ལི་བི་ཡའི་རྒྱལ་སའི་ནང་གི་འཐབ་འཁྲུག་གནས་སྟངས།

༄༅༎ག་རྡ་ཕིའི་བུ་སེཕ་ཨལ་ཨིསི་ལམ་ རིཀ་སོསེ་མགྲོན་ཁང་དུ་སྲུང་སྐྱོབ་དམ་པོའི་འོག་འགྲུལ་འཁོར་ནང་འབྱོར་བའི་བརྙན་པར་ཞིག་ཐོན་པའི་རྗེས་། ལི་བི་ཡའི་ནང་གི་གྱེན་ལོག་པ་ཚོས་ལི་བི་ཡའི་རྒྱལ་ས་ཀྲི་རི་པོ་ལི་ཐོག་དཔུང་འཇུག་བདག་བཟུང་བྱས་པའི་དགའ་ཚོར་གྱི་དྲིལ་བསྒྲགས་དེ་བདེན་པ་ཡིན་མིན་དོགས་གཞིའི་རང་བཞིན་དུ་གྱུར་ཡོད་པ་རེད།

རྒྱལ་ས་ཀྲི་རི་པོ་ལི་ནང་གྱེན་ལོག་པ་དང༌། ག་རྡ་ཕིའི་ཕྱོགས་གཏོགས་དཔུང་དམག་དབར་མེ་འཕེན་ཤུགས་ཆེ་བྱས་པ་དང༌། བྱང་མཚོ་ཨེཏ་ལེན་ཀྲིཀ་དམག་དོན་སྒྲིག་འཛུགས་ཀྱིས་ག་རྡ་ཕི་གབ་ཡིབ་བྱ་ཡུལ་གྱི་རྟེན་གཞི་ཡིན་པར་དོགས་པ་བྱེད་ས་ཁག་ལ་གནམ་ཐོག་ནས་གཏོར་རྒོལ་བཏང་བའི་རྗེས། ད་རང་སྔ་དྲོ་ཀྲི་པོ་ལི་ནང་ཕྱོགས་ག་ས་ག་ནས་དུ་བ་འཕྱུར་བཞིན་པ་མཐོང་རྒྱུ་ཡོད་པ་རེད། འོན་ཀྱང་ཀྲི་རི་པོ་ལི་ཐོག་དངོས་སུ་དབང་སྒྱུར་སུས་བྱེད་མིན་ད་ལྟ་གནས་ཚུལ་ཁ་གསལ་མེད་པ་རེད།

རུཡེ་ཊར་གསར་ལས་ཁང་གིས་སྒྲ་འཇུག་བྱས་པའི་བརྙན་པར་ཞིག་གི་ནང༌། རིཀ་སོ་སེ་མགྲོན་ཁང་མདུན་ག་རྡ་ཕིའི་བུ་སེཕ་ཨལ་ཨིསི་ལམ་ལ་རྒྱབ་སྐྱོར་བྱེད་མཁན་ཚོས་སྣེ་ལེན་བྱེད་བཞིན་ཡོད་པ་དང༌། འགྲུལ་འཁོར་ནང་ནས་ཐོན་ཏེ་སེཕ་ཡིས་རྒྱལ་སྤྱིའི་ནག་ཉེས་ཁྲིམས་ཁང་ལ་དམའ་འབེབས་བཏང་བ་དང༌། མང་ཚོགས་ལ་ལི་བི་ཡའི་ནང་ཚང་མ་བདེ་ཐང་ཡོད་པ་དང༌། གྱེན་ལོག་པ་ཚོ་ཕམ་ཉེས་བཏང་ནས་ཁོང་ཚོ་དཀའ་ལས་ཁག་པོ་བཟོས་ཡོད་ཁུལ་བརྗོད་སྟེ། གསར་འགོད་པ་ཚོ་ལྟ་སྐོར་ལ་འཁྲིད་ཀྱི་ཡོད་ཚུལ་བརྗོད་འདུག།