ອັດຕະປືຕຣຽມຮັບມື ພັຍທັມມະຊາຕ

ສະຫະຣັຖ ໄດ້ ອະນຸມັດ ການຊ່ອຍເຫລືອ ທາງດ້ານ ອຸປກອນ ໃນມູລຄ່າ ປະມານ 60 ພັນ ໂດລ້າ ເພື່ອຕຣຽມພ້ອມ ຮັບມືກັບ ພັຍ ທັມມະຊາດ ນ້ຳຖ້ວມ ແລະ ລົມພະຍຸ ທີ່ອາດຈະເກີດ ຂື້ນອີກໃຫມ່ ໃຫ້ແກ່ ແຂວງ ອັດຕະປື.

ອຸປກອນ ການຕຣຽມພ້ອມ ດັ່ງກ່າວ ທີ່ທາງການ ສະຫະຣັຖ ໄດ້ມອບໃຫ້ ກໍມີເຮືອຈັກ  ເສື້ອຊູຊີບ ເຄື່ອງຊູຊີບ ຫມໍ້ປັ່ນໄຟຟ້າ ເຄື່ອງ ກະຈາຍສຽງ ແລະ ເຄື່ອງມືຕ່າງໆ ທີ່ໃຊ້ໃນການ ເຕືອນພັຍ ແລະ ປົກປ້ອງ ປະຊາຊົນ ໃນຍາມເກີດ ພັຍພິບັດ ທັມມະຊາດ ປະເພດຕ່າງໆ.

ຍານາງ ຄາເຣນ ສະຈ໊ວດ ເອກອັຄຣາຊທູດ ສະຫະຣັຖ ປະຈຳລາວ ເປັນຜູ້ມອບ ສີ່ງຂອງ ດັ່ງກ່າວ ໃຫ້ແກ່ຕົວແທນ ຂອງເມືອງ ສນາມໄຊ ແລະ ເມືອງສານໄຊ ໃນພິທີມອບ ໃນມື້ວັນທີ 16 ກຸມພາ ຜ່ານມານີ້ ຊື່ງມີ ຝ່າຍລາວ ທ່ານ ຄຳພອນ ສໍເມືອງງາມ ຫົວຫນ້າ ຫ້ອງການ ສືກສາທິການ ປະຈຳແຂວງ ດຣ ບຸນເພັງ ພິລາວົງ ຮອງ ອະທິບໍດີ ກະຊວງ ສາທາຣະນະສຸກ ຮ່ວມດ້ວຍ ຕົວແທນຈາກ ສະພາກາແດງ ສປປລາວ ຝຣັ່ງເສດ ແລະ ອົງການ UNICEF ປະຈຳລາວ ປະກອບດ້ວຍ ສະມາຊິກ ຫນ່ວຍກູ້ພັຍ ໃນເຂດ ທ້ອງຖີ່ນ.

ທາງການ ສະຫະຣັຖ ເລີ້ມໃຫ້ການ ຊ່ອຍເຫລືອ ແຂວງ ອັດຕະປື ຍ້ອນຜົລ ກະທົບ ຈາກພັຍ ທັມມະຊາດ ໃນປີ 2009 ຫລັງຈາກທີ່ ແຂວງດັ່ງກ່າວ ຖືກຖລົ່ມຈາກ ລົມພະຍຸ ເກສນາ ໂດຍຜ່ານ ອົງການ UNICEF ເພື່ອໃຫ້ ປະຊາຊົນ ສາມາດ ເຂົ້າເຖິງ ແຫລ່ງນ້ຳ ສະອາດ ແລະ ສຸຂອະນາມັຍ ທີ່ດີ.