ບັນຫາແຮງງານໃນລາວ ຕ້ອງແກ້ໄຂ

ສະພາແຫ່ງຊາຕໄດ້ເສນີໃຫ້ ຣັຖບາລ ສປປລາວ ປັບປຸງແລະແກ້ໄຂ ບັນຫາແຮງງານ ທີ່ພວມເກີດຂຶ້ນ ໃນປັຈຈຸບັນນີ້ ໂດຽໃຫ້ມີກາຣ ເຣັ່ງທາງດ້ານພັທນາ ຝີມືແຮງງານ ຊາວລາວ ໃຫ້ສາມາດ ປະຕິບັຕ ຕາມວຽກງານຕ່າງໆ ທີ່ກຳລັງມີ ກາຣຂຍາຍຢ່າງ ຫລວງຫລາຍ ເພື່ອທົດແທນແຮງງານ ຈາກຕ່າງປະເທສ ດັ່ງເຈົ້າໜ້າທີ່ ກອງເລຂາກາຣ ປະຊຸມສະພາ ແຫ່ງຊາຕ ທ່ານໜຶ່ງໄດ້ກ່າວວ່າ:

“ອອກມາຕຣາກາຣ ຄຸ້ມຄອງຄົນ ແລະແຮງງານຕ່າງ ປະເທສ ທີ່ເຂົ້າມາ ທຳມາຫາກິນຢູ່ ສປປລາວ ຢ່າງເຂັ້ມງວດ ພ້ອມກັນນັ້ນ ກໍເອົາໃຈໃສ່ ພັທນາ ສົ່ງເສີມຝີມື ແຮງງານພາຍໃນ ແລະຈັດຫາ ວຽກເຮັດງານທຳ ໃຫ້ຄົນລາວຫລາຍຂຶ້ນ”.

ພ້ອມດຽວກັນນີ້ ທ່ານກໍວ່າ ເຖິງແມ່ນທຶນ ຈາກຕ່າງປະເທສ ຈະເຮັດໃຫ້ເສຖກິຈ ຂຍາຍໂຕ ແລະນຳຣາຍຮັບເຂົ້າ ສູ່ປະເທສຢ່າງ ຕໍ່ເນື່ອງ ແຕ່ໂຄງກາຣພັທນາ ຈຳນວນໜຶ່ງ ກໍຕ້ອງໄດ້ອາສັຍ ແຮງງານ ຕ່າງຊາຕ ໂດຽບັນດາ ເອກກະຊົນເຫລົ່ານັ້ນ ອ້າງວ່າ ແຮງງານພາຍໃນ ຂອງລາວ ບໍ່ມີຝີມື ເທຄນິຄວິຊາກາຣ ຈຶ່ງຈຳເປັນຕ້ອງໄດ້ ນຳພາແຮງງານ ຈາກຕ່າງປະເທສ ມາທົດແທນ.

ກ່ຽວກັບບັນຫາ ດັ່ງກ່າວນີ້ ເຮັດໃຫ້ທາງ ຣັຖບາລາວຕ້ອງໄດ້ ອອກນະໂຍບາຍ ແລະກົດຣະບຽບເພື່ອ ເບິ່ງແຍງຢ່າງ ເອົາຈິງເອົາຈັງ ເພື່ອຄວບຄຸມ ປະຣິມານ ບໍ່ໃຫ້ມີແຮງງານ ຕ່າງຊາຕເກີນ ຄວາມຕ້ອງ ກາຣ ອັນທີ່ເກີດມີ ບັນຫາກາຣຍາດແຍ່ງ ວຽກກາຣງານໄປ ຈາກປະຊາຊົນລາວ ພ້ອມດຽວກັນນັ້ນ ກໍຕ້ອງໃຫ້ມີ ກາຣພັທນາ ຝືມືແຮງງານ ໃຫ້ແກ່ ປະຊາຊົນລາວ ຢ່າງຮີບດ່ວນ.

ຢ່າງໃດກໍຕາມ ນອກຈາກບັນຫາ ໃນເບື້ອງຕົ້ນ ດັ່ງກ່າວນີ້ແລ້ວ ສປປລາວ ຍັງປະສົບກັບ ບັນຫາແຮງງານ ຊາວລາວເອງ ທີ່ຫລັງໄຫລ ອອກນອກປະເທສ ຊຶ່ງສ່ວນຫລາຍ ກໍແມ່ນໄປຫາ ປະກອບວຽກງານ ຕາມປະເທສໃກ້ຄຽງ ແບບທີ່ບໍ່ຖືກຕ້ອງ ແລະບາງຄັ້ງ ກໍຕົກເປັນເຫຍື່ອ ຂອງຂະບວນກາຣ ຄ້າມະນຸສ ທີ່ທາງກາຣ ສປປລາວ ຄວນຈະຕິດຕາມ ແກ້ໄຂບັນຫາ ດັ່ງກ່າວນີ້ ຢ່າງໃກ້ຊິດ ເຊັ່ນດຽວກັນ.