རྒྱ་ནག་གིས་དགེ་འདུན་པ་ཚེ་དབང་ལ་ལོ་བཅུའི་ཁྲིམས་ཐག་བཅད་འདུག

དགེ་འདུན་པ་ཚེ་དབང་།

ནག་ཆུ་སོག་རྫོང་ཁྲི་རུ་དྲིལ་མདའ་དགོན་པའི་དགེ་འདུན་པ་ཚེ་དབང་ལ་ལོ་ངོ་བཅུའི་དུས་བཀག་བཙོན་འཇུག་གི་ཁྲིམས་ཐག་བཅད་འདུག
དེ་ཡང་ཕྱི་སྡོད་བོད་མི་རིན་ཆེན་ལགས་ཀྱིས་འདི་གའི་གསར་འགོད་པ་བསོད་ནམས་དབང་འདུད་ལགས་སུ་གནས་ཚུལ་ངོ་སྤྲོད་གནང་བ་ལྟར་ན། སྤྱི་ལོ་༢༠༡༤ཟླ་༣ཚེས་༡༧གྱི་མཚན་མོ་རྒྱ་གཞུང་གིས་ནག་ཆུ་སོག་རྫོང་ཁྲི་རུ་དྲིལ་མདའ་དགོན་པའི་དབུ་མཛད་ཚངས་དབྱངས་རྒྱ་མཚོ་དང་། ཚེ་དབང་། ཨ་ཚེ། རྒྱལ་མཚན་བཅས་གྲྭ་པ་༤འཛིན་བཟུང་བཙོན་འཇུག་བྱས་ནས་ད་བར་ནང་མི་རྣམས་ཀྱིས་ཁོང་རྣམས་གར་ཡོད་ཀྱི་གནས་ཚུལ་ཤེས་རྟོགས་མེད་པར་ལུས་ཡོད་པ་རེད།
འོན་ཀྱང་ཉེ་ཆར་གནས་ཚུལ་ཤེས་རྟོགས་བྱུང་བ་ལྟར་ན། ཉེ་བའི་སྤྱི་ཟླ་༡པོའི་ནང་གྲྭ་ཚེ་དབང་ལ་དུས་བཀག་ཁྲིམས་ཐག་ལོ་༡༠བཅད་པ་ཙམ་ལས། ས་གནས་སུ་དམ་དྲག་གི་རྐྱེན་པས་ཞིབ་ཕྲ་ས་གནས་གང་དུ་ཁྲིམས་ཐག་བཅད་མིན་དང་། གང་དུ་བཙོན་འཇུག་བཀག་ཉར་བྱས་ཡོད་པའི་སྐོར་སོགས་ཤེས་རྟོགས་ཐུབ་ཀྱི་མེད་པ་ངོ་སྤྲོད་བྱས་ཡོད།
དེ་བཞིན་དེ་སྔ་ཁོང་དང་མཉམ་དུ་འཛིན་བཟུང་བྱས་པའི་ཚངས་དབྱངས་རྒྱ་མཚོ་ལ་ལོ་༡༢གྱི་ཁྲིམས་ཐག་བཅད་ཟིན་འདུག་པ་དང་། ཨ་ཚེ་དང་རྒྱལ་མཚན་གཉིས་ཀྱི་སྐོར་ད་དུང་ཤེས་རྟོག་ཐུབ་ཀྱི་མི་འདུག
གོང་གི་རང་ལོ་༢༧་ཙམ་ཡིན་པའི་དགེ་འདུན་པ་ཚེ་དབང་ལགས་ཀྱི་པ་ལགས་སྔ་ས་ནས་གྲོངས་ཟིན་པ་དང་། ཁོང་གི་མ་རྒན་ད་ལྟ་འཚོ་བཞུགས་ཡོད་ཀྱང་ཁོང་གི་བུའི་བཙོན་འཇུག་གི་གནས་ཚུལ་ཁོང་ལ་གསང་བ་བྱས་ནས་བཞག་ཡོད་པ་ཡང་འགྲེལ་བརྗོད་གནང་འདུག

གསར་འགོད་པ་ཀརྨ་རྡོ་རྗེ།
ཞིབ་ཕྲ་འདི་གའི་གསར་འགོད་པ་བསོད་ནམས་དབང་འདུད་ལགས་ཀྱིས་བཏང་བའི་གནས་ཚུལ་ལ་གསན་རོགས།