ສັມພາວຸດທະຫານ ຖືກກໍ່ວິນາສກັມ

ເມື່ອອາທິດ ທີ່ຜ່ານ ມານີ້ ມີຄົນຮ້າຍ ທີ່ບໍ່ຮູ້ ວ່າ ມາຈາກ ກຸ່ມໃດ ໄດ້ລັກລອບ ເຂົ້າໄປ ທໍາລາຍ ສາງອາວຸດ ຂອງ ທະຫານ ຢູ່ເມືອງ ຫ້ວຍຊາຍ ແຂວງ ບໍ່ແກ້ວ ໂດຍເອົາ ໄຟຈູດ ຈົນເສັຽຫາຍ ໝົດກ້ຽງ ແລ້ວກໍ ໜີໄປ.

ທາງການລາວ ກໍບໍ່ໄດ້ ເປີດເຜີຽ ເຣື້ອງນີ້ ແຕ່ຢ່າງໃດ, ກະແສ ຂ່າວ ໄດ້ຮັບ ການຢືນຢັນ ຈາກ ຊາວລາວ ໃນທ້ອງຖິ່ນ ທີ່ບໍ່ ປະສົງ ອອກຊື່. ຫລາຍຄົນ ກໍບໍ່ຮູ້ວ່າ ຄົນຮ້າຍ ກຸ່ມນີ້ ມາຈາກໃສ. ຫລັງຈາກ ເກີດເຫດ ແລ້ວ ຝ່າຍທະຫານ ຕໍາຣວດ ແລະ ກອງຫລອນ ໃນແຂວງ ໄດ້ຈັດ ເວນຍາມ ທັງເວັນ ທັງຄືນ.

ເຫດການ ປະທະກັນ ຢູ່ ເມືອງ ຫ້ວຍຊາຍ ແຂວງບໍ່ແກ້ວ ລະຫ່ວາງ ກຸ່ມ ປະກອບ ອາວຸດ ຊາວມົ້ງ ກັບ ກອງທະຫານ ລາວ ເທື່ອລ້າສຸດ ແມ່ນ ໃນປີ 2009, ໄດ້ເຮັດ ໃຫ້ມີຜູ້ ເສັຽຊີວິດ ຈໍານວນນື່ງ ຊື່ງຕໍ່ມາ ທາງການ ລາວ ກໍຍອມຮັບ ວ່າມີການ ຕໍ່ສູ້ ທາງອາວຸດ ລະຫ່ວາງ ກຸ່ມຄົນຮ້າຍ ທີ່ຄ້າ ຢາເສບຕິດ ດ້ວຍກັນ.