བོད་དོན་ལས་འགུལ་བ་འབུམ་རམས་པ་རྒྱལ་ལོ་ལགས་ཀྱིས་ཨའོསི་ཊརེ་ལི་ཡའི་གྲོས་ཚོགས་འཐུས་མི་ ༡༥ ཙམ་ལ་མཇལ་འཕྲད་ཀྱིས་བོད་དོན་ཞུ་གཏུག་གནང་འདུག

ཕྱི་ལོ་ ༢༠༢༤ ཟླ་བ་ ༧ ཚེས་ ༡ ནས་འགོ་འཛུགས་ཀྱིས། བོད་དོན་ལས་འགུལ་བསྟི་གནས་ཁང་གི་ཚོགས་མི་འབུམ་རམས་པ་རྒྱལ་ལོ་ལགས། བོད་མི་མང་སྤྱི་འཐུས་སྲིད་ཐར་བློ་བཟང་རྒྱ་མཚོ་ལགས་དང་རྡ་རྗེ་ཕུན་ཚོགས་ལགས་བཅས་ནས། ཨའོསི་ཊརེ་ལི་ཡ་གྲོས་ཚོགས་གོང་མའི་འཐུས་མི་ལྕམ་ Lidia Thrope ལགས། སྐུ་ཞབས་ Dean Smith ལགས། དེ་བཞིན་སྐུ་ཞབས་ James Patterson ལགས་སོགས་གཙོས་པའི་ཨའོསི་ཊརེ་ལི་ཡའི་གྲོས་ཚོགས་འཐུས་མི་བཅོ་ལྔ་ཙམ་ལ་མཇལ་འཕྲད་ཀྱིས། བོད་ནང་གི་གཏན་འཇགས་སློབ་གྲྭའི་གནས་སྟངས་སོགས་ཀྱི་སྐོར་ཞུ་གཏུག་གནང་ཡོད་པ། འབུམ་རམ་པ་རྒྱལ་ལོ་ལགས་ཀྱིས་ཨེ་ཤེ་ཡ་རང་དབང་རླུང་འཕྲིན་ཁང་ལ་འགྲེལ་བརྗོད་གནང་བྱུང་།

ཐེངས་འདིའི་ཨའོསི་ཊརེ་ལི་ཡའི་ནང་བོད་དོན་ཞུ་གཏུག་གི་ལས་འགུལ་དེ་ནི་ཨའོསི་ཊརེ་ལི་ཡའི་ནང་རྟེན་གཞི་བྱས་པའི་ཨོ་གླིང་བོད་དོན་ལས་འགུལ་ཁང་དང་བོད་དོན་ལས་འགུལ་བསྟི་གནས་ཁང་གཉིས་ཐུན་མོང་གིས་གོ་སྒྲིག་གནང་བ་ཞིག་ཡིན་འདུག་ལ། བོད་དོན་ལས་འགུལ་བསྟི་གནས་ཁང་གི་ལས་བྱེད་སྤྱི་འཐུས་སྲིད་ཐར་བློ་བཟང་རྒྱ་མཚོ་ལགས་དང་རྡོ་རྗེ་ཕུན་ཚོགས་ལགས་རྣམ་གཉིས་ནས། རྒྱ་ནག་གཞུང་གིས་དྲ་ཐོག་བརྒྱུད་རྒྱལ་མཚམས་བརྒལ་བའི་མནར་གཅོད་གཏོང་ཚུལ་སོགས་ཀྱི་སྐོར་གཏམ་བཤད་གནང་ཡོད་པ་འབུམ་རམས་པ་རྒྱལ་ལོ་ལགས་ཀྱིས་གསུངས་བྱུང་།

ཐེངས་འདིའི་བོད་དོན་ཞུ་གཏུག་གི་ལས་འགུལ་དེ་བཞིན་ཉིན་གྲངས་བཅུ་གཅིག་རིང་གནང་ཡོད་ཅིང་། ཁོང་རྣམས་ནས་ཨའོསི་ཊརེ་ལི་ཡའི་ཕྱི་སྲིད་བློན་ཆེན་ལྕམ་ Penny Wong ལགས་ཀྱི་སློབ་སྟོན་པ་ཚོར་མཇལ་འཕྲད་གནང་ཡོད་པ་དང་། ཨའོསི་ཊརེ་ལི་ཡའི་ཕྱི་སྲིད་དང་འགྲོ་བ་མིའི་ཐོབ་ཐང་ལས་ཁུངས་ཀྱི་མགྲིན་ཚབ་པ་སྐུ་ཞབས་ Bronte Moules ལགས་ཀྱང་མཇལ་འཕྲད་གནང་འདུག རིང་མིན་བོད་དོན་ལས་འགུལ་བ་འབུམ་རམས་པ་རྒྱལ་ལོ་ལགས་ཉི་ཧོང་དུ་བོད་དོན་ཞུ་གཏུག་ཆེད་ཕེབས་འཆར་ཡོད་པ་རེད་འདུག

གསར་འགོད་པ། བདེ་ཆེན་དབང་མོ།

རྩོམ་སྒྲིག་པ། ཡེ་ཤེས་ཟླ་བ།

དྲྭ་ཐོག་སྤེལ་མཁན། བདེ་སྐྱིད་ཀུན་སྒྲོལ།