ໂຮງໝໍຣະດັບສາກົນ ໃນລາວ

ເຄືອຂ່າຍ ສູນ ບໍຣິການ ການແພດ ທີ່ ທັນສມັຍ ຣະດັບ ສາກົນ ແຫ່ງ ທຳອິດ ຂອງຈີນ ໄດ້ເປິດຂື້ນ ທີ່ ນະຄອນຫລວງ ວຽງຈັນ ໃນມື້ ວັນ ອັງຄານ ເພື່ອ ປີ່ນປົວ ຄົນໄຂ້ ໃນ ຣະດັບ ສາກົນ.

ພິທີເປິດ ຢ່າງເປັນ ທາງການ ໄດ້ ຈັດຂື້ນ ໂດຍມີ ປະທານ ເຄືອຂ່າຍ ສູນ ບໍຣິການ ການແພດ ສາກົນ ທ່ານ ການໄຊ ກຽດສຣິດ ທານາກອນ ຜູ້ທັງເປັນ ປະທານ ກຸ່ມລົງທືນ ຈີບເຊັງ, ດຣ ປອນເມກ ດາຣາລອຍ ອະດີດ ຣັຖມົນຕຣີ ກະຊວງ ສາທາຣະນະສຸຂ, ເອກອັຄຣາຊທູດໄທ ປະຈຳລາວ ທ່ານ ວິດທະວັດ ສຣີວິໂຫກ ແລະ ຕົວແທນ ຈາກອົງການ ທີ່ກ່ຽວຂ້ອງ ຂອງ ຣັຖບານ ລາວ ແລະ ອົງການ ຕ່າງຊາດ ຫລາຍ ອົງການ.

ທ່ານ ການໄຊ ປະທານສູນ ບໍຣິການ ການແພດ ດັ່ງກ່າວ ກ່າວວ່າ ເຄືອຂ່າຍ ສູນ ບໍຣິການ ການແພດ ທີ່ ທັນສມັຍ ແມ່ນນື່ງ ໃນທຸຣະກິດ ຂອງ ກຸ່ມລົງທືນ ຈີບເຊັຽ ໃນລາວ ທີ່ ຣະບຸ ໃວ້ໃນ ໃບອະນຸຍາດ ການລົງທືນ ຈາກຕ່າງ ປະເທດ ກັບ ຣັຖບານລາວ ທີ່ ຈະໃຊ້ເງິນ ລົງທືນ ທັງຫມົດ ປະມານ 3 ລ້ານໂດລາ ໃນນັ້ນ ຮ່ວມດ້ວຍເງິນ ຈົດທະບຽນ 1 ລ້ານ 5 ແສນ ໂດລາ ສະຫະຣັດ.

ທ່ານວ່າ ພວກທ່ານ ໄດ້ລົງທືນ ກວ່າ ນື່ງ ລ້ານ 5 ແສນ ໂດລາ ສ້າງຕຶກອາຄານ ຫ້ອງການ ກວດການແພດ ອຸປກອນ ການແພດ ຮ່ວມທັງການ ຝຶກອົບຮົມ ພນັກງານ ບໍຣິການ ແລະວ່າ ທາງສູນກາງ ມີ ນາຍແພດ ທີ່ມີ ປະສົພການ ສູງ ໄດ້ຮັບ ປຣິນຍາ ການແພດ ຈາກ ສະຖາບັນ ແພດ ພາຍໃນລາວ ແລະ ຕ່າງປະເທດ, ທີມງານ ພວກທ່ານ ສາມາດ ປີ່ນປົວຄົນໄຂ້ ໄດ້ຢ່າງມີ ປະສິດທິພາບ ມາຕຖານ ຣະດັບ ສາກົນ.