ບາງຄອບຄົວບໍ່ຢາກໜີ ຈາກບຶງທາຕຫຼວງ

ພື້ນທີ່ເຂດ ບຶງທາດຫລວງ ນະຄອນຫລວງ ວຽງຈັນ ຊຶ່ງທາງ ການລາວ ອະນຸມັດ ໃຫ້ຈີນ ສ້າງເປັນເຂດ ເສຖກິດສະເພາະ ຕາມຄໍາໝັ້ນ ສັນຍາ ທີ່ໄດ້ໃຫ້ໄວ້ ກັບຈີນ ຄາວທີ່ຈີນ ຊ່ວຍສ້າງ ສນາມກິລາ ແຫ່ງຊາດໃໝ່ ໃຫ້ເມື່ອປີ 2010 ນັ້ນມີຊາວບ້ານ ບໍ່ຢາກຍ້າຍ ຈາກທີ່ຢູ່ອາໄສ ຂອງພວກຕົນ ຍ້ອນເປັນຫ່ວງນໍາ ບ່ອນທໍາມາ ຫາກິນ ໃນຖິ່ນຖານ ບ້ານໃໝ່. ມີຊາວບ້ານ ດອນກອຍ ເມືອງສີສັຕນາກ ນະຄອນຫລວງ ວຽງຈັນ ທີ່ຕ້ອງໄດ້ ຍ້າຍອອກ ເວົ້າວ່າ:

"ປະຊາຊົນ ທີ່ວ່າຢູ່ມາ ແຕ່ນານ ມາແຕ່ພໍ່ແມ່ ມາຢູ່ ກາງບຶງຫັ້ນນະ ຈະບໍ່ພໍໃຈ ເພາະວ່າພວກ ນັ້ນມັນໄປແລ້ວ ບໍ່ມີບ່ອນ ໄປຫາກິນ ມັນໄກ ສົມມຸດວ່າ ໄປຢູ່ທາງເຂດນອກ ຊານເມືອງ ເຂົາບໍ່ເຄີຍ ໄປຢູ່ ເຂົາກໍບໍ່ຢາກ ໄປ".

ການທີ່ ທາງການລາວ ເອົາທີ່ດິນ ຂອງ ປະຊາຊົນ ໃຫ້ຈີນມາລົງທຶນ ສ້າງເປັນເຂດ ເພື່ອຜົນປະໂຫຍດ ຂອງຈີນນັ້ນ ສ້າງຄວາມ ເດືອດຮ້ອນໃຫ້ ປະຊາຊົນ ເຮັດໃຫ້ ປະຊາຊົນ ບໍ່ພໍໃຈ ເຖິງແມ່ນວ່າ ຈະມີການ ຊົດເຊີຍ ສ່ວນໃດສ່ວນນຶ່ງ ກໍຕາມ.

ໂຄງການພັທນາ ຂອງຈີນ ຢູ່ບຶງທາດຫລວງ ເທື່ອນີ້ ເປັນໂຄງການ ທີ່ນ້ອຍກວ່າ ໂຄງການເມື່ອ 2 ປີກ່ອນ ຄືມີເນື້ອທີ່ 365 ເຮັກຕາ ບໍ່ເຖິງ 1,000 ເຮັກຕາຄື ເມື່ອກ່ອນ. ແຕ່ເຖິງຢ່າງໃດ ກໍຕາມ ໂຄງການນີ້ ກໍກວມ ເອົາ 6 ໝູ່ບ້ານ ໃນເຂດເມືອງ ໄຊເສດຖາ ແລະ ເມືອງສີສັຕນາກ.