ສນາມກ໊ອຟວຽດນາມ ດົງໂພສີ ເຣີ້ມສ້າງແລ້ວ

ທາງເຈົ້າຂອງ ໂຄງການ ກໍ່ສ້າງ ກໍສັ່ງຫ້າມ ບໍ່ໃຫ້ຄົນ ພາຍນອກ ເຂົ້າໄປໃນເຂດ ກໍ່ສ້າງນັ້ນ. ອີງຕາມ ຄໍາເວົ້າ ຂອງ ຊາວບ້ານຜູ້ນຶ່ງ ທີ່ບໍ່ປະສົງ ອອກຊື່:

”ເຣີ້ມກໍ່ສ້າງແລ້ວ ເພາະວ່າ ຂະເຈົ້າ ຂົນພວກເຫລັກ ຂົນຫຍັງມາ ກໍເກີດຝຸ່ນ ເຂົາບໍ່ໃຫ້ ເຂົ້າໄປ ເພາະມັນມີ ຣ.ປ.ພ. ຢູ່ໜ້າທາງເຂົ້າ.”

ທ່ານເວົ້າຕໍ່ໄປ ອີກວ່າ ທາງໂຄງການ ໄດ້ນໍາເອົາ ຄົນງານມາ ຢ່າງຫລວງຫລາຍ ຊຶ່ງຕົນ ກໍບໍ່ຮູ້ວ່າ ມີຄົນລາວ ຫລື ຄົນວຽດນາມ ຫລາຍປານໃດ ເນື່ອງຈາກວ່າ ບໍ່ສາມາດ ເຂົ້າໄປເບິ່ງ ໃກ້ໆໄດ້ ມີພຽງແຕ່ ເບີ່ງຢູ່ໄກໆ ເທົ່ານັ້ນ. ໃນຂນະດຽວກັນ ບໍຣິສັດ ວຽດນາມ ກໍໄດ້ ສ້າງເຮືອນພັກ ໃຫ້ແກ່ ຄົນງານ ເຫລົ່ານັ້ນ.

ສໍາລັບ ປະຊາຊົນ ທີ່ມີບ້ານ ຢູ່ໃນເຂດ ໂຄງການ ສນາມກ໊ອຟ ນັ້ນ ປັດຈຸບັນ ພວກຂະເຈົ້າ ໄດ້ໂຍກຍ້າຍ ໄປສ້າງເຮືອນ ຢູ່ບ່ອນໃໝ່ ເປັນທີ່ ຮຽບຮ້ອຍແລ້ວ ຊຶ່ງດິນ ທີ່ຂະເຈົ້າ ໄປປຸກເຮືອນ ໃສ່ນັ້ນ ກໍເປັນຂອງ ຍາດຕິ ພີ່ນ້ອງ ບໍ່ແມ່ນດິນ ຂອງຣັຖ. ເຖິງຢ່າງໃດ ກໍຕາມ ແຕ່ລະ ຄອບຄົວ ຢູ່ແບບ ກະຈັກກະຈາຍ ບໍ່ໄດ້ຢູ່ ເປັນກຸ່ມ ໃກ້ກັນ ຄືແຕ່ກ່ອນ:

”ຍ້າຍບ່ອນອື່ນ ກະບໍ່ຮູ້ວ່າ ຈະໄປໃສແດ່ ພີ່ນ້ອງ ຂະເຈົ້າ ຢູ່ໃສ ບາງຄົນ ກໍຈະມີພີ່ນ້ອງ ດິນດອນແຖວໃສ ຂະເຈົ້າ ກໍອາດສິໄປ ຢູ່ກັບພີ່ນ້ອງ.”

ເຖິງແມ່ນວ່າ ໂຄງການ ສນາມກ໊ອຟ ໄດ້ເຣີ້ມຂຶ້ນ ແລະ ຈະເລັ່ງໃຫ້ ສໍາເລັດ ຕາມເປົ້າໝາຍ ກໍຕາມ, ແຕ່ຍັງບໍ່ ທັນຮູ້ວ່າ ຜູ່ທີ່ຕ້ອງ ສູນເສັຍ ທີ່ດິນ ໃຫ້ບໍຣິສັດ ລັອງທັນ ນັ້ນ, ໄດ້ຄ່າຊົດເຊີຍ ຫລື ໄດ້ຮັບ ຄ່າເວນຄືນ ຫລືບໍ.