ຄ້າງຄ່າທົດແທນ ທີ່ດິນສ້າງທາງຣົດໄຟ

ຊາວລາວ ບ້ານດົງໂພສີ ໃນ ນະຄອນຫລວງ ວຽງຈັນ ຍັງບໍ່ທັນໄດ້ຮັບ ຄ່າທົດແທນ ທີ່ດິນ ທີ່ພວກເຂົາ ຈຳເປັນ ຕ້ອງມອບໃຫ້ ຣັຖບານ ເພື່ອສ້າງເປັນທາງຣົດໄຟ ນັ້ນເທື່ອ. ປັດຈຸບັນ ຊາວບ້ານດັ່ງກ່າວ ຈຳນວນ 12 ຄົນ ຍັງລໍຖ້າ ຄ່າທົດແທນ ຈາກ ຣັຖບານລາວ ຢູ່. ໃນຣະຍະ 2 ປີ ທີ່ຜ່ານມາ, ພວກຂະເຈົ້າໄດ້ທຽວໄປຫາ ເຈົ້າໜ້າທີ່ ທີ່ກ່ຽວຂ້ອງ ຢູ່ ນະຄອນຫລວງ ວຽງຈັນ ເລື້ອຍໆ ເພື່ອຮຽກຮ້ອງ ຄ່າທົດແທນ; ແຕ່ ຈົນເຖິງ ປັດຈຸບັນ ກໍຍັງບໍ່ທັນ ໄດ້ຜົນແນວໃດ ເລີຍ.

ນາງ ປາງຄຳ ຄຳທອນ, ອາຍຸ 48 ປີ ຊາວບ້ານ ດົງໂພສີ ທີ່ໜີປະ ດິນນາ ປະມານ ເຄິ່ງເຮັກຕາຣ໌ ເພື່ອເປັນ ບ່ອນສ້າງທາງຣົດໄຟ ນັ້ນ, ຈົ່ມວ່າ ເຈົ້າໜ້າທີ່ ຣັຖບານລາວ ບອກວ່າ ຈະໃຊ້ ຄ່າທົດແທນ ທີ່ດິນຢ່າງເປັນທັມ ໃຫ້ແກ່ປະຊາຊົນ; ແຕ່ຈົນເຖິງປັດຈຸບັນ ກໍຍັງບໍ່ທັນ ໄດ້ຮັບເທື່ອ ແລະ ກໍບໍ່ຮູ້ວ່າ ປານໃດຈະໄດ້. ນາງ ປາງຄຳ ກ່າວອີກວ່າ ປັດຈຸບັນ, ນາງ ບໍ່ມີດິນ ທີ່ຈະປູກເຂົ້າ ແລະ ຜັກ ເພື່ອລ້ຽງຄອບຄົວ; ຄອບຄົວ ຂອງນາງ ເປັນເຈົ້າຂອງ ດິນາ ແຫ່ງນີ້ ມາໄດ້ 3 ເຊັ່ນ ຄົນແລ້ວ.

ສ່ວນ ທ່ານ ສົມໄຊ, ຜົວ ຂອງ ນາງ ປາງຄຳ, ກ່າວວ່າ ພວກຂະເຈົ້າ ບໍ່ຂັດຄ້ານການສ້າງສາ ພັທນາ ຂອງຣັຖບານ. ທຸກຄົນ ກໍຢາກໃຫ້ປະເທດ ມີທາງຣົດໄຟ; ແຕ່ພວກເຂົາ ກໍເສັຍໃຈ ທີ່ໄດ້ສູນເສັຍ ດິນນາໄປ.

ຊາວບ້ານ ດົງໂພສີ ອີກຜູ້ນຶ່ງ ຄື ນາງ ລົມ ເຫລັກສິງໂຕ, ອາຍຸ 51 ປີ, ເວົ້າວ່າ ພວກເຂົາ ຈະຕໍ່ສູ້ ສືບຕໍ່ໄປ ຈົນກວ່າ ຈະໄດ້ຄ່າທົດແທນ; ພວກເຂົາ ບໍ່ຢ້ານ ເພາະ ພວກເຂົາ ບໍ່ໄດ້ເຮັດຜິດຫຍັງ. ນາງ ລົມ ເວົ້າອີກວ່າ ແທນທີ່ຈະໃຫ້ ເງິນຄ່າທົດແທນ ຢ່າງຄົບຖ້ວນ, ປັດຈຸບັນ ທາງການລາວ ໄດ້ຊ່ວຍ ແຈກຢາຍ ເຂົ້າສານ ໃຫ້ແກ່ຊາວບ້ານ; ແຕ່ເຂົ້ານັ້ນ ພັດເປັນເຂົ້າ ບໍ່ມີຄຸນນະພາບ, ເປັນເຂົ້າມຸ່ນ, ເຂົ້າຫັກ. ພວກເຂົາ ສ່ວນຫຼາຍ ຂາຍເຂົ້ານັ້ນ ແລ້ວຊື້ເຂົ້າດີ ມາກິນແທນ.

ທາງຣົດໄຟ ຕໍ່ຈາກ ຂົວມິດຕະພາບ ລາວ-ໄທ ທີ່ນະຄອນຫລວງ ວຽງຈັນ ຈະຖືກສ້າງ ສຳເຣັດ ພາຍໃນ ວັນທີ່ 24 ເດືອນເມສາ ນີ້.