ທາງການລາວສັ່ງປິດ ດິສໂກ້ບັນເທີງ ທົ່ວປະເທດ

ທາງການລາວໄດ້ ອອກຄຳສັ່ງປິດ ດິສໂກ້ບັນເທີງ ໃນທົ່ວປະເທດ ຍ້ອນເຫັນວ່າເປັນ ແຫລ່ງມົ້ວສຸມ ທີ່ບໍ່ດີສໍາລັບ ວັຍຫນຸ່ມສາວ ເປັນຈໍານວນຫລວງຫລາຍ ທີ່ເຂົ້າ ໄປໃຊ້ບໍຣິການ ໃນສຖານທີ່ນັ້ນ ເຊັ່ນວ່າມີການ ປະພຶດຕົວບໍ່ດີ ຂັດຕໍ່ວັທນະທັມ ຮີດຄອງປະເພນີ ສ້າງຄວາມສໍາພັນ ທາງເພດແບບຜິດ ກົດໝາຍ ດັ່ງທ່ານ ສີແພງ ວົງປັນຍາ ຫົວໜ້າກົມ ວັທນະທັມ ມະຫາຊົນ ໄດ້ກ່າວ:

"ປະກາດແລ້ວ ຈະປິດພາຍໃນປີນີ ເລີ້ມແຕ່ປັດຈຸບັນ ເປັນຕົ້ນໄປ ທຸກແຂວງໃນຂົງເຂດ ທົ່ວປະເທດແມ່ນ ຕ້ອງປະຕິບັດ ດິສໂກ້ເທັກ ມັນກາຍເປັນ ສິ່ງມົ້ວສຸມ ສິ່ງທີ່ບໍ່ດີ ມັນເປັນໄພສັງຄົມ ທີ່ບໍ່ດີ ສ້າງໃຫ້ເກີດ ຄວາມວຸ້ນວາຍ."

ທ່ານສີແພງວ່າ ທາງກົມວັທນະທັມ ມີຄວາມຈໍາເປັນ ຕ້ອງປິດການບັນເທິງ ປະເພດດິສໂກ້ ເພື່ອຮັກສາຮີດຄອງ ປະເພນີ ຂອງລາວໄວ້ ແລະຄິດວ່າມັນ ຈະບໍ່ສະທ້ອນ ເຖິງຄວາມມ່ວນຊື່ນ ຂອງຊາວຫນຸ່ມ ແຕ່ຢ່າງໃດ ແລະ ຊາວຫນຸ່ມຈະໄດ້ ຫັນມາຟ້ອນລໍາວົງ ເພື່ອການມ່ວນຊື່ນແທນ:

"ມັນບໍ່ໄດ້ມີ ຜົນກະທົບຫຍັງ ຖ້າເຮົາປິດໄດ້ ມັນກໍຈະເປັນ ສິ່ງທີ່ດີ ມັນກະຕຸ້ນ ສ້າງໃຫ້ພວກຫນຸ່ມສາວ ຫັນມາ ຟ້ອນລໍາວົງກັນ."

ທ່ານວ່າການປະກາດ ປິດການບໍຣິການ ບັນເທິງປະເພດ ດິສໂກ້ນີ້ ບໍ່ໄດ້ໝາຍເຖິງວ່າ ປິດກິຈກັມ ການບັນເທິງ ແຕ່ຈະມີການ ແນະນໍາ ໃຫ້ເຈົ້າຂອງຮ້ານ ບັນເທິງ ປ່ຽນການບໍຣິການ ໃຫ້ເປັນໄປຕາມ ບັນຍັດແຫ່ງກົດໝາຍ ວ່າດ້ວຍການ ບັນເທິງ. ຖ້າຫາກວ່າ ສຖານທີ່ບັນເທິງໃດ ບໍ່ສາມາດປ່ຽນການ ບໍຣິການໄດ້ ກໍຈໍາເປັນຕ້ອງສັ່ງ ໃຫ້ປິດກິຈການ.