ໂຄສົກກະຊວງການ ຕ່າງປະເທດລາວ ຖແລງວ່າມົ້ງປ່ຽນໃຈ

ຊາວມົ້ງລາວ 100 ກວ່າຄົນ ທີ່ຢູ່ພາຍໃຕ້ການຄຸ້ມຄອງ ຂອງອົງການ ສະຫະປະຊາຊາດ ເລີກລົ້ມຄວາມຕັ້ງໃຈ ແລະ ໝົດຄວາມຫວັງ ທີ່ຈະໄດ້ໄປ ຕັ້ງຖິ່ນຖານໃໝ່ ຢູ່ປະເທດທີສາມ. ອີງຕາມລາຍງານຂອງ ກະຊວງການ ຕ່າງປະເທດລາວ ໃນມື້ວັນຈັນທີ 11 ມົກກະຣາ 2010.

ໂຄສົກກະຊວງການ ຕ່າງປະເທດລາວ ທ່ານ ເຄນທອງ ນວນທະສິງ ໃຫ້ສັມພາດ ທາງໂທຣະສັບ ກັບແຫລ່ງຂ່າວ The Nation ຂອງໄທວ່າ ຊາວມົ້ງລາວດັ່ງກ່າວ ໄດ້ປ່ຽນຄວາມຕັ້ງໃຈ ຫລັງຈາກທີ່ໄດ້ກັບຄືນ ແລະ ໄດ້ເຕົ້າໂຮມກັບ ຊຸມຊົນຊາວມົ້ງລາວ ພາຍໃນປະເທດ.

ໃນຈຳນວນຊາວມົ້ງລາວ ທັງໝົດ 4,711 ຄົນທີ່ກັບມາຈາກໄທ ກ່ອນມື້ປີໃໝ່ 158 ຄົນໄດ້ຖືກຮັບຮອງ ວ່າເປັນບຸກຄົນ ທີ່ໜ້າເປັນຫ່ວງ ຈາກຂ້າຫລວງໃຫຍ່ ສະຫະປະຊາຊາດ ດ້ານອົພຍົບ ແລະ ມີຖານະທີ່ຈະໄປ ຕັ້ງຖິ່ນຖານໃໝ່ ຢູ່ປະເທດທີສາມໄດ້.
ສະຖານທູດ ຕາເວັນຕົກ ບາງປະເທດ ເຄີຍໃຫ້ສັນຍາວ່າ ຈະຕິດຕາມຊ່ອຍເຫລືອ ດຳເນີນການ ເພື່ອເອົາພວກຂະເຈົ້າ ໄປຕັ້ງຖິ່ນຖານໃໝ່ ຢູ່ປະເທດທີສາມ ຫລັງຈາກ ທີ່ ພວກຂະເຈົ້າໄດ້ກັບໄປ ປະເທດລາວແລ້ວ.

ທ່ານ ເຄນທອງ ກ່າວວ່າຫລັງຈາກ ໄດ້ຮັບການຮັບຕ້ອນ ຢ່າງດີ ຈາກເຈົ້າໜ້າທີ່ ກ່ຽວຂ້ອງສປປລາວ ເມື່ອເວລາກັບມາເຖິງ ພວກຂະເຈົ້າທັງໝົດ ຕັດສີນໃຈ ຈະຢູ່ບ້ານເກີດ ເມືອງນອນຕໍ່ໄປ. ແມ່ນແຕ່ ຜູ້ນຳຊາວມົ້ງລາວ ທ່ານ Blia Shoua Her ທີ່ໄດ້ຮັບການຄຸ້ມຄອງ ຈາກ ສະຫະປະຊາຊາດ ທີ່ຖືກສົ່ງກັບຈາກ ສູນກັກຂັງໜອງຄາຍ ມື້ວັນທີ 28 ທັນວາ 2009 ຍັງປ່ຽນຄວາມຄິດ ແລະຕັດສີນໃຈ ຈະຕັ້ງຄອບຄົວ ຢູ່ບ້ານຜາຫລັກ ກັບຄອບຄົວ.

ເຖິງປັດຈຸບັນນີ້ ທາງການລາວສາມາດ ສົ່ງຊາວມົ້ງລາວ ກັບຄືນພູມລຳເນົາເດີມ ແລະ ບ້ານພັທນາຜາຫລັກ ເກືອບໝົດແລ້ວ.