གཅིག་ཤི་གཅིག་རྨས་བྱུང་འདུག

མདོ་སྨད་ཀླུ་ཆུ་ནས་ལྷ་སར་ཇོ་མཇལ་ལ་བསྐྱོད་མཁན་བུད་མེད་གཉིས་ལམ་བར་རྒྱ་ནག་གི་ཉེན་རྟོག་དམག་གི་བཀག་འགོག་ལས་ཡོལ་ཆེད་རི་སྒང་བརྒྱུད་སྐབས་གཡང་ལ་ལྷུང་ནས་གཅིག་ཤི་བ་དང་། གཅིག་ལ་རྨས་སྐྱོན་ཚབས་ཆེན་ཕོག་འདུག།
བོད་ནས་ཁུངས་ལྡན་གནས་ཚུལ་འབྱོར་བ་ལྟར་ན། མདོ་སྨད་ཀན་ལྷོ་ཁུལ་ཀླུ་ཆུ་རྫོང་ཁོངས་ནས་ཡིན་པའི་བུད་མེད་གཉིས། ཕ་ཡུལ་ནས་རྐང་ཐང་རྒྱུད་ལྷ་སར་ཇོ་བོ་རིན་པོ་ཆེ་མཇལ་བར་བསྐྱོད་ནས་ཉེ་བའི་ཟླ་དྲུག་པའི་ཟླ་དཀྱིལ་ཙམ་ལ་ཆབ་མདོ་བརྒལ་བའི་སྐབས། ལམ་བར་དུ་རྒྱ་ནག་གི་ཉེན་རྟོག་པ་དང་དམག་མི་མང་པོས་ལྷ་སར་བསྐྱོད་མཁན་བོད་མི་ཚོ་བཀག་བསྡོམས་དང་སྔོག་བཤེར་འདྲ་མིན་བྱེད་བཞིན་པ་མཐོང་འཕྲལ། བུད་མེད་ཁོ་གཉིས་ནང་མོས་ཐོག་རྒྱ་ནག་གི་ཉེན་རྟོག་དམག་གི་བཀག་བསྡོམས་ལས་ཡོལ་ཆེད་རི་སྒང་བརྒྱུད་སྐབས་གཡང་ལ་ལྷུང་ནས་གཅིག་གི་ཚེ་སྲོག་ཤོར་བ་དང་། གཅིག་ལ་རྨས་སྐྱོན་ཚབས་ཆེན་ཕོག་ནས་ད་ལྟ་ཕ་ཡུལ་དུ་སྨན་བཅོས་བྱེད་བཞིན་པ་རེད་འདུག།
གནས་ཚུལ་ངོ་སྤྲོད་པས་བོད་ནས་བཤད་པ་ལྟར་ན། གཡང་ལ་ལྷུང་ནས་ཚེ་སྲོག་ཤོར་མཁན་ནི་ཀན་ལྷོ་ཀླུ་ཆུ་ཕྱོགས་ཀྱི་ཐང་ལུང་མདོ་བ་ནས་ཡིན་པའི་རང་ལོ་ལྔ་བཅུ་བརྒལ་བའི་རྣམ་རྒྱལ་མཚོ་དང་། རྨས་སྐྱོན་ཕོག་ཡོད་པ་ཐང་ཁོར་ནས་ཡིན་པའི་ལོ་ན་ལྔ་བཅུ་བརྒལ་བའི་ཨ་མགོན་ཞེས་བ་ཡིན་པ་དང་། དེང་སང་བོད་ནང་དུ་རྒྱ་ནག་གི་འབྲེལ་ཡོད་ཚན་པས་དམ་དྲག་ཤུགས་ཆེན་བྱེད་བཞིན་པའི་ཐོག། གོང་བརྗོད་གནས་ཚུལ་ཉེ་བའི་ཆར་བོད་མི་གཉིས་ནས་ལྷ་སའི་གཙུག་ལག་ཁང་གི་མདུན་དུ་རང་ལུས་མེར་བསྲེགས་བཏང་ནས་ཅང་མ་འགོར་བའི་དུས་སུ་། རྒྱ་ནག་གཞུང་གིས་ལྷ་སར་ཡོང་མཁན་བོད་མི་བཀག་བསྡོམས་དང་དམ་དྲག་ཆེན་པོ་བྱེད་བཞིན་སྐབས་བྱུང་བ་ཡིན་པ་དང་། དེང་སང་བོད་ནང་བོད་མི་ཚོ་དམག་མི་མཐོང་ན་ཉེན་ཡོལ་དང་བྲོས་བྱོལ་དགོས་བའི་གནས་ཚུལ་འདིས་བོད་ནང་གི་དངོས་ཡོད་གནས་སྟངས་མཚོན་ཐུབ་པ་བོད་ནས་ངོ་སྤྲོད་བྱས་བྱུང།
སྤྱིར་དེང་སང་བོད་ཨ་མདོ་དང་ཁམས་ཕྱོགས་ནས་བོད་མི་ཚོ་ལྷ་སར་རྐྱང་ཕྱག་མཚལ་བ་དང་། རྐང་ཐང་བརྒྱུད་བསྐྱོད་མཁན་ཇེ་མང་ལ་འགྲོ་བཞིན་པ་ཡིན་འདུག།