ຜລິດຕະພັນ ເຈັ້ຍສາ ຫລວງພຣະບາງ
2008.08.02
ທຸຣະກິດ ການຜລິດ ປໍສາ ເພື່ອເປັນສິນຄ້າ ຂອງແຂວງຫລວງພຣະບາງ ດໍາເນີນໄປດ້ວຍດີ ໃນຂະນະທີ່ ມີຕລາດ ຮອງຮັບ ທັງພາຍໃນ ແລະ ຕ່າງປະເທດ.
ໃນລະຍະຜ່ານມາ ການປູກ ປໍສາ ຂອງແຂວງຫລວງພຣະບາງ ເພື່ອໃຊ້ເປັນວັດຖຸດິບ ໃນການຜລິດເຈັ້ຍ ແລະ ຂອງທີ່ຣະລຶກ ຕ່າງໆ, ຖືເປັນອາຊີບ ທີ່ສ້າງຣາຍໄດ້ ໃຫ້ແກ່ຊາວບ້ານ ເປັນຢ່າງດີ. ສະນັ້ນ ຊາວບ້ານ ຈຶ່ງນິຍົມ ອາຊີບນີ້ ຢ່າງຕໍ່ເນື່ອງ ເພາະຕລາດ ທັງພາຍໃນ ແລະ ຕ່າງປະເທດ ມີຄວາມຕ້ອງການ ຢູ່ຕລອດ.
ທ່ານ ສາຍສມອນ ຄົມທະວົງ, ຮອງເຈົ້າແຂວງ ແຂວງຫລວງພຣະບາງ, ກ່າວວ່າ:
“ຖືວ່າ ປໍສາ ນີ້ ຍັງຟົດຟື້ນຢູ່ ອັນນຶ່ງ ແມ່ນເຮົາ ເອົາມາຜລິດເຈັ້ຍ, ເປັນເຄື່ອງ ທີ່ຣະລຶກ, ສອງ ເຮົາກໍສົ່ງໄປໃຫ້ ພວກຢູ່ເມືອງໄທ. ນີ້ ກໍເປັນໂຄງການນຶ່ງ ຂອງຫລວງພຣະບາງ ຍ້ອນມັນເປັນ ທ່າແຮງມູນເຊື້ອ ທີ່ປະຊາຊົນ ມີແລ້ວ.”
ປັດຈຸບັນ ໃນ 11 ເມືອງ ຂອງແຂວງ ຖືວ່າ ປູກ ປໍສາ ຫລາຍພັນເຮັກຕາຣ ດ້ວຍກັນ, ເພາະ ພືດ ດັ່ງກ່າວ ເປັນພືດ ທີ່ປູກ ແລະ ຮັກສາງ່າຍ, ພ້ອມກັນນັ້ນ, ປີນຶ່ງ ຂາຍໄດ້ ເຖິງ 2 ເທື່ອ, ໃນຣາຄາ 3,000 ຫາ 3,800 ກີບ ຕໍ່ ກິໂລ, ຊຶ່ງຖືວ່າ ເປັນຣາຄາ ທີ່ໜ້າເພິ່ງພໍໃຈ, ດັ່ງນັ້ນ, ຊາວບ້ານ ຈຶ່ງພາກັນ ຍຶດອາຊີບນີ້. ເມື່ອປີກາຍນີ້ ປໍສາ ແຂວງຫລວງພຣະບາງ ໄດ້ຮັບໃຊ້ ຕລາດ ພາຍໃນປະເທດ ຫລາຍຮ້ອຍຕັນ ແລະ ສົ່ງອອກ ໄປຍັງປະເທດໄທ ອີກ ປະມານ 600 ຕັນ.
ເມື່ອບໍ່ນານມານີ້, ທາງຈີນ ກໍສົນໃຈ ຢາກຊື້ ປໍສາ ຂອງແຂວງຫລວງພຣະບາງ, ແຕ່ ຕ້ອງການ ປໍສາ ແບບປຸງແຕ່ງ ສໍາເຣັດຮູບແລ້ວ ເທົ່ານັ້ນ. ດັ່ງນັ້ນ ທາງແຂວງ ກໍາລັງ ຄົ້ນຄ້ວາ ເຖິງຄວາມເປັນໄປໄດ້ ໃນການຈັດຕັ້ງ ປະຕິບັດ ວຽກງານນີ້ ເພື່ອເຮັດໃຫ້ ຊາວບ້ານ ມີຕລາດ ສົ່ງອອກ ເພີ້ມຂຶ້ນ.
ນອກຈາກ ການປູກປໍສາ ແລ້ວ, ໃນເວລານີ້ ທາງແຂວງ ຍັງສົ່ງເສີມ ການປູກສາລີ, ການລ້ຽງຄັ່ງ ແລະ ປູກໄມ້ ອຸດສາຫະກັມ ອື່ນໆ ເປັນຕົ້ນ ໄມ້ສັກ, ຍາງພາລາ ແລະ ໝາກນໍ້າມັນ.