ທຸກຫ້ອງການທີ່ດິນ ຕ້ອງເຂັ້ມງວດໃນໜ້າທີ່

ອົງກາຣ ທີ່ດິນ ຍອມຮັບ ວ່າ ມີ ນັກລົງທຶນ ຈໍານວນໜຶ່ງ ໄດ້ ສວຍໂອກາສ ເຂົ້າມາ ນໍາໃຊ້ ຮູບແບບ ຮ່າງ ບົດວິພາກ ເສຖກິຈ ເພື່ອໃຫ້ ວຽກງານ ກາຣ ປະກອບ ເອກກະສາຣ ງ່າຍຂຶ້ນ ແລະ ຫລັງຈາກນັ້ນ ກໍເຣີ່ມ ລົງມື ປະຕິບັຕ ໂດຽບໍ່ໄດ້ ຜ່ານກາຣ ກວດກາ ຂອງ ແຂນງກາຣ ກ່ຽວຂ້ອງ ດັ່ງ ຈະເຫັນໄດ້ ຈາກ ບາງເຂຕ ທີ່ມີ ກາຣຂຸດຄົ້ນ ຊັພຍາກອນ ທັມມະຊາຕ ຕັດໄມ້ຂາຍ ຫຼືຈັບຈອງ ທີ່ດິນ ແບບບໍ່ມີ ກາຣສືບຕໍ່ ກາຣພັທນາ ພ້ອມຍັງ ມີກາຣ ບຸກຣຸກ ທີ່ດິນ ແລະ ປ່າໄມ້ ຂອງ ຣັຖ ເພື່ອຫັນມາ ເປັນບ່ອນ ປູກໄມ້ ອຸຕສາຫະກັມ ຕ່າງໆ.

ເພື່ອແກ້ໄຂ ບັນຫາ ດັ່ງກ່າວ ນີ້ ທາງ ອົງກາຣ ຄຸ້ມຄອງ ທີ່ດິນ ຈຶ່ງໄດ້ເນັ້ນ ໃຫ້ທຸກ ພາຄສ່ວນ ກ່ຽວຂ້ອງ ໄດ້ເອົາ ໃຈໃສ່ ປະຕິບັຕ ຕາມ ຣະບຽບ ກົດໝາຍ ຢ່າງເຂັ້ມງວດ ໂດຽສະເພາະ ກໍຕ້ອງ ໃຫ້ມີ ການຮຽກທວງ ໃຫ້ ບັນດາ ນັກລົງທຶນ ຕ້ອງ ເສັຽຄ່າ ສັມປະທານ ໂດຽທົ່ວໄປ ບໍ່ວ່າ ຈະເປັນ ພາກສ່ວນ ນັກລົງທຶນ ພາຍໃນ ຫລື ຕ່່າງປະເທສ ທຸກໆ ບໍຣິສັທ ທີ່ໄດ້ຮັບ ອະນຸຍາຕ ໃຫ້ເຮັດ ທຸຣະກິຈ ຢູ່ໃນ ສປປລາວ ທັ້ງໝົດ.

ຢ່າງໃດ ກໍຕາມ ທາງ ອົງກາຣ ຄຸ້ມຄອງ ທີ່ດິນ ຍັງຈະໄດ້ ເອົາ ມາຕກາຣ ເຣື່ອງກວດກາ ໃນບັນດາ ພນັກງານ ພັກ-ຣັຖ ຊຶ່ງ ກໍຮວມທັງ ເຈົ້າໜ້າທີ່ ທະຫາຣ ຕຳຣວຈ ໂດຽສະເພາະ ຜູ້ທີ່ມີ ຕຳແໜ່ງ ຫລື ຜູ້ທີ່ເຮັດ ວຽກງານ ກ່ຽວພັນ ກັບແຂນງ ທີ່ມີ ຣາຍຮັບ ຢ່າງໃກ້ຊິດ ແລະ ຈະຕ້ອງເອົາ ມາຕກາຣ ປາບປາມ ກຳຈັດ ບັນຫາ ກາຣສໍ້ຣາສ ບັງຫລວງ ໃຫ້ໝົດສິ້ນ ໄປ.