ແມ່ນໍ້າຂອງບົກແຫ້ງ

ຜູ້ຊ່ຽວຊານ ດ້ານ ຊັພຍາກອນນ້ຳ ສປປລາວ ຖແລງວ່າ ປັດຈຸບັນ ນ້ຳຂອງ ໃນເຂດ ນະຄອນຫລວງ ວຽງຈັນ ໄດ້ບົກລົງ ຢ່າງຜິດ ປົກກະຕິ  ທີ່ບໍ່ເຄີຍ ມີມາກອ່ນ ຄາດວ່າ ຈະມີອາກາດ ຮ້ອນຈັດ ໃນຣະດູແລ້ງ ປີນີ້ ອາດເປັນຍ້ອນ ການກັກນ້ຳ ໃນເຂື່ອນ ຂອງຈີນ. ດັ່ງຜູ້ຊ່ຽວຊານ ກ່າວວ່າ:

"ເຂື່ອນຈີນ ມັນກໍຕ້ອງ ມີສ່ວນ ເພາະວ່າເຂື່ອນຈີນ ເຂົາກໍ ກັກນ້ຳ ບໍ່ທັນເຕັມ ຜິດປົກກະຕິ ປີນີ້ ມັນກໍບໍ່ທໍ່ ປີກາຍ ຢ່າງນ້ອຍຕ້ອງ ໄດ້ລໍເບີ່ງ ຕອນເດືອນ 5 ແຫລະ".

ທ່ານກ່າວ ຕໍ່ໄປວ່າ ການທີ່ ນ້ຳບົກແຫ້ງ ຢ່າງຫລວງຫລາຍນັ້ນ ຈະສົ່ງ ຜົລກະທົບ ຕໍ່ການຂົນສົ່ງ ສີນຄ້າ ທາງເຮືອ ມາຍັງ ນະຄອນຫລວງ ວຽງຈັນ ນອກຈາກນັ້ນ ຈຳພວກ ພັນປາ ກໍຈະສູນ ຫາຍໄປ ເພາະແຫລ່ງ ທີ່ຢູ່ອາສັຍ ຖືກທຳລາຍ ຍ້ອນນ້ຳບົກ. ເຫດການ ດັ່ງກ່າວ ອາດຈະເປັນ ເພາະເຂື່ອນ ໄຟຟ້າ ຂອງຈີນ ຫລືການ ສ້າງເຂື່ອນ ຕາມແມ່ນ້ຳ ສາຂາ ຫລາຍເກີນໄປ ໃນລາວ.

ທ່ານວ່າ ໃນປັດຈຸບັນ ນ້ຳຂອງ ໃນບໍຣິເວນ ນະຄອນຫລວງ ວຽງຈັນ ບົກແຫ້ງ ຈົນເຫັນດອນຊາຍ ພົ້ນຂື້ນ ໃນຫລາຍຈຸດ ສາມາດຍ່າງ ຂ້າມໄປມາ ຫາກັນໄດ້ ແລະວ່າ ຫາກຣະດັບ ນ້ຳຂອງ ຍັງບົກແຫ້ງ ຕໍ່ໄປອີກ ອາດສົ່ງ ຜົລກະທົບ ຕໍ່ຜົລປູກ ທີ່ປ້ອນ ຕລາດ ນະຄອນຫລວງ ວຽງຈັນ.