ཨི་ཊ་ལི་རུ་བོད་མི་མཐོ་རིམ་སློབ་གྲྭ་བ་བཅོ་ལྔ་ལ་ཟབ་སྦྱོང༌།

༄༅༎རྒྱ་གར་ནས་མཐོ་རིམ་སློབ་གྲྭའི་བོད་པའི་སློབ་ཕྲུག་བཅོ་ལྔ་ཞིག་ཨི་ཊ་ལི་རུ་དེང་སྐབས་ཆབ་སྲིད་རིག་པའི་ཟབ་སྦྱོང་ཆེད་སྐོར་བསྐྱོད་གནང་བཞིན་པ་རེད།

དེ་ཡང་རྒྱ་གར་ནང་རྟེན་གཞི་བྱས་པའི་བོད་རྒྱལ་ཡོངས་དམངས་གཙོ་ཚོགས་པའི་གོ་སྒྲིག་དང་ཚོགས་པ་དེའི་ཚོགས་གཙོས་སྣེ་འཁྲིད་འོག་རྒྱ་གར་གྱི་མཐོ་རིམ་སློབ་གྲྭ་ཁག་ནང་ཆབ་སྲིད་རིག་པའི་སློབ་གཉེར་གནང་བཞིན་པའི་བོད་པའི་སློབ་མ་གྲངས་བཅོ་ལྔ་ཞིག་ཨི་ཊ་ལི་ཡིས་སཱི་ཡེ་ན་གྲོང་ཁྱེར་རུ་འབྱོར་ཡོད་པ་རེད། ཁོང་རྣམས་ལ་ཨི་ཊ་ལི་ཡིས་གཙུག་ལག་སློབ་གྲྭའི་སློབ་དཔོན་ཁག་ཅིག་ནས་ཆབ་སྲིད་རིག་པའི་སློབ་འཁྲིད་གནང་བཞིན་པ་དང་དེ་བཞིན་ཨ་རིའི་ཧར་ལྦ་ཌི་གཙུག་ལག་སློབ་གྲྭའི་ནང་ཉམས་ཞིབ་པ་བློ་བཟང་སེང་གེ་ལགས་ནས་རྒྱལ་སྤྱིའི་ཆབ་སྲིད་ཀྱི་འགྲོ་ལུགས་དང་བོད་ཀྱི་ཆབ་སྲིད་ཀྱི་གནས་བབ་སྐོར་གསུང་བཤད་གནང་རྒྱུ་ཡིན་འདུག་ལ་ལྷག་པར་དུ་བོད་པའི་སློབ་མ་རྣམས་ཀྱི་ཟབ་སྦྱོང་དེའི་ཐོག་ཨི་ཊ་ལི་རུ་བཅའ་བཞུགས་བོད་གནས་མཁས་དབང་སློབ་དཔོན་ནམ་མཁའི་ནོར་བུ་རིན་པོ་ཆེ་ཡིས་བཀའ་སློབ་གསུང་བཤད་ཡང་གནང་འཆར་ཡོད་པ་རེད། མཐོ་རིམ་སློབ་གྲྭའི་བོད་པའི་སློབ་ཕྲུག་རྣམས་ནས་ཨི་ཊ་ལི་རུ་ཆབ་སྲིད་ཀྱི་ཟབ་སྦྱོང་དང་སྐོར་བསྐྱོད་གནང་རིང་བོད་ཀྱི་རིག་གཞུང་ངོ་སྤྲོད་དང་འབྲེལ་བའི་འཁྲབ་སྟོན་གཟིགས་འབུལ་གནང་འདུག ཡང་བདུན་ཕྲག་འདིའི་འགོ་སྟོད་དུ་ཁོང་རྣམས་ཨི་ཊ་ལི་ཡིས་སཱི་ཡེ་ནི་གྲོང་ཁྱེར་རུ་ཕེབས་འབྱོར་སྐབས་ཨི་ཊ་ལི་ཡི་རྒྱལ་ཡོངས་གཞོན་ནུའི་ལས་འགུལ་ཚོགས་པ་ཞེས་པ་ནས་བོད་རྒྱལ་ཡོངས་དམངས་གཙོ་ཚོགས་པའི་ཚོགས་གཙོ་འཆི་མེད་གཡུ་གྲུང་ལགས་སུ་བྱ་དགའ་སོགས་སྩལ་གནང་འདུག་པ་དང་བྱ་དགའ་གསོལ་སྩལ་གྱི་མཛད་སྒོའི་ཐོག་འཆི་མེད་གཡུ་གྲུང་ལགས་ནས་ཨི་ཊ་ལི་ཡིས་མང་ཚོགས་ནས་བོད་དོན་ཐོག་རྒྱབ་བསྐྱོར་གནང་པར་རྗེས་སུ་ཡི་རང་དང་རྒྱབ་བསྐྱོར་མུ་མཐུད་ཡོང་བའི་འབོད་སྐུལ་ནན་བརྗོད་གནང་འདུག།