ຄົນລາວຕ້ອງການມີສ່ວນ ພັທນາປະເທດຊາດ

ຄົນລາວ ຍຸກໃໝ່ ສ່ວນຫລາຍແລ້ວ ຕ້ອງການ ໃຫ້ມີການ ປົກຄອງ ປະເທດ ແບບ ປະຊາທິປະໄຕ ໂດຍໃຫ້ ປະຊາຊົນ ລາວ ມີສ່ວນຮ່ວມ ໃນການພັທນາ ປະເທດ ແທນທີ່ຈະເຮັດ ໄປຕາມແນວຄິດ ຂອງ ຣັຖບານ ຍ້ອນວ່າມີ ພຽງພັກດຽວ ແລະ ສັ່ງການ ແບບເດັດຂາດ ຈຶ່ງເຮັດໃຫ້ ຊາວລາວ ໃນຍຸກໃໝ່ ເລີ້ມບໍ່ມັກ ໃນການຈຳກັດ ສິທເສຣີພາບ ຂອງພວກຕົນ:

“ຖ້າປະຊາຊົນ ໄດ້ມີສ່ວນຮ່ວມ ຄວາມຄິດ ຄວາມເຫັນ ກໍດີ ເພາະວ່າ ທຸກມື້ນີ້ ປະຊາຊົນ ບໍ່ມີສຽງ ຫຍັງເລີຍ ພັກເພິ່ນ ຊີ້ໄປທາງໃດ ກໍໄປນຳເພິ່ນ ເພິ່ນກໍແກ້ໄຂ ໄປຕາມປະສາ ເພິ່ນຫັ້ນແຫລະ ແຕ່ເຮົາ ກໍບໍ່ຮູ້ ເຮົາບໍ່ໄດ້ ມີເວລາສົນໃຈ ນຳເພິ່ນ ຂ້ອຍກໍທຳມາ ຫາກິນ ເພິ່ງຕົນເອງ ທຸກມື້ນີ້.”

ຊາວລາວຜູ້ນີ້ ເວົ້າຕໍ່ໄປວ່າ ຄົນລາວແຕ່ກ່ອນ ສ່ວນຫລາຍ ຣະດັບ ການສຶກສາ ບໍ່ຄ່ອຍສູງ ເຮັດໃຫ້ບໍ່ມີ ຄວາມຮູ້ ພໍທີ່ຈະເປັນ ຕົວຂອງ ຕົວເອງ ຫາກທາງຣັຖ ສັ່ງຫຍັງລົງມາ ກໍຕ້ອງ ປະຕິບັດ ຕາມ ເນື່ອງຈາກບໍ່ ສາມາດ ໂຕ້ຖຽງໄດ້ ແຕ່ຄົນລາວ ດຽວນີ້ ຜູ້ຮຽນສູງ ກໍມີຫລາຍ ແຕ່ກໍບໍ່ ສາມາດນຳ ຄວາມຮູ້ ຂອງຕົນ ມາພັທນາ ປະເທດຊາຕໄດ້ ຫາກມີ ຄວາມຄິດ ຂັດກັບ ນະໂຍບາຍ ຂອງ ຣັຖບານ.

ໃນຂະນະ ດຽວກັນ ຄົນລາວ ອີກຜູ້ນຶ່ງ ຊ້ຳພັດເວົ້າວ່າ ການປົກຄອງ ແບບພັກດຽວ ທີ່ມີຢູ່ ໃນລາວ ຖືວ່າດີ ຢູ່ແລ້ວ ເນື່ອງຈາກວ່າ ການຕັດສິນໃຈ ເຣື້ອງຕ່າງໆ ໃນພັກໂທນ ຈະບໍ່ມີ ບັນຫາ ຂັດແຍ້ງກັນ ເກີດຂຶ້ນ:

“ມັນກໍດີ ແບບທີ່ວ່າ ມີພັກດຽວ ຣັຖດຽວ ມັນມີພຽງ ພັກດຽວ ບໍ່ມີການ ຂັດແຍ້ງຫຍັງ ກໍຖືວ່າດີ ເພິ່ນປົກຄອງ ແບບນີ້ກໍດີ ເພິ່ນກໍໃຫ້ ໂອກາດ ປະຊາຊົນ ມີການ ໄດ້ເວົ້າ ໄດ້ເຮັດ ໄດ້ທຳ ຈັ່ງຊີ້ມັນ ກໍຖືວ່າ ດີຢູ່.”

ເພາະສະນັ້ນ ເຖິງວ່າການ ປົກຄອງ ໃນລາວ ຈະເປັນແບບ ພັກການ ເມືອງດຽວ ເປັນຜູ້ຊີ້ ນຳປະເທດ ຊຶ່ງການ ປົກຄອງແບບ ດັ່ງກ່າວ ກໍຍັງມີຄົນ ຈຳນວນນຶ່ງ ເຫັນພ້ອມ ແລະ ຊາວລາວ ອີກຈຳນວນນຶ່ງ ທີ່ບໍ່ເຫັນ ພ້ອມ ເນື່ອງຈາກ ທັສນະຄະຕິ ຕ່າງກັນ ແຕ່ບໍ່ວ່າ ເປັນການ ປົກຄອງ ແບບໃດ ຊາວລາວ ສ່ວນຫລາຍ ກໍຕ້ອງການ ໃຫ້ ສປປລາວ ຫລຸດພົ້ນ ຈາກການເປັນ ປະເທດ ດ້ອຍພັທນາ ໃຫ້ໄວທີ່ສຸດ.