ແຂວງໄຊຍະບູຣີ ຍັງມີກຸ່ມຄົນ ຈໍານວນນຶ່ງ ທີ່ເສບ ແລະ ຂາຍຢາບ້າ ຫລົງເຫລືອຢູ່

ປັດຈຸບັນນີ້ ບັນຫາເຣື້ອງຢາເສບຕິດ ໄດ້ຫລຸດໜ້ອຍລົງຫລາຍ, ໂດຍສະເພາະຝິ່ນ ໄດ້ໝົດໄປແລ້ວ, ແຕ່ວ່າ ຍັງຄົງມີຢາເສບຕິດ ບາງຊະນິດ ທີ່ຍັງຫລົງເຫລືອຢູ່, ອີງຕາມຄໍາເວົ້າ ຂອງ ທ່ານ ຄໍາແກ້ວ ຈັນທະສັກ, ຫົວໜ້າ ຫ້ອງການ ຢາເສບຕິດ ແຂວງໄຊຍະບູຣີ ໃນມື້ວັນພຸດນີ້.

(ສຽງ) “ກໍຍັງເປັນຢາບ້າ ຈໍານວນນຶ່ງ, ເຮົາກວດກາ ຈັບກຸມກໍບໍ່ໄດ້ຫລາຍປີ 2007 ນີ້, ກໍພົວພັນ ໄດ້ 2000 ເມັດ.”

ນອກຈາກນີ້ແລ້ວ, ທ່ານ ຄໍາແກ້ວ ຍັງໄດ້ກ່າວເພີ້ມຕື່ມ ວ່າ ໃນປີ 2007, ຢາບ້າ ກໍບໍ່ຄ່ອຍ ແຜ່ຣະບາດຫລາຍ ຄືກັນກັບສມັຍກ່ອນ, ຊຶ່ງຢາດັ່ງກ່າວ ໄດ້ມີການນໍາເຂົ້າໄປ ໃນເຂດພາກເໜືອ ຂອງລາວ ຕາມເສັ້ນທາງ ແມ່ນໍ້າຂອງ. ສ່ວນໃນເຣື້ອງ ຂອງການກວດລ້າງ, ຮວມທັງຄົນຂາຍ ແລະ ຄົນເສບນັ້ນ, ທ່ານ ຄໍາແກ້ວ ໄດ້ຊີ້ແຈງວ່າ ທຸກວັນນີ້ ທາງການ ໄດ້ດໍາເນີນການຈັບກຸມ ແລະ ກວາດລ້າງກັນ ຢ່າງແຂງຂັນ, ເຮັດໃຫ້ບັນຫາຢາເສບຕິດ ເບົາບາງລົງ ໄປກ່ວາເດີມຫລາຍ:

(ສຽງ) “ຈັບກຸມຄົນເສບ ຜູ້ມັນເສບ ມັນເປັນບ້າ ແລະ ກໍຈັບກຸມມາມ້ຽນໄວ້ ແລະ ກໍຄົນຂາຍ ບໍ່ມີຣາຍໃຫຍ່ດອກ, ເທື່ອລະເລັກລະໜ້ອຍ ຈັບໄດ້ເທື່ອລະ 10 ເມັດ ຊາວເມັດ.”

ທ່ານ ຄໍາແກ້ວ ຍັງໄດ້ກ່າວ ຕໍ່ໄປອີກວ່າ, ເຖິງແມ່ນວ່າ ບັນຫາຢາເສບຕິດ ຍັງຄົງບໍ່ໝົດໄປບາດດຽວ, ແຕ່ທາງພາກຣັຖບານ ແລະ ເອກຊົນ ກໍໄດ້ຮ່ວມມືກັນ ກໍາຈັດ ແລະ ຣະດົມ ໂດຍການໂຄສນາ ແລະ ເຜີຍແຜ່ ຜົນຮ້າຍ ຂອງຢາເສບຕິດ ແລະ ຕິດຕາມ ການເຄື່ອນໄຫວ ຂອງກຸ່ມຄ້າ ແລະ ເສບ ເພື່ອດໍາເນີນການຈັບກຸມ ຕໍ່ໄປ.

ຈະເຣີນສຸກ ຣາຍງານ