ທ.ຮູຈິນຕາວຍິນດີ ກັບທ່ານຈູມມະລີ

ປະທານ ປະເທດຈີນ ທ່ານ Hu Jintao ສtແດງຄວາມຍິນດີ ໃນມື້ວັນຈັນ ທີ 21 ມີນາ 2011, ທີ່ທ່ານ ຈູມມະລີ ໄຊຍະສອນ ໄດ້ຖືກຄັດເລືອກ ເປັນເລຂາທິການໃຫຍ່ ຂອງຄນະກັມມະການ ສູນກາງ ພັກປະຊາຊົນ ປະຕິວັດລາວ ອີກຕໍ່ໄປ.

ທ່ານ Hu ໄດ້ໃຫ້ຂໍ້ສັງເກດວ່າ ພາຍໃຕ້ການນຳພາ ຂອງຄນະກັມມະການ ສູນກາງ ພັກປະຊາຊົນ ປະຕິວັດລາວ, ສປປລາວ ໄດ້ກ້າວໜ້າໄປ ຢ່າງສມໍ່າສເມີ ພາຍໃຕ້ ລະບອບ ສັງຄົມນິຍົມ ແລະ ການປະຕິຮູບ, ໂດຍມີສັງຄົມ ທີ່ຖືກຕ້ອງ ປອງດອງກັນ ແລະ ມີສະເຖັຍຣະພາບ, ພ້ອມທັງເສຖກິດ ທີ່ພັທນາ ຢ່າງວ່ອງໄວ, ຊີວິດການເປັນຢູ່ ຂອງປະຊາຊົນ ທີ່ມີສະພາບ ດີຂຶ້ນ ແລະ ສະພາວະຂອງປະເທດ ໃນເວທີສາກົນ ມີຄວາມເຂັ້ມແຂງ ຂຶ້ນເລື້ອຍໆ.

ໃນຂໍ້ຄວາມທີ່ ສະແດງ ຄວາມຍິນດີນັ້ນ, ທ່ານ Hu ມີຄວາມດີໃຈ ທີ່ໄດ້ເຫັນ ສປປລາວ ມີຄວາມສຳເຣັດ ຢ່າງໃຫຍ່ຫລວງ. ພ້ອມດຽວກັນນັ້ນ ທ່ານຍັງ ມີຄວາມເຊື່ອໝັ້ນວ່າ ພັກປະຊາຊົນ ປະຕິວັດລາວ ແລະ ຣັຖບານລາວ ຈະນຳພາ ປະຊາຊົນລາວ ໃຫ້ກ້າວໄປສູ່ ຄວາມສຳເຣັດ ຕໍ່ໄປເລື້ອຍໆ.

ຂໍ້ຄວາມຂອງ ທ່ານ Hu ສລຸບວ່າ ພັກຄອມມິວນິສຈີນ ແລະຣັຖບານຈີນ ໃຫ້ຄວາມສຳຄັນ ຕໍ່ຄວາມສຳພັນ ກັບພັກປະຊາຊົນ ປະຕິວັດລາວ ແລະ ຣັຖບານລາວ ໂດຍແນໃສ່ ຄວາມເຫັນທີ່ສອດຄ່ອງ ອັນຍາວໄກຮ່ວມກັນ. ນອກເໜືອຈາກນັ້ນ ສປຈີນຍັງຈະຍຶດຖື ຫລັກການກ່ຽວພັນ ດ້ານຄວາມໝັ້ນຄົງ ແລະ ສະເຖັຍຣະພາບ ທີ່ຍືນຍົງ, ການມີ ເພື່ອນບ້ານທີ່ດີ, ຄວາມໄວ້ເນື້ອເຊື່ອໃຈ ແລະ ການຮ່ວມມື ຊຶ່ງກັນແລະກັນ ເພື່ອເຮັດໃຫ້ ສອງປະເທດ ເປັນຮຸ້ນສ່ວນ ແລະ ມີການພັທນາ ທີ່ຈະເຣີນຮຸ່ງເຮືອງ ຢ່າງຖາວອນ.