ເຂື່ອນໄຊຍະບູຣີ ຕ້ອງຢຸດສ້າງຢ່າງແທ້ຈິງ

ການເດີນທາງ ໄປເຂດ ທີ່ຕັ້ງ ຂອງເຂື່ອນ ໄຊຍະບູຣີ ທີ່ຈະສ້າງ ໃສ່ ແມ່ນໍ້າຂອງ ຂອງລາວ ໃນ ວັນທີ 23 ກໍຣະກະດາ ເພື່ອໃຫ້ ຮູ້ວ່າ ການ ກໍ່ສ້າງເຂື່ອນ ທີ່ພວມ ດໍາເນີນໄປ ຢູ່ໃນ ເວລານີ້, ເຖິງແມ່ນວ່າ ຣັຖບານ ສປປ ລາວ ໄດ້ໃຫ້ ຄໍາໝັ້ນວ່າ ຈະໂຈະ ໂຄງການ ນັ້ນແລ້ວ. ຕາມຣາຍງານ ຂອງ ທ່ານ Pianporn Deetes ແລະ ທ່ານ Ame Trandem ເຄືອຂ່າຍ ແມ່ນໍ້າ ສາກົລ ປະຈໍາ ບາງກອກ ຜ່ານ ໜັງສືພິມ The Nation.

ໃນສະຖານທີ່ ພັກ ເຮັດວຽກ ຂອງ ຄົນງານ ໃກ້ເຂດບ້ານ ທ່າລານ ມີຄົນງານ ປະມານ 2-3 ຮ້ອຍ ຄົນ ປະຈໍາຢູ່, ຖນົນເຂົ້າສູ່ ເຂື່ອນ ກໍາລັງ ກໍ່ສ້າງ ມີການ ບຸກເບີກ ທີ່ດິນ ສ່ວນນຶ່ງ ໂດຍທີ່ບໍ່ມີ ການຈ່າຍຄ່າ ທົດແທນ ໃຫ້ຜູ້ເປັນ ເຈົ້າຂອງ. ປາກົດວ່າ ຣັຖບານ ສປປ ລາວ ດໍາເນີນ ໂຄງການ ເຂື່ອນ ໄຊຍະບູລີ ແຕ່ຝ່າຍດຽວ ຊຶ່ງເປັນການ ຣະເມີດ ກົດໝາຍ ນາໆຊາດ ແລະ ພັນທະ ຂອງລາວ ໃນການ ປະຕິບັດ ຂໍ້ຕົກລົງ ວ່າດ້ວຍ ແມ່ນໍ້າຂອງ ສະບັບ ປີ 1995 ແລະວ່າ ການສ້າງ ເຂື່ອນ ໄຊຍະບູຣີ ຖືວ່າ ສປປ ລາວ ບໍ່ໃຫ້ຄວາມ ສໍາຄັນ ໃນພັນທະ ຂອງຕົນ ທີ່ມີຕໍ່ ພາກພື້ນ ແລະ ທັງເປັນການ ປຸູ້ນຣະດົມ ອະນາຄົດ ຂອງ ປະຊາຊົນ ຫລາຍລ້ານຄົນ ທີ່ອາສັຍ ແມ່ນໍ້າຂອງ ປະຄອງ ຊີວິດ ປະຈໍາວັນ ແລະ ຄວາມໝັ້ນຄົງ ຂອງເຂົ້າປາ ອາຫານ.

ຜູ້ຕາງໜ້າ ຈາກ 4 ປະເທດ ລຸ່ມ ແມ່ນໍ້າຂອງ ລາວ ວຽດນາມ ກັມພູຊາ ແລະ ໄທ ເບື້ອງຕົ້ນ ມີກໍານົດ ພົບປະ ຫາຣືກັນ ທີ່ກຸງ ພະນົມເປັນ ກ່ຽວກັບ ບາດກ້າວ ຕໍ່ໄປ ຕາມຂໍ້ ຕົກລົງ PNPCA ເພື່ອຕັດສິນ ເລື້ອງ ເຂື່ອນ ໄຊຍະບູຣີ ແຕ່ກ້ນ ປະຊຸມ ຖືກເລື່ອນໄປ ຢ່າງບໍ່ມີ ກໍານົດ ບໍ່ມີຄໍາ ອະທິບາຍ ໃດໆ. ເຄືອຂ່າຍ ແມ່ນໍ້າ ສາກົລ ສລຸບວ່າ ການຍຸຕິ ຂັ້ນຕອນ ຂໍ້ຕົກລົງ PNPCA ແຕ່ຝ່າຍດຽວ ຂອງ ສປປ ລາວ ໂດຍບໍ່ ອະນຸຍາດ ໃຫ້ປະເທດ ເພື່ອນບ້ານ ສລຸບນໍາ ຢ່າງເໝາະສົມ ນັ້ນ ເປັນການ ຣະເມີດ ຂໍ້ຕົກລົງ ກ່ຽວກັບ ແມ່ນໍ້າຂອງ ແລະ ກົດໝາຍ ຣະຫວ່າງ ປະເທດ. ຖ້າ ຣັຖບານ ສປປ ລາວ ຫາກ ປະຕິບັດ ພັນທະ ຮ່ວມມືກັບ ປະເທດ ເພື່ອນບ້ານ ໃນໂຄງການ ເຂື່ອນ ໄຊຍະບູຣີ ຣັຖບານ ສປປລາວ ກໍຄວນ ຍຸຕິການ ກໍ່ສ້າງຕ່າງໆ ໃນເຂດ ໂຄງການ ເຂື່ອນນັ້ນ ແລະ ເລີ້ມແກ້ໄຂ ບັນຫາ ຢ່າງຈິງໃຈ.

ເຂື່ຶອນ ໄຊຍະບູລີ ເປັນພັຍຂົມຂູ່ ຢ່າງໃຫຍ່ຫຼວງ ສໍາລັບ ແມ່ນໍ້າຂອງ ແລະ ປະຊາຊົນ ຂົງເຂດ, ຈະເຮັດໃຫ້ ມີການ ໂຍກຍ້າຍ ຊາວບ້ານ ຫລາຍກວ່າ 2100 ຄົນ, ແລະ ຈະສົ່ງ ຜົລກະທົບ ຕໍ່ ປະຊາຊົນ ຫລາຍກວ່າ 2 ແສນ ຄົນ ແລະ ຈະເຮັດ ໃຫ້ປາ 40 ກວ່າ ປະເພດ ສູນພັນ ໄປຈາກ ແມ່ນໍ້າຂອງ ຮວມທັງ ປ່າບຶກ.