རྒྱ་ནག་གིས་འཛིན་བཟུང་བྱས་པའི་ཕྱི་མི་གཏེར་བཏོན་ལས་བྱེད།

༄༅༎དེ་རིང་ཨོ་སོ་ཀྲོ་ལི་ཡའི་སྲིད་བློན་ཀེ་ལྦིན་ར་ཌི་མཆོག་གིས་རྒྱ་ནག་ལ་ཨོ་སོ་ཀྲོ་ལི་ཡའི་གཏེར་བཏོན་ལས་བྱེད་པའི་ཐོག་གསང་མྱུལ་གྱི་ཉེས་འཛུགས་བྱས་ནས་རྒྱ་ནག་གིས་འཛིན་བཟུང་བྱས་པ་དེས་ཕྱོགས་གཉིས་དབར་དཔལ་འབྱོར་གྱི་འབྲེལ་བར་དོ་ཕོག་ཐེབས་རྒྱུའི་ཉེན་བརྡ་བཏང་གནང་བ་དང་འཛམ་གླིང་གི་ཡུལ་ཁག་ཚོས་རྒྱ་ནག་གིས་གནད་དོན་དེའི་ཐད་ཐག་གཅོད་བྱེད་སྟངས་ལ་ཉམས་སྣང་ཆེན་པོ་གནང་བཞིན་ཡོད་སྐོར་གསུངས་བཞག

ཉེ་ལམ་ཟླ་བ་འདིའི་ཚེས་ལྔ་ཉིན་རྒྱ་ནག་གིས་ཨོ་སོ་ཀྲོ་ལི་ཡའི་གཏེར་ཁ་བསྔོག་འདོན་ཁེ་གཉེར་ལས་ཁང་རི་ཡོ་ཊིན་ཊོའི་ལས་བྱེད་པ་འཛིན་བཟུང་བྱས་པ་ནས་བཟུང་རྒྱ་ནག་དང་ཨོ་སོ་ཀྲོ་ལི་ཡ་གཉིས་དབར་ལྷག་པར་དུ་ལྕགས་གཏེར་རྒྱུ་རྫས་ཚོང་སྒྱུར་གྱི་འབྲེལ་བར་དོ་ཕོག་འགྲོ་གཞིའི་ཉེན་ཁ་ཆགས་ཡོད་པ་རེད།

རྒྱ་ནག་གི་གྲོང་ཁྱེར་ཧྲང་ཧེ་ནང་རྟེན་གཞི་བྱས་པའི་རི་ཡོ་ཊིན་ཊོ་ཁེ་གཉེར་ལས་ཁང་གི་ཚོང་འབྲེལ་ལས་བྱེད་གཙོ་བོ་སི་ཀྲན་ཧུ་དང་ཕྱག་འབྲེལ་ལས་བྱེད་འགའ་ཤས་ཀྱིས་རྒྱ་ནག་གི་ངར་ལྕགས་གཏེར་ལས་ཁང་གི་གསང་བ་རྐུ་འཁྱེར་བྱས་པའི་ནག་ཉེས་བཙུགས་ནས་རྒྱ་ནག་གིས་འཛིན་བཟུང་བྱས་པ་དེ་ཨོ་སོ་ཀྲོ་ལི་ཡ་ནས་རྒྱ་ནག་གིས་ལྕགས་གཏེར་ནང་འདྲེན་གྱི་རིན་གོང་གཅོག་རྒྱུའི་ཐོག་བེད་སྤྱོད་གཏོང་སྲིད་པ་ཞིག་རེད། རྒྱ་སྐད་ཡག་པོ་མཁྱེན་མཁན་ཨོ་སོ་ཀྲོ་ལི་ཡའི་སྲིད་བློན་ཀེ་ལྦིན་ར་ཌི་མཆོག་གིས་གསར་འགོད་ལྷན་ཚོགས་ཤིག་གི་ཐོག་རྒྱ་ནག་དང་ཨོ་སོ་ཀྲོ་ལི་ཡ་གཉིས་དབར་གྱི་འབྲེལ་བ་དེ་ཨོ་སོ་ཀྲོ་ལི་ཡ་གཅིག་པུར་ཕན་ཐོགས་ཡོད་པ་ཞིག་མ་ཡིན་པར་རྒྱ་ནག་གིས་ཀྱང་ཨོ་སོ་ཀྲོ་ལི་ཡའི་ཐོག་ཚོང་འབྲེལ་གྱི་རྒྱབ་རྟེན་བྱེད་དགོས་ཆགས་ཀྱི་ཡོད་སྐོར་རྒྱ་ནག་གི་གྲོགས་པོ་ཚོར་དྲན་སྐུལ་གནང་ཡོད་པ་དང་རྒྱ་ནག་གིས་ཉེས་འཛུགས་འཛིན་བཟུང་བྱས་པའི་ཨོ་སོ་ཀྲོ་ལི་ཡའི་ཚོང་ལས་པ་སི་ཀྲན་ཧུ་རྒྱ་ནག་གི་དོ་དམ་འོག་ནས་གློད་བཀྲོལ་ཐུབ་ཐབས་ཀྱི་འབད་བརྩོན་གང་ཡོང་གནང་རྒྱུ་ཡིན་སྐོར་གསུངས་འདུག།