ཉི་ཧོང་དུ་གནམ་བདེ་སྒོ་མོ་ཆེའི་དམར་གསོད་དོན་རྐྱེན་བྱུང་ནས་མི་ལོ་༣༥་འཁོར་བའི་དུས་དྲན་སྐབས་བོད་ཀྱི་སྐུ་ཚབ་དོན་གཅོད་མཉམ་ཞུགས་གནང་འདུག

ཉི་ཧོང་གི་གྲོང་ཁྱེར་(Tokyo)་ནང་ཡོད་པའི་རྒྱ་ནག་ནང་རང་དབང་དང་དམངས་གཙོ་ལ་རྒྱབ་སྐྱོར་གནང་མཁན་གྱི་རྒྱ་ནག་དང་ཉི་ཧོང་གི་གཞུང་འབྲེལ་མ་ཡིན་པའི་ཚོགས་པ་ཁག་གིས། འདི་ཟླའི་ཚེས་༣ཉིན་ཉི་ཧོང་གྲོས་ཚོགས་འོག་མའི་ཚོགས་ཁང་ཞིག་གི་ནང་པེ་ཅིང་གནམ་བདེ་སྒོ་མོ་ཆེའི་དམར་གསོད་དོན་རྐྱེན་གྱི་ལོ་འཁོར་རྗེས་དྲན་གནང་ཡོད་ཅིང་། རྗེས་དྲན་མཛད་སྒོ་དེའི་ཐོག་གྲོས་ཚོགས་འཐུས་མི་ཟུར་པ་དང་དཔལ་འབྱོར་བློན་ཆེན་གཞོན་པ་(Makino Seishu)་ཡིས་ཚོགས་ཞུགས་གནང་མཁན་ཚོར་དགའ་བསུ་ཞུས་གནང་བ་དང་སྦྲགས། རྒྱ་ནག་དམར་ཤོག་ཚོགས་པས་རྒྱ་ནག་དང་བཙན་བཟུང་བྱས་པའི་ས་ཁུལ་ཁག་ཏུ་འགྲོ་བ་མིའི་ཐོབ་ཐང་དང་མང་གཙོའི་ཐོབ་ཐང་ལ་རྩིས་མེད་རྡོག་རོལ་གཏོང་བཞིན་པའི་བྱ་སྤྱོད་དང་། མང་གཙོའི་གལ་ཆེའི་རང་བཞིན་སྐོར་གླེང་གནང་ཡོད་པ་མ་ཟད། ཁོང་གིས་རྒྱ་ནག་གི་མི་མང་ཡོངས་རྫོགས་དང་རྒྱལ་སྤྱིའི་མང་གཙོའི་ཚོགས་པ་རྣམས་ཆིག་སྒྲིལ་གྱིས་བཙན་གནོན་བྱེད་མཁན་གྱི་སྲིད་གཞུང་ལ་འཐབ་རྩོད་གནང་ཏེ་རྒྱ་ནག་ལ་རང་དབང་དང་མང་གཙོ་སྐྲུན་དགོས་པའི་འབོད་སྐུལ་ཞུས་གནང་འདུག
ཡང་སྐབས་དེར་ཉི་ཧོང་བོད་ཀྱི་སྐུ་ཚབ་དོན་གཅོད་ཨརྱ་ཚེ་དབང་རྒྱལ་པོ་ལགས་གསུང་བཤད་གནང་མཁན་གྱི་སྐུ་མགྲོན་དུ་གདན་ཞུ་གནང་ཡོད་པ་ལྟར། ཁོང་གིས་པེ་ཅིང་གནམ་བདེ་སྒོ་མོ་ཆེའི་དོན་རྐྱེན་གྱི་སྐབས་དང་དེའི་རྗེས་སུ་རྒྱ་ནག་དམར་ཤོག་ཚོགས་པས་དྲག་གནོན་བྱས་པའི་རྒྱ་མི་རིགས་དང་། ཧོང་ཀོང། ཐེ་ཝན་བཅས་པར་ང་ཚོ་བོད་མི་ཚང་མས་གདུང་སེམས་མཉམ་སྐྱེས་དང་ཐུགས་གསོ་ཞུ་རྒྱུ་ཡིན་ཞེས་དང་། མང་གཙོ་ནི་གཡོལ་ཐབས་མེད་པ་ཞིག་ཡིན་པ་དང་། བོད་མི་ཚོས་རང་དབང་དང་མང་གཙོའི་ཆེད་དུ་རྒྱ་རིགས་སྤུན་ཟླ་ཚོ་དང་མཉམ་རུབ་ཀྱིས་འབད་བརྩོན་གནང་རྒྱུ་ཡིན་པ་གསལ་སྟོན་གནང་འདུག
ད་རེས་གནམ་བདེ་སྒོ་མོ་ཆེའི་དམར་གསོད་དོན་རྐྱེན་བྱུང་ནས་མི་ལོ་༣༥་འཁོར་བའི་དུས་དྲན་དེའི་ཐོག་རྩོམ་པ་པོ་དང་། གསར་འགོད་པ། དེ་བཞིན་མང་གཙོ་དང་རང་དབང་ལ་དགའ་བའི་མི་མང་མང་པོ་ཞིག་མཉམ་ཞུགས་གནང་ཡོད་པ་རེད་འདུག

དེ་བཞིན་དབྱིན་ཡུལ་དུ་ཡང་འདི་ཚེས་༤ཉིན་རྒྱ་རིགས་དམངས་གཙོ་དོན་གཉེར་བ་དང་། ཐེ་ཝན། ཧོང་ཀོང་། ཡུ་གུར་བ་བཅས་ཀྱི་ཚོགས་སྡེ་ཁག་གིས་མཉམ་དུ་པེ་ཅིང་གནམ་བདེ་སྒོ་མོ་ཆེའི་དམར་གསོད་དོན་རྐྱེན་བྱུང་ནས་མི་ལོ་༣༥་འཁོར་བའི་རྗེས་དྲན་གནང་སྐབས་ས་གནས་ཀྱི་བོད་རིགས་ཚོགས་པའི་སྐུ་ཚབ་མཉམ་ཞུགས་གནང་ཡོད་པ་རེད་འདུག

གསར་འགོད་པ། དབྱངས་སྒྲོན། ཀླུ་འབུམ།
རྩོམ་སྒྲིག་པ། རིག་ལྡན་སྒྲོལ་མ།
དྲྭ་ཐོག་རྩོམ་སྒྲིག་པ། དཔལ་ལྡན་རྒྱལ།
དྲྭ་ཐོག་སྤེལ་མཁན། ཀླུ་འབུམ།