ຍຸງໂຕຜູ້ປາບໂຕແມ່ ບໍ່ໃຫ້ເພາະພັນໄດ້

ພຍາດໄຂ້ປ່າ ມາເລເຣັຍ ແພ່ ໄປຫາຄົນ ຍ້ອນຍຸງ ໂຕແມ່ ທີ່ດູດເລືອດ ເພື່ອນໍາໄປ ລ້ຽງລູກນ້ອຍ, ແຕ່ນັກ ວິທຍາສາດ ອັງກິດ ກ່າວໃນມື້ ວັນຈັນ ທີ 8 ສິງຫາ 2011 ນີ້ ວ່າການປ່ອຍ ຍຸງໂຕຜູ້ ທີ່ບໍ່ມີ ນໍ້າເຊື້ອ ປະສົມພັນ ອອກໄປ ສົມສູ່ ກັບຍຸງໂຕແມ່ ອາຈປ້ອງກັນ ການແພ່ຜາຍ ພຍາດ ໄຂ້ປ່າ ໄດ້.

ນັກວິທຍາສາດ ອັງກິດ ຈາກສູນ ຄົ້ນຄວ້າ Imperial College London ກ່າວວ່າ ການຜລິດ ຍຸງໂຕຜູ້ ທີ່ບໍ່ມີ ນໍ້າເຊື້ອ ສໍາລັບ ປະສົມພັນ, ເຖິງຈະຍັງ ສົມສູ່ກັນໄດ້ ແຕ່ຈະ ບໍ່ມີໄຂ່ ທີ່ສາມາດ ເພາະພັນ ອອກມາ ເປັນ ທັກແທ່ ແລະ ກາຍເປັນ ໂຕຍຸງ ໄດ້.
ຍຸງໂຕແມ່ ເປັນໂຕ ແພ່ຂຍາຍ ເຊຶື້ອ ໂຣຄ ແລະ ມາເລເຣັຍ ໃນ ທະວີບ ອາຝຣິກກາ ແລະ ໃນບ່ອນອື່ນໆ. ຍຸງ ສົມສູ່ກັນ ເທື່ອດຽວ ໃນຊີວິດ ຂອງມັນ, ການຄົ້ນພົບ ດັ່ງກ່າວ ມີຄວາມໝາຍ ສໍາຄັນ ໃນການ ປ້ອງກັນ ພຍາດ ທີ່ຂ້າຄົນ ປະມານ 8 ແສນ ຄົນ ຕໍ່ປີ.

ຜູ້ນໍາ ໃນການ ຄົ້ນຄວ້າ ຈາກ ສະຖາບັນ ຄົ້ນຄວ້າ ວິທຍາສາດ ແຫ່ງຊາດ ດຣ. Flaminia Catteruccia ກ່າວວ່າ ການຄົ້ນຄວ້າ ພົບເຫັນ ຄັກແນ່ວ່າ ຍຸງໂຕແມ່ ບໍ່ສາມາດ ຮູ້ວ່າຍຸງ ໂຕຜູ້ ມີເຊື້ອ ທີ່ຜລິດ ລູກໄດ້ ຫລືບໍ່.

ນັກວິທຍາສາດ ເຮັດໃຫ້ຍຸງ ໂຕຜູ້ ເປັນໝັນ ໂດຍການ ສັກຢາໃສ່ ກີດກັນບໍ່ໃຫ້ ໂຕຜູ້ມີເຊື້ອ ປະສົມພັນ ແຕ່ຈະບໍ່ ກະທົບ ກະເທືອນ ການສົມສູ່ ທາງເພດ ຂອງມັນ. ເມື່ອ ສັງເກດການ ໃນຫ້ອງ ທົດລອງ ກໍພົບວ່າ ຍຸງໂຕຜູ້ ແລະ ໂຕແມ່ ຍັງ ປະສົມພັນ ໄດ້ຕາມ ປົກກະຕິ ແຕ່ຈະບໍ່ ມີການ ອອກແມ່ ແພ່ລູກ ໄດ້ເທົ່ານັ້ນ.