༸གོང་ས་མཆོག་ནས་ནིའུ་ཡོག་གྲོང་དུ་ཆོས་འབྲེལ་བསྩལ་བ།

༄༅༎རེས་གཟའ་ཕུར་བུའི་ཉིན་བོད་མིའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཨ་རིའི་གྲོང་ཁྱེར་ནིའུ་ཡོག་ཏུ་མི་དམངས་ཆོས་འབྲེལ་གནང་བའི་སྐབས་སོ་སོ་རང་ཉིད་ཀྱི་ཕ་མེས་ནས་བྱུང་བའི་ཐོུང་མ་ཡིན་པའི་ཆོས་དང་རིག་གཞུང་གཅེས་འཛིན་བྱ་རྒྱུ་གལ་འགངས་ཆེན་པོ་ཡིན་པ་དང་ཡིན་ནའང་སོ་སོ་རང་ཉིད་ཀྱི་ཆོས་དང་རིག་གཞུང་གཅེས་འཛིན་ཁོ་ན་བྱས་ཏེ་འཛམ་གླིང་གི་ཕྱི་ཕྱོགས་ཀྱི་དེང་རབས་ཅན་གྱི་ཤེས་ཡོན་མ་སྦྱང་པར་སྒོ་རྒྱབ་ཏེ་བསྡད་ན་དེ་ནི་ནོར་འཁྲུལ་རེད་ཅེས་བཀའ་གནང་ཡོད་པ་རེད།

ཨ་རིའི་གྲོང་ཁྱེར་ནིའུ་ཡོག་གི་རེ་ཌི་ཡོ་སི་ཊི་མིའུ་ཛིག་ཧོལ་ཞེས་པའི་གླུ་གཞས་དུས་སྟོན་ཚོགས་ཡུལ་གྱི་ཚོགས་ཁང་དུ་ཆོས་ཞུ་བ་མི་དམངས་སྟོང་ཕྲག་ལྷག་འདུ་འཛོམས་གནང་བའི་ཐོག་བདག་ཅག་གི་སྟོན་པ་བཅོམ་ལྡན་འདས་ཀྱི་མཛད་པའི་བདེན་པ་བཞིའི་སྐོར་བཀའ་ཆོས་གནང་བ་དང་ཆབས་ཅིག་མི་དམངས་ཚོར་རང་སོ་སོའི་ཐོུང་མ་ཡིན་པའི་ཆོས་ལུགས་ཀྱི་རིན་ཐང་དང་དེང་དུས་ཀྱི་ཤེས་ཡོན་གཉིས་ཀ་ལྡན་པའི་དུས་རབས་༢༡ པའི་ནང་པ་ཞིག་བྱ་དགོས་པའི་སྐོར་དང་། ཤ་རུས་ལས་གྲུབ་པའི་མིའི་ལུས་པོ་དེ་ཐེངས་གཅིག་ལེན་ཚར་བའི་རྗེས་ལ་ཉམས་རྒུད་དུ་འགྲོ་བའི་སྐབས་དེ་ལས་ཐར་ཐབས་ཀྱི་འགྲོ་ལམ་མེད་ཅིང་ཡིན་ནའང་བློ་རིག་གསལ་བ་དང་ཤེས་རྒྱ་ཡངས་པ་ཞིག་ཡོང་རྒྱུར་སེམས་ལ་སྦྱོང་བརྡར་སྤྲོད་རྒྱུའི་ལམ་ཀ་ཡོད་པའི་སྐོར་བཀའ་གནང་ཡོད་པ་རེད། ཨ་རིའི་གྲོང་ཁྱེར་ནིའུ་ཡོག་གི་ཧི་མ་ལ་ཡའི་ནང་པའི་ཚོགས་པ་ཞེས་པའི་ནང་ ཆུམ་ དང་ དོལ་པོ། རྒྱལ་གསུམ་རྡོ། མ་ནང། ནུ་པིརི་། གློ་པ། ཏ་མང༌། ཐ་ཀ་ལི། ལྦ་ལུང༌། ཡོལ་མོ་བཅས་ཀྱི་མི་རིགས་ལས་གྲུབ་པ་ཞིག་ཡིན་ཞིང༌། མི་དམངས་དེ་དག་གི་ཆོས་དང་རིག་གཞུང་བོད་མི་དང་ཐག་ཉེ་བ་དང་འབྲེལ་བ་གཏིང་གཟབ་ཡོད་པར་བརྟེན་༸གོང་ས་༸སྐྱབས་མགོན་ཆེན་པོ་མཆོག་གིས་བལ་པོའི་མི་དམངས་དང་བོད་མི་གཉིས་གཅེན་གཅུང་ལྟ་བུའི་སྤུན་ཡིན་པ་གསུང་ཡོད་པ་རེད།