ཕེ་རན་སིའི་སྲིད་འཛིན་ཟུར་པའི་ལྕམ་སྐུ་གཤེགས་པར་མྱ་ངན།

༄༅༎ཕེ་རན་སིའི་སྲིད་འཛིན་ཟུར་པ་ཕེརན་ཁོའེ་མི་ཏེ་རོན་གྱི་ལྕམ་ཌེ་ནིཡེལ་མི་ཏེ་རོན་ཁ་སང་ཕྱི་ཟླ་ ༡༡་ཚེས་ ༢༡ གཟའ་མིག་དམར་ཉིན་སྐུ་ཚེའི་འཕེན་པ་རྫོགས་པར་བོད་མིའི་སྒྲིག་འཛུགས་ཀྱི་བཀའ་ཤག་ནས་མྱ་ངན་གུས་བཀུར་གྱི་འཚམས་འཕྲིན་ཞིག་གནང་ཡོད་པ་རེད། ཁོང་དགུང་གྲངས་ ༨༧ ལ་ཕེབས་ཡོད་པ་དང་ བཀའ་ཤག་གི་འཚམས་འཕྲིན་དེའི་ནང་ལྕམ་སྐུ་འདས་པོ་ཁོང་ནི་ ༧གོང་ས་༧སྐྱབས་མགོན་ཆེན་པོ་མཆོག་ལ་གུས་བཀུར་ཧ་ཅང་གི་ཆེན་པོ་ཞུ་མཁན་ཞིག་ཡིན་པར་མ་ཟད། བོད་མི་ཚོའི་ཧ་ཅང་གི་སེམས་ཐག་ཉེ་བའི་མཛའ་གྲོགས་ཤིག་དང་ བོད་དོན་རྒྱབ་སྐྱོར་གནང་མཁན་ཞིག་ཀྱང་ཡིན་ཞིང༌། ཁོང་སྐུ་ཚེ་མ་ཟིན་པ་གྱུར་བ་དེ་ནི་བོད་མི་ཚོའི་བློ་ཐུབ་ཀྱི་གྲོགས་པ་ཞིག་མེད་པར་གྱུར་བ་རེད་ཅེས་དང་ བོད་མིའི་སྒྲིག་འཛུགས་ཀྱི་བཀའ་ཤག་གིས་དམ་པ་དེའི་རྗེས་ཤུལ་ནང་མི་སྤུན་མཆེད་ཚོར་གདུང་སེམས་མཉམ་སྐྱེའི་ཐུགས་གསོ་ཞུ་རྒྱུ་མ་ཟད། དམ་པ་ཁོང་ལ་གསོལ་འདེབས་སྨོན་ལམ་ཞུ་རྒྱུ་ཡིན་ཅེས་འཁོད་ཡོད་པ་རེད།