ອະນາມັຍໂລກ ໃຫ້ເບິ່ງແຍງຜູ້ຊະຣາ

ສະຫະປະຊາຊາດ ໄດ້ຢໍ້າເຖິງ ຄວາມສໍາຄັນ ໃນການ ເພີ້ມການ ຮັກສາ ສຸຂພາບ ໃຫ້ຜູ້ ອະວຸໂສ ຢ່າງພຽງພໍ ແລະ ຮຽກຮ້ອງ ໃຫ້ທຸກໆ ປະເທດ ຈັດ ງົບປະມານ ຊ່ວຍເຫລືອ ຜູ້ສູງອາຍຸ ໃຫ້ມີ ສຸຂພາບ ເຂັ້ມແຂງ ແລະ ໃຫ້ມີ ຊີວິດ ການເປັນຢູ່ ທີ່ດີ.

ທ່ານ ບານກີມູນ ເລຂາທິການ ສະຫະປະຊາຊາດ ກ່າວໃນມື້ ອະນາໄມໂລກ  ວັນທີ 7 ເມສາ ວ່າທ່ານຂໍ ຮຽກຮ້ອງ ໃຫ້ຣັຖບານ ພົລເຮືອນ ແລະ ເອກກະຊົນ ຮ່ວມແຮງ ຮ່ວມໃຈກັນ ເພີ້ມໂອກາດ ໃຫ້ພົລເມືອງ ມີຊີວິດ ທີ່ຍືນຍາວ ແລະ ມີສຸຂພາຍດີ.

ໃນວັນທີ 7 ເມສາ ເປັນ ມື້ສ້າງຕັ້ງ ອົງການ ອະນາໄມ ໂລກ ຈຶ່ງຈັດໃຫ້ ເປັນມື້ ອະນາໄມ ໂລກ ແລະທຸກໆປີ ຈະເນັ້ນໃສ່ ຫົວຂໍ້ສໍາຄັນ ໃນການ ຮັກສາ ສຸຂພາບ. ສໍາລັຍປີນີ້ ຫົວຂໍ້ກໍແມ່ນ “ສຸຂພາບດີ ຊີວິດຍືນຍາວ ໄປອີກຫລາຍປີ”. ຊຶ່ງເນັ້ນໃສ່ ສົ່ງເສີມ ໃຫ້ທຸກຄົນ ທົ່ວໄປ ຮັກສາ ສຸຂພາບ ເພື່ອໃຫ້ ສາມາດ ມີໂອກາດ ມີສຸຂພາບດີ ເພື່ອໃຫ້ມີ ຄຸນພາບ ໃນຊີວິດ ຫລາຍໆປີ.

ອີງຕາມ ອົງການ ອະນາໄມ ໂລກ ເມື່ອເຖິງເຄິ່ງ ສັຕວັດ ຜ່ານມາ ມີ ປະຊາກອນໂລກ 14 ລ້ານຄົນ ທີ່ມີອາຍຸ 80 ປີ ຂຶ້ນໄປ. ແຕ່ເມື່ອຮອດ ປີ 2050 ຜູ້ທີ່ຢູ່ ໃນກຸ່ມທີ່ມີ ອາຍຸຂະນາດ ນີ້ ຈະມີຮອດ 400 ລ້ານຄົນ ຊຶ່ງ 100 ລ້ານຄົນ ຈະຢູ່ໃນ ປະເທດຈີນ ພຽງ ປະເທດດຽວ.

ພາຍໃນເວລາ 5 ປີ ຕໍ່ໄປນີ້ ຈະເປັນເທື່ອ ທໍາອິດ ໃນປວັດສາດ ທີ່ຈໍານວນ ຜູ້ມີອາຍຸ ແຕ່ 65 ປີ ຂຶ້ນໄປ ຈະມີຫລາຍກວ່າ ເດັກນ້ອຍອາຍຸຕໍ່າກວ່າ 5 ປີລົງມາ. ທ່ານ ບານ ກ່າວວ່າ ຍ້ອນເຫດນີ້ ຈຶ່ງຈໍາເປັນ ທີ່ຈະຕ້ອງ ໄດ້ຊ່ວຍກັນ ເລີ້ມກະຕຽມ ຮັກສາ ສຸຂພາບ ຂອງຜູ້ອະວຸໂສ ຕັ້ງແຕ່ ດຽວນີ້.