རྒྱ་གར་ནས་གོམ་བགྲོད་སྤེལ་མཁན་རྣམས་ཨལ་མོ་ར་དུ་འབྱོར་བ།

༄༅༎རྒྱ་གར་ནས་བོད་ལ་ཕྱིར་ལོག་ཅེས་པའི་གོམ་བགྲོད་ཀྱི་ལས་འགུལ་སྤེལ་མཁན་ཚོ་ཨལ་མོ་ར་ཞེས་པའི་ས་གནས་སུ་འབྱོར་ཡོད་འདུག།

བོད་ལ་ཕྱིར་ལོག་ཅེས་པའི་གོམ་བགྲོད་ཀྱི་ལས་འགུལ་སྤེལ་མཁན་ཁོངས་སུ་ཡོད་པའི་བསྟན་འཛིན་བརྩོན་འགྲུས་ལགས་ཀྱི་མྱུར་འཕྲིན་ཐོག་ནས་གནས་ཚུལ་སྤེལ་བར་ལྟར་ན། གོམ་བགྲོད་པ་རྣམས་ཁ་ས་རྒྱ་གར་བྱང་ཕྱོགས་ཨུ་ད་རན་ཅལ་མངའ་སྡེའི་ཀུ་མོན་རི་རྒྱུད་དུ་ཆགས་པའི་ཨལ་མོ་ར་ཞེས་པའི་གྲོང་ཁྱེར་དུ་བདེ་འབྱོར་བྱུང་ཡོད་པ་དང་། ས་ཁུལ་འདི་ནས་བོད་ཀྱི་ས་མཚམས་ཐག་ཉེ་པོ་ཆགས་ཀྱི་ཡོད་འདུག། གོམ་བགྲོད་པ་རྣམས་ཐོག་མར་ཕྱི་ཟླ་གསུམ་པའི་ཚེས་བཅུ་སྟེ་བོད་མིའི་སྒེར་ལངས་ཀྱི་ཉིན་མོར་བཞུགས་སྒར་རྡ་རམ་ས་ལ་ནས་འགོ་བཙུགས་ཀྱིས་ཧི་མ་ཅལ་དང་། པན་འཇབ། ཧར་ཡ་ན། ལྡི་ལི་བཅས་མངའ་སྡེ་ཁག་ཅིག་བརྒྱུད་ནས་ད་ཆ་བྱང་ཕྱོགས་རི་རྒྱུད་དུ་ཆགས་པའི་ཨུ་ད་རན་ཅལ་མངའ་སྡེའི་ས་ཁུལ་དུ་འབྱོར་ཡོད་པ་དང་།ཁོང་རྣམས་ལམ་བར་འགྲུལ་བཞུད་བྱེད་པའི་སྐབས་གནམ་གཤིས་ཚ་གྲང་འདྲ་མིན་སྣ་ཚོགས་དང་། ལྷག་པར་དུ་ལམ་ཆེན་བརྒྱུད་འགྲུལ་ཞུད་བྱེད་དགོས་པར་བརྟེན་མོ་དྲའི་འུར་སྒྲ་དང་། ཛ་དྲག་གི་ཉེན་ཁ་སོགས་དཀའ་ངལ་དུ་མ་ཞིག་འཕྲད་ཀྱང་ཚང་མས་ཆོད་སེམས་བརྟན་པོར་གནས་ཐུབ་ཡོད་པ་དང་། འགྲུལ་ལམ་ཁག་ལ་རྒྱ་གར་ཡུལ་མི་ཚོས་སྣེ་ལེན་མཐུན་འགྱུར་ཧ་ཅང་ཡག་པོ་བྱས་དང་བྱེད་བཞིན་ཡོད་པའི་སྐོར་བཀོད་འདུག། གོམ་བགྲོད་པ་མི་གྲངས་གསུམ་བརྒྱ་ལྷག་ཙམ་ཡོད་པའི་ཁོངས་སུ་རྒན་ཤོས་ལོ་ན་བདུན་བཅུ་ལྷག་ཙམ་སོན་པ་དང་། ལོ་ན་ཆུང་ཤོས་བཅུ་བདུན་ཡིན་པ་བཅས་གང་ལྟར་ཚང་མའི་ངོས་ནས་དཀའ་སྡུག་དང་། དམ་བསྒྲགས་བྱེད་མིན་ལ་མ་ལྟོས་པར་མུ་མཐུད་ནས་ཐོག་མའི་དམིགས་ཡུལ་གཞིར་བཟུང་རང་གི་ལུང་པའི་ནང་ཕྱིར་འཛུལ་ཞུགས་ཐུབ་པའི་སེམས་ཤུགས་ཡོད་འདུག། དེའི་ཁོངས་སུ་ཕྱི་རྒྱལ་བའི་མི་རིགས་ཁག་ཅིག་ནས་གདུང་སེམས་མཉམ་སྐྱེད་ཀྱིས་གོམ་བགྲོད་བྱེད་བཞིན་པ་དང་། ཁག་ཅིག་ནས་གསར་འགོད་པ་དང་། འཕྲུལ་རིགས་ཀྱི་ཐོག་མཐུན་འགྱུར་གནང་གི་ཡོད་འདུག།