བཞིན་ཡོད་པ་རེད། ལས་འགུལ་དེའི་ཁྲོད་ནས་བདུན་ཕྲག་སྔོན་མའི་རེས་གཟའ་པ་སངས་ཉིན་ཀོང་ཏོང་ཞིང་ཆེན་ས་གནས་ཉེན་རྟོག་པས་ལས་འགུལ་བ་སྐུ་ཞབས་Guo Binདང་། Yang Zhangqingགཉིས་ཀྱིས་ཁྲིམས་འགལ་གྱི་ཐོག་ནས་ཚོང་འགྲེམས་བྱེད་ཀྱི་ཡོད་པའི་ཉེས་འཛུགས་ཀྱིས་འཛིན་བཟུང་བཀག་ཉར་བྱས་ཡོད་ལུགས་Yirenpingགཞུང་འབྲེལ་མིན་པའི་ཚོགས་པས་སྤྱི་ཚོགས་གསར་འགྱུར་བརྒྱུད་ལམ་ནང་གནས་ཚུལ་གསལ་སྟོན་གནང་འདུག གནས་ཚུལ་ནང་བཀོད་པར་གཞིགས་ན། ཉེ་བའི་ཆར་རྒྱ་ནག་གཞུང་གིས་གཞུང་འབྲེལ་མིན་པའི་ཚོགས་པ་ཁག་དང་། ལས་འགུལ་བ་ཁག དེ་བཞིན་གསར་འགོད་པ་དང་། ཁྲིམས་རྩོད་པ་སོགས་ཀྱི་ཐོག་ཧ་ཅང་གི་དམ་བསྒྲགས་བྱེད་ཤུགས་ཆེ་རུ་བཏང་ནས་མི་སྣ་དེ་རིགས་བརྒྱ་ཕྲག་མང་པོ་བཀག་ཉར་དང་། མང་དག་ཞིག་འཛིན་བཟུང་བྱེད་བཞིན་ཡོད་པ་རེད་ཅེས་གསལ་སྟོན་གནང་འདུག

གསར་འགོད་པ་དབྱངས་སྒྲོལ།