ນາຍົກລາວຖືກຮຽກຮ້ອງ ຈາກນັກລົງທຶນວຽດນາມ

ນາຍົກ ຣັຖມົນຕຣີ ວຽດນາມ ທ່ານ Nguyen Tan Dung ກ່າວ ໃນກອງ ປະຊຸມ ການຮ່ວມ ລົງທຶນ ລາວ-ວຽດນາມ ຢູ່ ນະຄອນຫລວງ ວຽງຈັນ ມື້ວັນເສົາທີ 10 ກັນຍາ 2011 ນີ້ ວ່າ, ຣັຖບານ ລາວ ແລະ ວຽດນາມ ຕ້ອງໄດ້ ດັດແປງ ກົດໝາຍ ເພື່ອໃຫ້ ຄວາມ ສະດວກ ໃນການ ລົງທຶນ ການຄ້າ ຕ່າງໆ.

ກອງປະຊຸມ ທີ່ມີ ນັກ ທຸຣະກິຈ ການຄ້າ ແລະ ນັກລົງທຶນ ຫລາຍກວ່າ 300 ຄົນ ຈາກສອງ ປະເທດ ເຂົ້າຮ່ວມ ໂດຍມີ ນາຍົກ ຣັຖມົນຕຣີ ລາວ ທ່ານ ທອງສິງ ທັມມະວົງ ແລະທ່ານ Dung ເປັນ ປະທານ ກອງ ປະຊຸມ ຮ່ວມກັນ.

ໃນກອງ ປະຊຸມ ດັ່ງກ່າວ ນັກທຸຣະກິດ ນັກລົງທຶນ ວຽດນາມ ໄດ້ສເນີ ໃຫ້ ຣັຖບານ ລາວ ພັທນາ ນະໂຍບາຍ ການຝຶກ ອົບຮົມ ຄົນງານ ລາວ ຍ້ອນວ່າ ລາວ ຍັງຂາດ ຄົນງານ ທີ່ມີຄວາມ ຮູ້ຄວາມ ສາມາດ ແລະ ຍັງຂາດ ຄວາມດຸໝັ່ນ ແລະ ອົດທົນ. ພ້ອມດຽວ ກັນນັ້ນ ກໍໃຫ້ ທາງການ ລາວ ລົງທຶນ ໃນການ ກໍ່ສ້າງ ລະບົບ ຂົນສົ່ງ ຄົມມະນາຄົມ ແລະ ໂຄງຮ່າງ ພື້ນຖານ ການຕິດຕໍ່ ໂທຣະຄົມ ມະນາຄົມ ໃນພື້ນທີ່ ບ່ອນທີ່ມີ ການຮ່ວມມື ຂອງ ໂຄງການ ຂອງ ທັງສອງ ຝ່າຍ.

ໃນເວລາ ດຽວກັນ ນັກ ທຸຣະກິຈ ນັກລົງທຶນ ວຽດນາມ ຍັງໄດ້ ສເນີໃຫ້ ຣັຖບານ ລາວ ສ້າງ ບັນຍາກາດ ໃນການ ລົງທຶນ ໃຫ້ແຈ້ງຂາວ ໂປ່ງໃສ ປະຕິຮູບ ຂັ້ນຕອນ ແລະ ກົດລະບຽບ ຂອງການ ລົງທຶນ ເພື່ອໃຫ້ ຄວາມສະດວກ ແກ່ ນັກລົງທຶນ ຊາວ ວຽດນາມ ທີ່ມີ ຈຸດປະສົງ ຢາກມາ ລົງທຶນ ລະຍະຍາວ ໃນລາວ. 

ວຽດນາມ ມີການ ລົງທຶນ ໃນລາວ 203 ໂຄງການ ມູນຄ່າ 3 ຕື້ 300 ລ້ານ ໂດລາ ສະຫະຣັຖ. ໃນ 8 ເດືອນ ທໍາອິດ ຂອງປີນີ້ ບໍຣິສັດ ວຽດນາມ ໄດ້ລົງທຶນ 469 ລ້ານ ໂດລາ ສະຫະຣັຖ ໃນລາວ.