ຜູ້ນໍາລາວວ່າງານສລອງ ໄດ້ຮັບຜົນສໍາເຣັດ

ຄນະຜູ້ນຳ ສປປລາວ ປະກາດວ່າ ການສລອງ ສະແດງເຖິງ ຜົນສຳເຣັດ ອັນໃຫຍ່ໂຕ ຂອງການນຳພາ ຂອງພັກ ປະຊາຊົນ ປະຕິວັດລາວ ແລະ ການເອົາໃຈໃສ່ ໃນການ ສ້າງສາພັທນາ ຂອງຣັຖບານ ສປປລາວ ດັ່ງເຈົ້າໜ້າທີ່ ກະຊວງ ການຕ່າງປະເທດ ສປປລາວ ທ່ານນຶ່ງ ເວົ້າວ່າ:

“ເພື່ອສລອງ ວັນ ດັ່ງກ່າວ ຫລາຍໂຄງການ ກໍໄດ້ຮັບຜົນ ສຳເຣັດແລ້ວ ແລະ ຫລາຍໂຄງການ ກໍຈະມີການ ດຳເນີນຕໍ່ໆໄປ; ການສລອງ ອັນນີ້ ເປັນພື້ນຖານ ແລະ ເປັນສິ່ງຊຸກຍູ້ ອັນນຶ່ງທີ່ ໃຫ້ພວກເຮົາ ສ້າງສາພັທນາ ເສຖກິດ ສັງຄົມ ຂອງປະເທດ ໃນຕອນໜ້າ.”

ແຕ່ທະນາຄານ ໂລກ ທະນາຄານ ພັທນາ ເອເຊັຍ ແລະ ອົງການ ຊ່ວຍເຫລືອ ຕ່າງປະເທດ ອື່ນໆເຫັນວ່າ ເຖິງວ່າ ພັກ ແລະ ຣັຖບານ ສປປລາວ ປົກຄອງ ແລະ ພຍາຍາມ ສ້າງສາພັທນາ ປະເທດມາເປັນ ເວລາ 35 ປີ ແລ້ວກໍຕາມ ແຕ່ປະເທດ ແລະ ປະຊາຊົນ ລາວ ສ່ວນຫລາຍ ຍັງທຸກຍາກ ຂາດເຂີນຢູ່. ປະຊາຊົນລາວ ເກືອບ 80 ສ່ວນຮ້ອຍ ຍັງເປັນ ຊາວໄຮ່ຊາວນາ ຊາວລາວເຖິງ 36 ສ່ວນຮ້ອຍ ຍັງຕົກຢູ່ໃຕ້ ເສັ້ນຄວາມທຸກຍາກ ຜູ້ນຶ່ງມີ ຣາຍໄດ້ພຽງ ແຕ່ປະມານ ນຶ່ງດອນລ່າ ສະຫະຣັຖ ຕໍ່ມື້.

ອັດຕຣາການ ເສັຍຊີວິດ ຂອງ ແມ່ຍັງສູງ ເຖິງ 600 ຄົນ ໃນຈຳນວນ ນຶ່ງແສນຄົນ; ເຊັ່ນດຽວກັນ ອັດຕຣາການ ເສັຍຊີວິດ ຂອງເດັກນ້ອຍ ກໍຍັງສູງເຖິງ 80 ຄົນ ຕໍ່ ເດັກນ້ອຍ ນຶ່ງພັນຄົນ; ເດັກນ້ອຍລາວ ເຖິງ 40 ສ່ວນຮ້ອຍ ຂາດເຂີນອາຫານ ທັງທາງດ້ານ ປະຣິມານ ແລະ ຄຸນນະພາບ. ການສຶກສາ ການຮັກສາ ສຸຂພາບ ແລະ ຖນົນຫົນທາງ ຍັງບໍ່ທົ່ວເຖິງ ປະຊາຊົນ ລາວ ຫລາຍຄົນ ໃນເຂດສອກຫລີກ ຫ່າງໄກ ບໍ່ໄດ້ຮຽນ ໜັງສື ບໍ່ໄດ້ຮັບ ການສຸຂພາບ ແລະ ໄກຈາກ ຄວາມຈະເຣີນ.