UNHCR ຢາກໄປຢ້ຽມຢາມ ເຜົ່າມົ້ງ ທີ່ກັບຄືນ ລາວ

ທາງກາຣໄທຽ ວ່າ ເຈົ້າໜ້າທີ່ ອົງກາຣ ສະຫະ ປະຊາຊາຕ ດ້ານຜູ້ອົພຍົບ ຮຽກທວງ ຂໍເດີນທາງ ໄປຢ້ຽມຢາມ ຊາວມົ້ງ ທີ່ຖືກສົ່ງ ກັບຄືນ ໄປປະເທດລາວ.
ຫວາດ ສີມູນ ຣາຍງານ
2008.06.10

ຄະນະ ​ຜູ້​ແທນ ​ຂອງ​ສຳນັກງານ ​ຂ້າ​ຫລວງ​ໃຫຍ່ ​ສະຫະ​ປະຊາ​ຊາຕ ດ້ານ​ຜູ້​ອົພຍົບ ຫລື UNHCR ​ປະຈຳ​ໄທຽ ​ໄດ້​​ແສດ​ງ ກາຣຮຽກຮ້ອງ ​ຕໍ່​ທາງ​ກະຊວງ​ ກາຣຕ່າງປະ​ເທ​ດ ຂອງ​ໄທຽ ຫວ່າງ​ມໍ່ໆ​ມາ​ນີ້ ​ເພື່ອ​ໃຫ້​ຊ່ວຍ ​ປະສານ​ງານ ​ກັບ​ທາງ​ກາຣ ສປປລາວ ທີ່​ວ່າ ​ຍອມ​ອະນຸ​ຍາຕ ​ໃຫ້ທາງ​ ຄະນະ ​ເຈົ້າໜ້າ​ທີ່ ​ຈາກ​ສຳນັກງານ ​ຂ້າ​ຫລວງ​ໃຫຍ່ ​ສະຫະ​ ປະຊາ​ຊາຕ ​ໄດ້​ມີ​ໂອກາດ​ ເດີນທາງ ​ເຂົ້າ​ໄປ​ຢ້ຽມຢາມ ​ຊາວ​​ເຜົ່າ​ມົ້ງ ທີ່​ຖືກ​ ສົ່ງ​ກັບ​ຄືນ ​​ໄປ​ປະ​ເທດ​ລາວ ​ແລ້ວນັ້ນ.

ກ່ຽວ​ກັບ ​ເຣື່ອງນີ້​ ທາງ​ກາຣ​ໄທຽ ກໍ​ໄດ້​ຮັບປາກ ​ທີ່​ຈະ​ຊ່ວຍ ​ປະສານ​ງານໃຫ້ ​​ແລະ​ ​ເຊື່ອ​ວ່າ ​ທາງ ກາຣລາວ ​ຄົງ​ຈະ​ຍອມ​ ໃຫ້ອະນຸ​ຍາຕ ຕາມ​ກາຣຂໍ​ຮ້ອງ ​ດັ່ງກ່າວ​ນີ້ ດັ່ງ​ທີ່ ​ທ່ານ ນົພດົລ ປັທມະ ຣັຖມົນຕຣີ ກາຣຕ່າງ ປະ​ເທດ​ຂອງ​ໄທຽ​ໄດ້​ກ່າວ​ວ່າ:

ທ່ານວ່າ: ຕົວແທນ ຂ້າຫລວງໃຫຍ່ ສະຫະ ປະຊາຊາຕ ໄດ້ແສດງ ຄວາມສົນໃຈ ທີ່ຢາກຈະໄປ ຢ້ຽມຢາມ ຊາວມົ້ງ ທີ່ຖືກສົ່ງ ກັບຄືນໄປ ປະເທດລາວ ແລ້ວນັ້ນ ວ່າ ມີສະພາບ ຄວາມເປັນຢູ່ກັນ ຢ່າງໃດ ຊື່ງກໍເຊື່ອວ່າ ທາງກາຣລາວ ກໍຄົງຈະບໍ່ຂັດ ຂ້ອງ ໃນກາຣທີ່ ຈະອະນຸຍາຕ ໃຫ້ທາງ ເຈົ້າໜ້າທີ່ ກ່ຽວຂ້ອງ ດັ່ງກ່າວນີ້ ເຂົ້າໄປຢ້ຽມຢາມ ເຂົາເຈົ້າ”

ພ້ອມ​ດຽວ​ກັນ​ນີ້ ​ທາງຣັຖມົນຕຣີ ກາຣຕ່າງປະ​ເທດ ​ຂອງ​ໄທຽ ກໍ​ບໍ່​ໄດ້​ກ່າວ​ເຖີງ ​ເຣື່ອງທີ່​ວ່າ ​ທາງ​ກາຣ​ໄທຽ ຈະ​ຍອມ​ ອະນຸ​ຍາຕ ​ໃຫ້​ຄະນະ​ຕົວ​ແທນ ​ຂອງ UNHCR ໄດ້ມີ ໂອກາດ ເດີນທາງ ເຂົ້າໄປກວດ ແລະ ຢ້ຽມຢາມ ຊາວມົ້ງ ເກືອບ 8,000 ຄົນ ທີ່ປະທ້ວງ ຢູ່ຕາມ ຖນົນ ເຂຕບໍຣິເວນ ຂອງປະຕູ ເຂົ້າສູນ ຮອງຮັບ ຊົ່ວຄາວ ທີ່ບ້ານ ຫ້ວຍນ້ຳຂາວ ຫລືບໍ? ຊື່ງເຂົາເຈົ້າ ກໍຢືນຢັນ ທີ່ຈະດຳເນີນ ກາຣປະທ້ວງ ຕໍ່ໄປ ແລະ ວ່າ ຈະບໍ່ຍອມ ກັບຄືນ ເມືອງລາວ ເຖີງແມ່ນ ທາງກາຣໄທຽ ຈະບັງຄັບ ກໍຕາມ.
ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.