ཇོན་ཁེ་རེ་ཨ་རིའི་ཕྱི་སྲིད་དྲུང་ཆེ་གཏན་འཁེལ།

དེ་ཡང་འདས་པའི་ལོ་བཞིའི་རིང་སྲིད་འཛིན་Obamaམཆོག་གི་གཞུང་འབྲེལ་མ་ཡིན་པའི་སྐུ་ཚབ་གནང་ནས་འཛམ་གླིང་གི་ས་ཕྱོགས་གང་སར་ཨ་རིའི་ཕྱི་འབྲེལ་གྱི་རྙོག་གླེང་ཁག་སེལ་རོགས་གནང་མཁན་དང་། གྲོས་ཚོགས་གོང་མའི་འཐུས་མི་John Kerry ལ་ཁ་སང་གྲོས་ཚོགས་གོང་མའི་ནང་རྒྱབ་སྐྱོར་གྱི་འོས་ཤོག་༩༤ཐོབ་ནས་ཨ་རིའི་ཕྱི་སྲིད་དྲུང་ཆེའི་མཚན་གནས་ཐོག་གཏན་འཁེལ་བྱུང་བ་དང་།

སྤྱི་མཐུན་ཚོགས་པ་དང་། དམངས་གཙོ་ཚོགས་པ་གཉིས་ཀསJohn Kerry ལ་མོས་གུས་ཆེན་པོའི་སྒོ་ནས་ལྕམ་ཁི་ལིན་ཊན་གྱི་རྗེས་འཛིན་གནང་མཁན་འོས་འཚམས་ཤིག་ལ་ངོས་འཛིན་གནང་འདུག།  དགུང་གྲངས་༦༩ལ་ཕེབས་པའི་སྐུ་ཞབས་John Kerry ནི་ཨ་རིའི་ཕྱི་འབྲེལ་དཔོན་རིགས་ཤིག་གི་ཁྱིམ་ཚང་ནས་ཡིན་པ་མ་ཟད། Vietnam དམག་འཁྲུག་སྐབས་དམག་ཞབས་ཀྱང་གནང་མྱོང་ཡོད་པ་རེད། ཁོང་གིས་ལས་གནས་དེའི་ཐོག་ཕེབས་རྒྱུའི་རེ་བ་༢༠༠༩ནས་གནང་ཡོད་ནའང༌། དུས་དེ་ནས་བཟུང་ཁོང་གིས་ཨ་རིའི་གྲོས་ཚོགས་ཀྱི་ཕྱི་འབྲེལ་ཚོགས་ཆུང་གི་ཚོགས་གཙོའི་གོ་གནས་བཞེས་བ་དང་། སྲིད་འཛིན་ཨོ་བ་མས་ཁོང་ལ་ཨབ་གྷ་ནི་སི་ཐན་དང་། པ་ཀི་སི་ཐན་མཉམ་ཨ་རིའི་འབྲེལ་བ་ཇེ་ཞན་ཇེ་སྡུག་ཏུ་འགྲོ་བའི་སྐབས་སུ་འབྲེལ་ལམ་བཟང་དུ་གཏོང་ཐབས་ཀྱི་ལས་འགན་གནང་ཡོད་རེད།

John Kerry ཡིས་རྒྱལ་ཁབ་ཀྱི་ཕྱི་སྲིད་དྲུང་ཆེའི་མཚན་གནས་འགན་བཞེས་ཀྱི་དམ་བཅའ་ནམ་འཇོག་ད་དུང་གཏན་འཁེལ་བྱུང་མེད་ནའང༌། ཕྱི་སྲིད་ལྷན་ཁང་གིས་བདུན་རྗེས་མའི་རེས་གཟའ་ཟླ་བའི་ཉིན་ཁོང་ལ་དགའ་བསུའི་སྣེ་ལེན་གྱི་མཛད་སྒོ་ཞིག་གོ་སྒྲིག་གནང་རྒྱུ་ཡིན་འདུག ད་རེས་John Kerry ཨ་རིའི་ཕྱི་སྲིད་དྲུང་ཆེར་བསྐོ་བཞག་བྱུང་བའི་ཐད་རྒྱ་ནག་གི་གསར་ལམ་ཁག་ནང་དགའ་བསུའི་རྣམ་འགྱུར་དེ་ཙམ་ཐོན་མེད་པ་མཐོང་རྒྱུ་འདུག