ນັກທ່ອງທ່ຽວ ເຂົ້າໄປ ແຂວງເຊກອງ ເພີ້ມຂຶ້ນ

• ໂພໄຊສວັດ ຣາຍງານ
  2008-06-20

ທ່ານ ​ເພັດ​ສວັນ ສີ​ໂຕນ ຫົວໜ້າ​ ຫ້ອງການ​ ທ່ອງ​ທ່ຽວ ແຂວງ​ເຊ​ກອງ ​ເປີດ​ເຜີຍ​ວ່າ ​ເບິ່ງ​ຕາມ​ຈຳນວນ ນັກ​ທ່ອງ​ທ່ຽວ ​ເຂົ້າ​ມາ​ ພາຍ​ໃນ​ແຂວງ ​ໃນເຄິ່ງທຳ​ອິດ ​ຂອງປີ 2008 ​ເຫັນ​ວ່າ ຈຳນວນ​ ໄດ້​ຕື່ມສູງ​ຂື້ນ ກ່ວາປີ​ກາຍ​ນີ້ ​ເຖິງ​ວ່າ ແຂວງ​ເຊ​ກອງ ຈະ​ເປັນ ແຂວງ​ນ້ອຍໆ ທີ່​ບໍ່​ໄດ້​ຮັບ ​ການ​ພັດທະນາ ​ດ້ານ​ການທ່ອງ​ທ່ຽວ ສູງ​ຊໍ່າກັບ ​ແຂວງ​ໃຫຍ່ໆ​ກໍ​ຕາມ ດັ່ງ​ທ່ານ ​ໄດ້​ກ່າວ​ວ່າ:

“ສຳລັບ 2008, 6​ ເດືອນ ​ຕົ້ນ​ປີ​ນີ້ ກຳລັງ​ ສ​ລຸບ​ໄດ້ ​ຢູ່ 9000 ກວ່າ​ຄົນ ກະ​ວ່າ ​ປີ​ນີ້ ຈະ​ໄດ້ ​ຢູ່​ປະມານ 15 ຫາ 16 ພັນ​ຄົນ.”

ຫ້ອງການ ທ່ອງ​ທ່ຽວ ແຂວງ​ເຊ​ກອງ ກະ​ວ່າ ​ແຕ່ລະ​ປີ ຈະ​ຂະ​ຍາຍ ວຽກການ ດ້ານທ່ອງ​ທ່ຽວ ​ໃຫ້​ໃຫຍ່​ຂື້ນ ​ທຸກໆ​ປີ. ​ໃນ​ປີ 2007 ​ໄດ້​ມີ ​ນັກທ່ອງ​ທ່ຽວ ​ເຂົ້າ​ມາ 13 ພັນ​ຄົນ ​ແລະ ​ໃນ​ປີ 2008 ກະ​ວ່າ ​ຈະ​ຂື້ນ ຕື່ມ 20 ສ່ວນຣ້ອຍ.

ການທ່ອງ​ທ່ຽວ ແຂວງ​ເຊ​ກອງ ສ່ວນ​ຫຼາຍ ​ຈະ​ເປັນ ການທ່ອງ​ທ່ຽວ ປະ​ເພດ ທ່ຽວ​ຊົມ ທັມມະ​ຊາດ ​ແລະ ວັດທະນະ​ທັມ ​ເຊັ່ນ​ ຢູ່​ເມືອງ​ກະລຶມ ກໍ​ມີ ​ຖ້ຳ​​ເຕັ່ງ ມີ​ປະ​ເພນີ ​ບຸນກິນ ​ຄວາຍ​ໃນ​ ເດືອນ 3 ງານ​ສະ​ແດງ ​ສິລ​ປະ ຂອງ​ຊົນ​ເຜົ່າ. ​ນັກ​ທ່ອງ​ທ່ຽວ ສ່ວນ​ຫຼາຍ ​ຈະ​ມາ​ຈາກ ແຂວງຈຳປາ​ສັກ ​ແລະ ຈາກ​ປະ​ເທດ ​ເພື່ອນ​ບ້ານ ​ເພື່ອ​ຜ່ານ​ໄປ ວຽດນາມ ​ແລະ ​ໄທ. ດັ່ງ​ ທ່ານ ​ເພັດ​ສວັນ​ ໄດ້​ກ່າວ​ວ່າ:

“ສ່ວນ​ຫຼາຍ​ ກໍ​ມີ ​ຊາວ​ວຽດນາມ ​ແລະ ຊາວ​ໄທ ຊາວ​ຕະ​ເວັນ​ຕົກ ​ກໍ​ສ່ວນໜ້ອຍ ປະມານ 100-200 ປາຍ​ຄົນ.”