ການຊ່ວຍເຫຼືອສຸຂພາບ ແມ່ແລະເດັກໃນລາວ

ກອງທຶນ ເພື່ອພົລເມືອງ ຂອງ ສະຫະ ປະຊາຊາດ ມີແຜນ ຈະຊ່ວຍຫລຸດຜ່ອນ ອັດຕຣາ ການເສັຍຊີວິດ ຂອງແມ່ແລະເດັກ ຢູ່ສປປ ລາວ ບໍ່ທໍ່ນັ້ນ ກອງທຶນເພື່ອ ພົລເມືອງ ຍັງຈະຊ່ວຍ ຝຶກອົບຮົມ ພວກ ເຍົາວະຊົນ ແລະ ຍຸວະຊົນ ໃນລາວ ໃຫ້ມີບົດບາດ ໃນສັງຄົມ ຫລາຍຂື້ນ. ອີກຢ່າງນຶ່ງ ກອງທຶນເພື່ອ ພົລເມືອງ ຂອງ ສະຫະປະຊາຊາດ ຍັງຈະຊ່ວຍ ເຈົ້າໜ້າທີ່ ທາງການລາວ ເພື່ອສຳຣວດ ພົລເມືອງລາວ ພາຍໃນ ປີ 2014.

ດຣ. Esther Muia ຜູ້ຕາງໜ້າ ກອງທຶນ ເພື່ອ ພົລເມືອງ ສະຫະປະຊາດ ຕົກລົງໃຫ້ ການຊ່ວຍເຫລືອ ເຫລົ່ານີ້ແກ່ ສປປລາວ ໃນເວລາ ທ່ານພົບ ປະຫາລືກັບ ຍານາງ ປານີ ຍາທໍ່ຕູ້ ປະທານ ສະພາ ແຫ່ງຊາດ ລາວ ເມື່ອສັປດາ ທີ່ຜ່ານມາ. ໃນໂອກາດນີ້ ຍານາງ ປານີ ຍາທໍ່ຕູ້ ໄດ້ກ່າວຂອບໃຈ ກອງທຶນ ພົລເມືອງ ຂອງ ສະຫະ ປະຊາຊາດ ທີ່ໄດ້ໃຫ້ ການຊ່ວຍເຫລືອ ແກ່ສປປລາວ ຕລອດມາ ແລະ ທີ່ຈະໃຫ້ ການຊ່ວຍ ເຫລືອ ຕື່ມອີກ ໃນອານາຄົດ.

ສປປລາວ ເປັນປະເທດນຶ່ງ ທີ່ຍັງມີ ອັຕຣາ ການເສັຍ ຊີວິດຂອງ ແມ່ແລະເດັກ ສູງທີ່ສຸດ ປະເທດນຶ່ງ ໃນເອເຊັຍ ຣັຖບານລາວ ໄດ້ຮ່ວມມືກັບ ສະຫະ ປະຊາຊາດ ວາງເປົ້າໝາຍ ສະຫະສວັດ ໃໝ່ ວ່າຈະຫລຸດ ອັດຕຣາ ການເສັຍ ຊີວິດ ຂອງ ແມ່ແລະເດັກ ນີ້ລົງໃຫ້ໄດ້ ເຄິ່ງນຶ່ງ ພາຍໃນປີ 2015 ແຕ່ຈົນເຖິງ ປັດຈຸບັນ ປະກົດວ່າ ປະເທດລາວ ຍັງບໍ່ ສາມາດ ປະຕິບັດ ໄດ້ເຄິ່ງນຶ່ງ ຂອງເປົ້າໝາຍ ນັ້ນເລີຍ.

ອົງການ ແລະ ຣັຖບານ ຕ່າງປະເທດ ກຳລັງໃຫ້ ການຊ່ວຍເຫລືອ ແກ່ລາວ ໃນຫລາຍໆດ້ານ ເພື່ອປັບປຸງ ຣະບົບ ການຮັກສາ ສຸຂພາບ ໃຫ້ດີຂື້ນ ໂດຍສະເພາະ ສຸຂພາບ ຂອງແມ່ ແລະເດັກນ້ອຍ. ທະນາຄານ ພັທນາ ເອເຊັຍ ໃຫ້ເງິນ ຊ່ວຍເຫລືອ ຫລາຍສິບລ້ານ ດອນລ່າ ສະຫະຣັຖ ເພື່ອສ້າງ ສຸຂສາລາ ສ້າງຣະບົບ ນ້ຳສະອາດ ແລະ ຫ້ອງນໍ້າ ໃຫ້ແກ່ ຊາວລາວ ໃນເຂດ ຊົນນະບົດ ແລະ ເຂດສອກຫລີກ ຫ່າງໄກ.