ວຽດນາມແລະລາວ ຈະແກ້ບັນຫາຄົນເຖື່ອນ

ສອງປະເທດ ຕົກລົງ ເພິ້ມການ ຮ່ວມມື ດັ່ງກ່າວ ໃນເວລາ ທີ່ ຍານາງ ອ່ອນຈັນ ທັມມະວົງ ຣັຖມົນຕຣີ ກະຊວງ ແຮງງານ ແລະ ສວັດດີການ ຂອງລາວ ແລະ ຍານາງ ຫງຽນ ທິກິມຫງັນ ຣັຖມົນຕຣີ ກະຊວງ ແຮງງານ ຂອງ ວຽດນາມ ໄດ້ພົບປະ ຫາລືກັນ ຢູ່ແຂວງ ຊຽງຂວາງ ເມື່ອວັນ ອັງຄານ ຜ່ານມາ.

ຍານາງ ອ່ອນຈັນ ທັມມະວົງ ກ່າວວ່າ ການພົບປະ ຫາລືກັນ ເທື່ອນີ້ ເປັນໂອກາດ ທີ່ດີ ທີ່ສອງຝ່າຍ ໄດ້ແລກປ່ຽນ ປະສົພການ ຊຶ່ງກັນ ແລະກັນ ກ່ຽວກັບ ບັນຫາ ແຮງງານ ແລະ ຄົນງານ ຣະຫວ່າງ ສອງ ປະເທດ. ທັງສອງຝ່າຍ ໄດ້ສຶກສາ ຫາວິທີ ປັບປຸງ ການຄວບຄຸມ ແລະ ບໍຣິຫານ ແຮງງານ ເພື່ອສົ່ງເສີມ ການລົງທຶນ ແລະ ການເຮັດ ທຸຣະກິດ ໃຫ້ຂຍາຍ ຕົວ. ສ່ວນຍານາງ ຫງຽນ ທິກິມຫງັ່ນ ກ່າວວ່າ ການປະຊຸມ ກັນເທື່ອ ນີ້ ສະແດງ ໃຫ້ເຫັນວ່າ ວຽດນາມ ແລະ ສປປລາວ ມີການ ຮ່ວມມືກັນ ທາງດ້ານ ແຮງງານ ແໜ້ນແຟ້ນ ຂື້ນ.

ເມື່ອຕົ້ນປີນີ້ ທາງການ ລາວ ເປີດເຜີຍວ່າ ຢູ່ລາວ ມີຄົນງານ ຕ່າງດ້າວ ທັງໝົດ ກວ່າສອງ ແສນຄົນ ສ່ວນຫລາຍ ເປັນຄົນງານ ຜິດກົດໝາຍ ແລະ ກໍເປັນຄົນ ວຽດນາມ ຫລື ຈີນ. ເມື່ອບໍ່ດົນ ຜ່ານມາ ທາງການລາວ ປະກາດວ່າ ຈະພຍາຍາມ ແກ້ໄຂ ບັນຫາ ຄົນງານ ຕ່າງດ້າວ ຜິດກົດໝາຍ ນີ້ ຢ່າງຈິງຈັງ. ໃນແຕ່ລະປີ ວຽດນາມ ສົ່ງຄົນງານ ໄປເຮັດວຽກ ຢ່າງຖືກຕ້ອງ ຕາມກົດໝາຍ ຢູ່ລາວ ຫລາຍພັນຄົນ ຕໍ່ປີ; ນອກຈາກນັ້ນ ຊາວວຽດນາມ ອີກຫລາຍ ພັນຄົນ ກໍເຂົ້າໄປ ທຳມາ ຫາກິນ ຢູ່ລາວ ຢ່າງບໍ່ ຖືກຕ້ອງ ໄດ້ຢ່າງ ສະດວກ ສະບາຍ.