ຄົນງານຄວາມຮູ້ໜ້ອຍ ຖືກນາຍຈ້າງກົດແຮງງານ

ປັດຈຸບັນນີ້ ຄົນງານລາວ ຍັງຖືກນາຍຈ້າງ ກົດຂີ່ຂົ່ມເຫັງ ແລະ ຄົນງານ ທີ່ໄປເຮັດການ ຢູ່ຕ່າງປະເທດ ກໍບໍ່ສາມາດ ຮຽກຮ້ອງ ຄວາມຍຸຕິທັມ ໃຫ້ຕົນເອງໄດ້ ຍ້ອນວ່າເປັນຄົນ ບໍ່ຮູ້ໜັງສື ຫລືເປັນຄົນທີ່ມີ ຄວາມຮູ້ໜ້ອຍ. ດັ່ງເຈົ້າໜ້າທີ່ ກົມພັທນາຊາວໜຸ່ມ ສູນກາງຊາວໜຸ່ມ ປະຊາຊົນ ປະຕິວັດລາວ ນະຄອນຫລວງ ວຽງຈັນເວົ້າວ່າ:

"ແລະຜ່ານມາ ໄດ້ມີການຖູກກົດຂີ່ ຂູດຮີດ ເພາະວ່າ ພວກທີ່ມາຢູ່ ໂຮງຈັກ ໂຮງງານ ຈຳນວນນຶ່ງ ມັນກໍແມ່ນລະດັບ ການສຶກສາຕໍ່າ ທີ່ສຸດ ຈົບປະຖົມ ບາງຄົນກໍບໍ່ ຮູ້ຮອດໜັງສື".

ເຈົ້າໜ້າທີ່ ເວົ້າຕໍ່ໄປວ່າ ຍ້ອນນະໂຍບາຍ ຂອງຣັຖບານ ທີ່ເລັ່ງເຮັດໃຫ້ ເສຖກິດເຕີບໃຫຍ່ ໂດຍໄວ ຈຶ່ງເຮັດໃຫ້ມີການ  ພັທນາພາກ ອຸດສາຫະກັມ ຢ່າງວ່ອງໄວ ຈົນເກີດການ ກະຈາຍລາຍໄດ້ ຢ່າງບໍ່ເປັນທັມ ແລະມີການຈ້າງ ແຮງງານ ທີ່ບໍ່ມີສີມື ແລະ ບໍ່ມີຄວາມຮູ້ ຫລືຄວາມຮູ້ຕໍ່າ.

ເຖິງຢ່າງໃດກໍຕາມ ປັດຈຸບັນນີ້ ຣັຖບານ ໄດ້ມີລະບົບ ການສຶກສາ ຂັ້ນພື້ນຖານ ຢ່າງທົ່ວເຖິງ ແຕ່ສ່ວນຫລາຍແລ້ວ ຜູ້ທີ່ທຸກຍາກ ຂາດເຂີນ ຍັງບໍ່ໄດ້ຮັບ ການສຶກສາຂັ້ນພື້ນຖານ ຢ່າງກວ້າງຂວາງເທື່ອ ຍ້ອນຖານະ ທາງເສຖກິດ ແລະ ສັງຄົມຂອງຄອບຄົວ. ເມື່ອໄປເປັນລູກຈ້າງ ແບບຄົນ ບໍ່ຮູ້ໜັງສື ຫລືເປັນຄົນທີ່ມີ ຄວາມຮູ້ຕໍ່າ ຈື່ງຖືກນາຍຈ້າງ ຂູດຮີດກົດຂີ່ຂົ່ມເຫັງ ໃນຫລາຍໆ ກໍຣະນີ ບໍ່ວ່າຈະຢູ່ ພາຍໃນ ແລະຕ່າງປະເທດ.