ໂຈະທາງຣົດໄຟໄວ້ ເພື່ອສ້າງສາງເກັບສິນຄ້າ

ຫລັງຈາກ ມີການເປີດໃຊ້ ເສັ້ນທາງ ຣົຖໄຟ ລາວ-ໄທ ຈາກຫນອງຄາຍ ຫາ ທ່ານາແລ້ງ ມາໄດ້ຊົ່ວ ຣະຍະນື່ງ ທາງການລາວ ກໍມີແຜນ ການຈະຂຍາຍ ເສັ້ນທາງ ຣົຖໄຟ ຣະຍະສອງ ທີ່ມີຄວາມຍາວ ປະມານ 9 ກິໂລແມັດ ຈາກທ່ານາແລ້ງ ຫາ ນະຄອນຫລວງ ວຽງຈັນ ແຕ່ໃນ ປັດຈຸບັນ ໄດ້ຖືກໂຈະ ໄວ້ແລ້ວ ແລະມາສ້າງ ກຸດັງໃສ່ ສີນຄ້າ ແທນ.

ທ່ານ ສົມຊນະ ຫົວຫນ້າ ຫ້ອງການ ສະຖານຣົຖໄຟ ທ່ານາແລ້ງ ໄດ້ກ່າວຕໍ່ ສື່ມວລຊົນ ໃນລະຍະ ຜ່ານມາວ່າ ສາງເກັບມ້ຽນ ສີນຄ້າ ດ່ັງກ່າວ ຈະຕັ້ງຢູ່ ຫ່າງຈາກ ສະຖານີ ຣົຖໄຟ ທ່ານາແລ້ງ ປະມານ 500 ແມັດ ໃນພື້ນທີ່ ປະມານ 400 ໄຮ່ ໂດຍຝ່າຍໄທ ໃຫ້ການ ຊ່ອຍເຫລືອລ້າ ໃນການສ້າງ ປະມານ 30% ສ່ວນເຫລືອ 70% ແມ່ນເປັນເງິນກູ້ ຄາດວ່າ ການສ້າງສາ ຈະເລີ້ມລົງມື ໃນໄວໆນີ້.

ເຫດຜົລ ໃນການໂຈະ ການຂຍາຍ ເສັ້ນທາງ ຣົຖໄຟ ດັ່ງກ່າວ ອາດເປັນ ເພາະວ່າ ໃນປັດຈຸບັນ ຍັງບໍ່ມີ ກຸດັງໃສ່ ສີນຄ້າ ໃນບໍຣິເວນ ດັ່ງກ່າວ ໂດຍສະເພາະ ສີນຄ້່າທີ່ ນຳເຂົ້າຈາກໄທ ຫລື ຈາກລາວ ໄປໄທ ໂດຍຜ່ານ ຂົວມິດຕພາບ ລາວ-ໄທ ທີ່ ແຂວງຫນອງຄາຍ ອີກເຫດຜົນນື່ງ ກໍເປັນເພາະວ່າ ເສັ້ນທາງຣົຖໄຟ ສາຍທຳອິດ ຈາກ ຫນອງຄາຍ ຫາ ທ່ານາແລ້່ງ ນັ້ນ ບໍ່ມີຜູ້ໃຊ້ ບໍຣິການຫລາຍ ເພາະຄົນ ສ່ວນໃຫຍ່ ໃຊ້ຣົຖ ສ່ວນຕົວ ເດີນທາງໄປໄທ ແລະສຸດທ້າຍ ກໍແມ່ນເພື່ອ ເຊື່ອມໂຍງກັບ ປະຊາຄົມ ອາຊ໊ຽນ ໃນການ ຂົນສີນຄ້າ ເຂົ້າ-ອອກ ຣະຫວ່າງ ປະເທດ.