ສວັນນະເຂດ-ມຸກດາຫານ ສລອງ ບຸນອອກພັນສາ
2008.10.14
ແຂ່ງຂັນ ຊ່ວງເຮືອ ລາວ-ໄທ ໃນຣະຫວ່າງ ບຸນອອກພັນສາ
ທ່ານ ເຊົາ ສີສຸກ ເຈົ້າໜ້າທີ່ ຫ້ອງການ ທ່ອງທ່ຽວ ເມືອງໄກສອນ ແຂວງສວັນນະເຂດ ເປີດເຜີຍວ່າ ບຸນອອກພັນສາ ໃນປີນີ້ ຈະຄຶກຄັກ ຫລາຍກວ່າ ປີທີ່ຜ່ານມາ ຈະມີປະຊາຊົນ ທັງສອງຝັ່ງ ແມ່ນໍ້າຂອງ ເຂົ້າຮ່ວມ ໃນງານບຸນຢ່າງຫລວງຫລາຍ.
ໃນຕອນກາງຄືນ ຂອງມື້ບຸນ ກໍຈະມີ ການໄຫລເຮືອໄຟ. ປີນີ້ ມື້ບຸນແມ່ນ ວັນທີ 14 ຕຸລາ ຊຶ່ງຈະມີ ແຂກທາງການສໍາຄັນ ຈາກປະເທດ ເພື່ອນບ້ານເຂົ້າຮ່ວມ ດັ່ງທ່ານ ເຊົາ ໄດ້ເວົ້າວ່າ:
“ມື້ແລງ ຈະມີການໄຫລ ເຮືອໄຟ ຈະມີແຂກ ຈາກ 3 ປະເທດ ເຂົ້າຮ່ວມກິນເຂົ້າ ຢູ່ຮ້ານ ສວັນລາວເດີມ ເພື່ອຈະໄດ້ເບິ່ງ ການໄຫລເຮືອໄຟ ຈັດມີ 3 ລໍາ ເປັນເຮືອ ລະດັບໃຫຍ່”
ທ່ານ ກ່າວອີກວ່າ ແຂກສໍາຄັນ ຈາກ ໄທ ວຽດນາມ ແລະ ກໍາພູຊາ ຈະມາຮ່ວມ ເບິ່ງການໄຫລເຮືອໄຟ ຈາກ ຂົວ ມິດຕະພາບ ລ່ອງຈົນ ໄປເຖິງ ວັດໃຫຍ່ ໄຊຍະພູມ. ສໍາລັບ ວັນທີ 15 ພວກແຂກຮັບເຊີນ ກໍຍັງຈະຢູ່ ເບິ່ງການຊ່ວງເຮືອ ອອກພັນສາ.
ຕາມຄວາມຄິດເຫັນ ຂອງປະຊາຊົນ ໃນແຂວງ ສວັນນະເຂດ ກໍມີຄວາມຍິນດີ ໃນບຸນອອກພັນສາ ທີ່ມີຂື້ນໃນສອງຟາກຝັ່ງ ລາວ ແລະ ໄທ ຊຶ່ງເຮັດໃຫ້ ງານບຸນປະເພນີ ອັນດີງາມນີ້ ຈະສ້າງຄວາມ ຮັກແພງ ສາມັກຄີ ຂອງ ພີ່ນ້ອງ ລາວ-ໄທ ດັ່ງປະຊາຊົນ ລາວ ຈາກແຂວງ ສວັນນະເຂດ ຜູ້ນຶ່ງ ໄດ້ເວົ້າວ່າ:
“ບຸນປີນີ້ ເຫັນວ່າໃຫຍ່ ແລະ ຄຶກຄື້ນ ກວ່າປີໃດ໋ໆ ມ່ວນຫລາຍ ສອງພີ່ນ້ອງ ແບບວ່າ ໄປມາຫາກັນ ແລະ ໃຫຍ່ກວ່າ ປີຜ່ານມາ”
ງານບຸນອອກພັນສາ ສວັນນະເຂດ-ມຸກດາຫານ ມີປະຈໍາ ທຸກໆປີ ຊາວລາວ ແລະ ຊາວໄທ ຈໍານວນຫລວງຫລາຍ ເຂົ້າຮ່ວມມ່ວນຊື່ນ. ສໍາລັບປີນີ້ ວັນທີ 14 ການຊ່ວງເຮືອ ມື້ສຸດທ້າຍ ແມ່ນຢູ່ ມຸກດາຫານ ແລະ ວັນທີ 15 ກໍຈະມີຢູ່ ສວັນນະເຂດ.