ສະຫະປະຊາຊາດ ເປັນຫ່ວງຊົນກຸ່ມນ້ອຍ

ຖແລງການ ດັ່ງກ່າວ ຣະບຸວ່າ ສປປລາວ ຍັງຂາດ ຂໍ້ຄວາມກ່ຽວກັບ ການປົກປ້ອງ ການດູຖູກ ດູຫມີ່ນ ເຊື້ອຊາດ ເຜົ່າພັນ ໃນກົດຫມາຍ ລາວ. ອົງການ ສະຫະປະຊາຊາດ ເປັນຫ່ວງທີ່ວ່າ ສປປລາວ ຍັງບໍ່ໄດ້ ເລີ້ມບາດກ້າວ ທ່ີ່ສຳຄັນ ທາງດ້ານ ກົດຫມາຍ ໃນການປົກປ້ອງ ສິດເສຣິພາບ ຂອງ ປະຊາຊົນ ຊາວເຜົ່າ ໃນລາວ ອົງການ ດັ່ງກ່າວ ບອກວ່າ ໃນປັດຈຸບັນ ປະຊາຊົນ ຊາວເຜົ່າ ໃນລາວ ຍັງປະສົບກັບ ການດູຖູກ ດູຫມີ່ນ ທາງດ້ານ ສາສນາ ຫລາຍຢູ່ ຈື່ງຢາກຮຽກຮອ້ງ ໃຫ້ ຣັຖບານລາວ ປົກປ້ອງ ສິດທິ ການນັບຖື ສາສນາ ຂອງພວກຂະເຈົ້າ ຢ່າງເສຣີ ປາສຈາກ ການຈັບກຸມ ແລະ ດູຖູຸກດູຫມີ່ນ ພວກຂະເຈົ້າ.

ຍານາງ Debbie Stothard ຮອງຫົວຫນ້າ ອົງການ ສິດທິ ມະນຸດສາກົນ ກ່າວວ່າ ຊົນເຜົ່າໃນລາວ ຍັງຂາດສິດທິ ພື້ນຖານ ປະເພດຕ່າງໆ ແລະ ການບໍ່ສເມີພາບ ທາງດ້ານ ກົດຫມາຍ ເປັນບັນຫາໃຫຍ່ ກ່ຽວກັບ ສະຖານະການ ທາງດ້ານ ສິດທິມະນຸດ ໃນລາວ. ທາງການລາວ ຄວບຄຸມ ສິດທິ ດັ່ງກ່າວ ຢ່າງເດັດຂາດ ປາສຈາກ ການອະນຸຍາດ ໃຫ້ກຸ່ມ ເອກຣາດ ເຂົ້າມາພົວພັນ ແລະ ເປັນປາກສຽງ ໃຫ້ແກ່ຂະເຈົ້າ.

ອົງການ ສະຫະປະຊາຊາດ ຍັງໄດ້ ຮຽກຮ້ອງໃຫ້ ເບີ່ງແຍງ ຊາວມົ້ງ ຜູ້ທີ່ໄດ້ ກັບຄືນມາ ຈາກໄທ ທີ່ຍັງຖືກ ນາບຂູ່ ຈາກຫລາຍພາກສ່ວນ ໃນລາວຢູ່ ດ້ວຍການ ສືບສວນ ພືດຕິກັມ ຄວາມວຸ້ນວາຍ ທີ່ເກີດກັບ ຊາວມົ້ງ ເພື່ອຄ້ຳປະກັນ ຄວາມປອດພັຍ ໃຫ້ແກ່ຂະເຈົ້າ ໃນເວລາ ກັບຄືນມາລາວ.