ການເກັບກູ້ລະເບີດ ໃນແຂວງສາຣະວັນ

ປະຊາຊົນ ໃນແຂວງ ສາຣະວັນ ຍັງໄດ້ຮັບ ຜົນກະທົບຈາກ ລະເບີດ ບໍ່ທັນແຕກ ຍ້ອນວ່າທີ່ຜ່ານມາ ການເກັບກູ້ລະເບີດ ພາຍໃນແຂວງ ໄດ້ພຽງແຕ່ 3 ສ່ວນຮ້ອຍ ຂອງພື້ນທີ່ ທີ່ໄດ້ຮັບຜົນ ກະທົບ ທັງໝົດ.

ສຳລັບອຸບັດຕິເຫດ ທີ່ເກີດຂຶ້ນ ສ່ວນໃຫຍ່ແມ່ນ ຍ້ອນຊາວບ້ານ ທີ່ພຍາຍາມ ບຸກເບີກພື້ນທີ່ດິນ ເພື່ອການກະເສຕ ແລະ ຄວາມຮູ້ເທົ້າ ບໍ່ເຖິງການ ຂອງພວກຂະເຈົ້າ. ເຖິງປັດຈຸບັນນີ້ ປະຊາຊົນ ຍັງມີຄວາມວິຕົກ ກັງວົນ ແລະ ຢ້ານກົວຢູ່. ດັ່ງເຈົ້າໜ້າທີ່ ຈາກຫ້ອງການ ກົມປະສານງານ ການເກັບກູ້ລະເບີດ ແຫ່ງຊາດ ປະຈຳແຂວງ ສາຣະວັນ ໄດ້ເວົ້າວ່າ:

"ຖ້າທຽບໃສ່ ຜົນກະທົບທັງໝົດ ພວກເຮົາກໍສາມາດ ປະຕິບັດ ໄດ້ແຕ່ 3% ຂອງພື້ນທີ່ ທີ່ມີຜົນກະທົບ 80% ໃນທົ່ວແຂວງ ຖືວ່າທົ່ວແຂວງ ສາຣະວັນ ມາໄລ່ແລ້ວເປັນ 80% ທີ່ຖືກຜົນກະທົບ ແຕ່ພໍມາແກ້ໄດ້ ມີແຕ່ 3% ຖືວ່າຍັງ ຫລວງຫລາຍ ທີ່ສຸດ".

ເຈົ້າໜ້າທີ່ເວົ້າຕໍ່ໄປ ວ່າໃນລະຍະ 10 ປີ ຜ່ານມາ ທາງການສາມາດ ເກັບກູ້ລະເບີດ ໄດ້ທັງໝົດພຽງ ແຕ່ 2,231 ເຮັກຕາ ຊຶ່ງຖືວ່າໜ້ອຍທີ່ສຸດ. ອີງຕາມສະຖິຕິ ຫລ້າສຸດ ຢູ່ແຂວງ ສາຣະວັນ ມີຜູ້ທີ່ໄດ້ຮັບ ເຄາະຮ້າຍ ຈາກລູກລະເບີດ ບໍ່ທັນແຕກ ທັງໝົດ 1,140 ກໍຣະນີ, ໃນຈຳນວນນີ້ ມີຜູ້ເສັຍຊີວິດ 41 ຄົນ ແລະທີ່ເຫລືອນັ້ນ ໄດ້ກາຍເປັນ ຜູ້ເສັຍ ອະນາຄົດ ຕລອດຊີວິດ.

ເຖິງຢ່າງໃດກໍຕາມ ທາງຫ້ອງການ ກົມປະສານງານ ການເກັບກູ້ ລະເບີດແຫ່ງຊາດ ໄດ້ເອົາໃຈໃສ່ ໃຫ້ຄວາມຮູ້ ໂຄສະນາ ໃຫ້ປະຊາຊົນ ຮູ້ເຖິງຜົນຮ້າຍ ແລະ ອັນຕະລາຍ ຈາກລະເບີດ ບໍ່ທັນແຕກ ນອກຈາກນີ້ ກໍໄດ້ບຸກເບີກ ທຳລາຍ ລະເບີດທີ່ຕົກຄ້າງ ເລື້ອຍໄປເພື່ອໃຫ້ ປະຊາຊົນ ສາມາດ ໃຊ້ພື້ນທີ່ດິນ ໃນການກະເສຕ ແລະ ອື່ນໆໄດ້.

ແຂວງສາຣະວັນ ເປັນແຂວງນຶ່ງ ຂອງລາວ ທີ່ໄດ້ຮັບຜົນກະທົບ ຈາກລະເບີດ ບໍ່ທັນແຕກ ໂດຍສະເພາະ ໃນ 3 ເມືອງຂອງ 8 ເມືອງຊຶ່ງມີ ເມືອງຕະໂອ້ຍ, ເມືອງຕຸ້ມລານ ແລະ ເມືອງສະມ້ວຍ.