ຣັຖບານໄທຊ່ວຍ ຄົນງານຕ່າງດ້າວ

ຄົນງານຕ່າງດ້າວ ເກືອບເຖິງ 1 ລ້ານຄົນ ທີ່ເຮັດວຽກຢູ່ ປະເທດໄທ ແບບບໍ່ມີ ເອກກະສານ ອະນຸຍາດ ເຮັດວຽກນັ້ນ ໄດ້ຂຶ້ນທະບຽນ ໃຫ້ຖືກຕ້ອງຕາມ ກົດໝາຍ ເປັນທີ່ຮຽບຮ້ອຍແລ້ວ. ຕາມລາຍງານຂອງ IRIN ຈາກບາງກອກ ໃນວັນທີ 13 ພຶສພາ 2010.

ໂດຍການຮ່ວມມືກັບ ລາວ, ກຳພູຊາ ແລະ ພະມ້າ ຊຶ່ງເປັນ ເພື່ອນບ້ານໃກ້ຄຽງ ຊຶ່ງເປັນບ່ອນທີ່ ຄົນງານຕ່າງດ້າວ ຈາກມາ. ຣັຖບານໄທ ໄດ້ອະນຸຍາດ ໃຫ້ຄົນງານຕ່າງດ້າວ ທີ່ຄາດວ່າມີ ປະມານ 2 ລ້ານ ຄົນ ຂຶ້ນທະບຽນ ເປັນຄົນງານທີ່ ຖືກຕ້ອງ. ຕາມການລາຍງານ ຂອງກົມຄົນງານ ຂອງໄທ, ໃນມື້ວັນທີ 12 ພຶສພາ 2010 ມີຄົນງານຕ່າງດ້າວ ຈຳນວນ 932,255 ຄົນ ໄດ້ຮັບ ໃບອະນຸຍາດ ເດີນທາງ ແລະ ໜັງສືອະນຸຍາດ ໃຫ້ເຮັດວຽກ. ໃນນັ້ນ ມີຄົນງານພະມ້າ 812,984 ຄົນ, ຄົນງານລາວ 62,792 ຄົນ ແລະຄົນງານ ກຳພູຊາ 56,479 ຄົນ.

ທ່ານ ສຸປັດ ກຸກຸນ ຜູ້ຮັບຜິດຊອບ ຄົນງານຕ່າງດ້າວ ທີ່ກະຊວງແຮງງານ ໄທ ກ່າວຕໍ່ IRIN ວ່າພວກຄົນງານ ເຫລົ່ານັ້ນ ເຂົ້າມາປະເທດໄທ ແລະເຮັດວຽກ ໃນຂແນງການ ບໍຣິການ ການກະເສດ ແລະ ຂແນງການຜລິດຕ່າງໆ. ພວກເຂົາເຈົ້າ ຊ່ວຍສ້າງເສຖກິດ ຂອງໄທ ແລະວ່າ ທາງການໄທຊ່ວຍ ພວກເຂົາເຈົ້າໃຫ້ ເປັນຄົນງານທີ່ ຖືກຕ້ອງຕາມກົດໝາຍ ຄືກັນກັບ ປະຊາຊົນໄທ. ຄົນງານຕ່າງດ້າວ ທີ່ວ່ານັ້ນໄດ້ ປະກອບເອກກະສານ ກວດເບິ່ງ ບັດປະຈຳຕົວ ຊຶ່ງແມ່ນຣັຖບານ ຂອງປະເທດເຂົາເຈົ້າ ເປັນຜູ້ກວດ. ຄົນງານເຫລົ່ານັ້ນ ໄດ້ຮັບໜັງສື ຜ່ານແດນຈາກຣັຖບານ ຂອງ ປະເທດເຂົາເຈົ້າເອງ ແລະໄດ້ຮັບໜັງສື ອະນຸຍາດຢູ່ ແລະ ໜັງສືເຮັດວຽກ ຈາກຣັຖບານໄທ. ທ່ານວ່າ ໜັງສືທີ່ວ່ານັ້ນ ຈະຊ່ວຍໃຫ້ຄົນ ງານຕ່າງດ້າວ ມີສວັດດີການ ເປີດບັນຊີ ທະນາຄານ ແລະ ທັງສົ່ງເງິນກັບ ບ້ານໄດ້.