ແມ່ຄວນລ້ຽງລູກນ້ອຍ ດ້ວຍນົມຕົນເອງ

ກະຊວງ ສາທາຣະນະສຸຂ ສົ່ງເສີມ ໃຫ້ແມ່ຍິງລາວ ລ້ຽງລູກດ້ວຍນົມແມ່ ແທນນົມຜົງ ເພາະນົມແມ່ ຈະເຮັດໃຫ້ ເດັກນ້ອຍເກີດໃໝ່ ມີສຸຂພາບ ແຂງແຮງ, ໂດຍສະເພາະ ຕັ້ງແຕ່ເລີ້ມເກີດ ຈົນເຖີງ 6 ເດືອນ. ເຈົ້າໜ້າທີ່ ສູນການແພດ ກະຊວງ ສາທາຣະນະສຸຂ ເວົ້າວ່າ:

"ທາງພວກເຮົາ ຈະລົງໄປເຜີຽແພ່ ໂຄສະນາ ແລ້ວກໍມີລາຍການ ອອກວິທຍຸ ໂທຣະພາບ ຈະໃຫ້ຄວາມຮູ້ ການລ້ຽງດູດ້ວຍນົມແມ່ ແກ່ປະຊາຊົນ ກຸ່ມເປົ້າໝາຍ".

ທ່ານວ່າການ ປຸກຣະດົມໃຫ້ແມ່ຍິງ ລ້ຽງລູກດ້ວຍນົມ ຂອງຕົນເອງນີ້ ທາງກະຊວງຈະເລີ້ມ ຈາກເອົາເຈົ້າໜ້າທີ່ ສາທາຣະນະສຸຂ ໃນແຕ່ລະແຂວງ ມາຝືກອົບຮົມ ເຣື້ອງການໃຫ້ ຄວາມຮູ້ ການເບິ່ງແຍງ ສຸຂພາບ ການປ້ອງກັນພຍາດ ການກິນອາຫານ ຕາມຫລັກ ໂພຊນາການ.

ການສໍາຣວດ ຂອງທາງການແພດ ເມື່ອບໍ່ນານມານີ້ວ່າ ຜູ້ຍິງລາວ ໃນເຂດຊົນນະບົດ ທີ່ລ້ຽງລູກດ້ວຍນົມ ຂອງຕົນເອງ ສ່ວນມາກຍັງບໍ່ທັນມີ ຄວາມຮູ້ດີ ກ່ຽວກັບ ການລ້ຽງລູກ ດ້ວຍນົມຕົນເອງ. ໃນເວລາ ຖືພາລູກ ກໍບໍ່ຮູ້ວ່າຈະ ຮັກສາສຸຂພາບ ຂອງຕົນແບບໃດ ຫລືວ່າຈະກິນ ອາຫານປະເພດໃດ ທີ່ຈະຊ່ວຍໃຫ້ ລູກໃນທ້ອງ ໄດ້ຮັບອາຫານ ທີ່ມີທາດບໍາຣຸງ ຮ່າງກາຍ.

ໃນເວລາຢູ່ກັມ ກໍຍິ່ງກິນແຕ່ ນໍ້າຮ້ອນ ນໍ້່າຮາກໄມ້ ກິນເຂົ້າກັບເກືອ ຂະລໍາອາຫານ ຫລາຍສິ່ງຫລາຍຢ່າງ ຮ່າງກາຍ ກໍບໍ່ສາມາດ ຜລິດນໍ້ານົມ ໃຫ້ລູກກິນ ໄດ້ພຽງພໍ.