བལ་ཡུལ་གྱི་ཉེན་རྟོག་པས་བོད་མི་འཛིན་བཟུང་བྱས་ཡོད་པ།

༄༅༎བལ་ཡུལ་ནང་བོད་མི་ཚོས་མུ་མཐུད་ནས་རྒྱ་ནག་གཞུང་ཚབ་མདུན་དུ་རྔམ་སྟོན་ཁྲོམ་བསྐོར་གྱི་ངོ་རྒོལ་བྱས་ཡོད་པར་བལ་ཡུལ་གྱི་ཉེན་རྟོག་སྐོར་སྲུང་བ་ཚོས། ད་རིང་བོད་མི་ ༡༢༥ ་ཙམ་འཛིན་བཟུང་བཀག་སྡོམ་བྱས་ཡོད་འདུག

རྒྱ་ནག་གཞུང་གིས་བོད་ནང་བོད་མིའི་ཞི་བའི་ངོ་རྒོལ་གྱི་གྱེན་ལངས་ལ། དྲག་གནོན་བྱས་པ་ནས་འགོ་བཙུགས་འཛམ་གླིང་ཡུལ་གྲུ་ཁག་ནང་ཡོད་པའི་བཙན་བྱོལ་བོད་མི་ཚོས་བོད་ནང་གི་བོད་མི་རྣམས་ལ་གདུང་སེམས་མཉམ་སྐྱེས་ཆེད།  རྒྱ་ནག་གཞུང་ལ་བོད་ནང་བོད་མི་དྲག་གནོན་གཏང་རྒྱུ་མཚམས་འཇོག་དགོས་པའི་ངོ་རྒོལ་གྱི་ལས་འགུལ་བསྟུད་མར་སྤེལ་བཞིན་པར་ལྟར། ངོ་རྒོལ་གྱི་ལས་འགུལ་རྣོ་ངར་ཆེ་ཤོས་ཤིག་བལ་ཡུལ་ནང་ཡོད་པའི་བོད་མི་ཚོས་སྤེལ་བཞིན་ཡོད་པ་དང་། བལ་ཡུལ་གཞུང་གིས་ཀྱང་རྒྱ་ནག་གཞུང་ལ་ངོ་སྲུང་ཆེད་དམངས་གཙོའི་རྒྱལ་ཁབ་ཀྱི་ངོ་བོ་དང་མི་མཐུན་པར་བོད་མིའི་ཞི་བའི་ངོ་རྒོལ་གྱི་ལས་འགུལ་ལ། དྲག་གནོན་བྱེད་བཞིན་ཡོད་པ་དང་། དཔེར་ན་ད་རིང་གི་ངོ་རྒོལ་གྱི་ལས་འགུལ་སྐབས་སུ་མཚོན་ནའང་། བོད་མི་ངོ་རྒོལ་གནང་མཁན་གྱི་ཐོག་བལ་ཡུལ་གྱི་ཉེན་རྟོག་སྐོར་སྲུང་བས། དབྱུག་པ་ཞུས་ཏེ་ངོ་རྒོལ་གནང་མཁན་གྱི་བོད་རིགས་ཤིག་གི་མགོ་ནས་ཁྲག་ཐོན་བཞིན་ཡོད་སྐོར་ ཨེཔི་གསར་འགྱུར་ལས་ཁང་གིས་གནས་ཚུལ་སྤེལ་ཡོད་པ་རེད། བལ་ཡུལ་གཞུང་གི་ཉེན་རྟོག་སྐོར་སྲུང་བས་བོད་མིའི་ངོ་རྒོལ་གནང་མཁན་ཚོ་འཛིན་བཟུང་བྱས་ཀྱི་ཡོད་ཀྱང། མཚན་མོ་བཀག་གཉར་མེད་པ་གློད་འགྲོལ་བཏང་གིས་ཡོད་པ་རེད༎