ເຈົ້າໜ້າທີ່ສືບສວນ ໃຊ້ສິດເກີນຄວນ

ທີ່ຜ່ານມາ ວຽກງານກ່ຽວກັບ ການສືບສວນ ແລະ ເອົາຂໍ້ມູນ ຈາກຜູ້ກະທຳຜິດ ເພື່ອດຳເນີນ ຄະດີຕ່າງໆ ນັ້ນປາກົດວ່າ ໄດ້ມີ ພະນັກງານ ທີ່ບໍ່ຣັບຜິດຊອບ ພຽງພໍ ແລະ ມີພະນັກງານ ບາງຄົນທີ່ໃຊ້ ອຳນາດ ເກີນຂອບເຂດ ທີ່ກົດໝາຍ ໄດ້ກຳນົດ ເອົາໄວ້. ດັ່ງເຈົ້າໜ້າທີ່ ຈາກກົມຄົ້ນຄວ້າ ຄຳຮ້ອງ ຂໍຄວາມເປັນທັມ ແລະ ບັນຫາຊາດ ຢູ່ໃນສະພາ ແຫ່ງຊາດ ນະຄອນຫລວງ ວຽງຈັນ ໄດ້ເວົ້າວ່າ:

"ເຈົ້າໜ້າທີ່ ໃນການສືບສວນ ສອບສວນ ເອົາຂໍ້ມູນ ນຳຜູ້ທີ່ມີ ການກະທຳຜິດ ເຫັນວ່າ ໃນລະຍະ ຜ່ານມານີ້ ການເກັບກຳ ການໃຊ້ມາຕການ ຫລືວິທີການ ເອົາຂໍ້ມູນນັ້ນ ເຈົ້າໜ້າທີ່ ບາງພາກສ່ວນ ບາງຈຳນວນ ບາງບຸກຄົນ ໃຊ້ພາລະບົດບາດ ຫລືມາຕການ ເກີນຂອບເຂດ ທີ່ກົດໝາຍ ໄດ້ກຳນົດໄວ້".

ເຈົ້າໜ້າທີ່ ເວົ້າຕໍ່ໄປວ່າ ການໃຊ້ອຳນາດ ເກີນຂອບເຂດ ທີ່ກົດໝາຍ ໄດ້ກຳນົດ ເອົາໄວ້ ຂອງເຈົ້າໜ້າທີ່ ຈຳນວນນຶ່ງ ໃນວຽກການ ສືບສວນນັ້ນ ຖືວ່າເປັນການ ລະເມີດສິດຖິ ຂອງພົລເມືອງ ແລະຍັງມີເຣື້ອງ ທີ່ພະນັກງານ ບາງຄົນບໍ່ມີ ຄວາມຮັບຜິດຊອບ ຈຶ່ງບໍ່ໄດ້ ຂໍ້ມູນຄົບຖ້ວນ ແລະເຮັດໃຫ້ ຄະດີຫລ້າຊ້າ. ບັນຫາ ທີ່ກ່າວມານັ້ນ ໄດ້ສົ່ງຜົນກະທົບ ຕໍ່ວຽກການຂອງ ອັຍການ ໃນການດຳເນີນ ຄະດີ ອີກດ້ວຍ.

ບັນຫາ ທີ່ເກີດຂຶ້ນນີ້ ທາງພາກສ່ວນ ກ່ຽວຂ້ອງ ຕ້ອງແກ້ໄຂ, ຍັບຍັ້ງ ແລະຄວນສຶກສາ ເພື່ອກວດກາຄືນ ແລະແກ້ໄຂ ໃນຂັ້ນຕອນຂອງ ກົດໝາຍ ເພື່ອໃຫ້ວຽກການ ສືບສວນ ສອດຄ່ອງກັບ ກົດໝາຍ ໄດ້ກຳນົດ ເອົາໄວ້.