ສປປລາວ ສົ່ງເສີມ ຊາວລາວ ພົ້ນທະເລ ກັບເມືອຢາມບ້ານ
2008.08.20
ເຈົ້າໜ້າທີ່ ຣະດັບສູງ ຂອງສູນກາງແນວລາວ ສ້າງຊາດ ໃນນະຄອນຫລວງວຽງຈັນ ເຜີຍວ່າ ເມື່ອບໍ່ນານມານີ້ ຄະນະກໍາມະການ ກົມການເມືອງ ສູນກາງພັກ ປະຊາຊົນ ປະຕິວັດລາວ ໄດ້ມີມະຕິ ອະນຸມັດ ແຜນການ ຂອງແນວລາວສ້າງຊາດ ເພື່ອອໍານວຍ ຄວາມສດວກ ແລະ ສົ່ງເສີມ ໃຫ້ຄົນລາວ ໃນຕ່າງປະເທດ ກັບມາຢ້ຽມຢາມ ຫລື ຮ່ວມມື ໃນການພັທນາ ເສຖກິດ ແລະ ສັງຄົມ ໃນລາວ ໃຫ້ຫລາຍຂຶ້ນ ເລື້ອຍໆ.
ຕາມແຜນການ ດັ່ງກ່າວ ສູນກາງແນວລາວ ສ້າງຊາດ ຈະສົ່ງ ພະນັກງານ ໄປປະຈໍາ ຢູ່ສະຖານທູດ ແລະ ສະຖານກົງສູນ ທຸກແຫ່ງ ຂອງລາວ ໃນຕ່າງປະເທດ ເພື່ອຮັບຜິດຊອບ ໃນການໃຫ້ ຂໍ້ມູນກ່ຽວກັບ ແນວທາງ ນະໂຍບາຍ ຂອງພັກ ແລະ ຣັຖບານ ເພື່ອໃຫ້ຄົນລາວ ໃນຕ່າງປະເທດ ຮັບຮູ້ ຢ່າງກວ້າງຂວາງ ຫລາຍຂຶ້ນ. ພ້ອມກັນນັ້ນ ກໍເພື່ອປະສານງານ ແລະ ອໍານວຍ ຄວາມສະດວກ ໃນດ້ານຕ່າງໆ ແກ່ຄົນລາວ ໃນຕ່າງປະເທດ ທີ່ຕ້ອງການຈະເດີນທາງ ກັບຄືນ ມາຢູ່ ປະເທດລາວ ຢ່າງຖາວອນດ້ວຍ. ເຈົ້າໜ້າທີ່ລາວ ກ່າວກ່ຽວກັບ ເລື່ອງນີ້ ໃນຕອນນຶ່ງວ່າ:
“ວຽກງານ ອັນຮີບດ່ວນ ແມ່ນເຜີຍແຜ່ ຂໍ້ມູນຂ່າວສານ ທີ່ຖືກຕ້ອງ ກ່ຽວກັບ ແນວທາງ ນະໂຍບາຍ ຂອງພັກ ແລະ ຂໍ້ມູນ ກ່ຽວກັບ ປະເທດລາວນີ້ລະ ໃຫ້ຂະເຈົ້າ ໄດ້ຮັບຮູ້ ຮັບຮູ້ນີ້ ແມ່ນຮັບຮູ້ແນວຖືກ ບໍ່ແມ່ນຮັບຮູ້ ແນວແບບວ່າ ການໂຄສະນາ ບິດເບືອນ ອໍານວຍຄວາມສດວກ ໃຫ້ຂະເຈົ້າ ມາເຮັດ ບຸນສິນກິນທານ ຕາມຮີດຄອງປະເພນີ ການເຂົ້າອອກເມືອງ ການພັກພາອາໃສ ການໄປມາ ຢູ່ພາຍໃນປະເທດ ການມາ ຂໍຢູ່ລາວ ຢ່າງຖາວອນ ແລະ ບັນຫາສັນຊາດ.”
ເຈົ້າໜ້າທີ່ລາວ ຮັບວ່າ ການດໍາເນີນ ແນວທາງ ດັ່ງກ່າວ ຂອງລາວ ເປັນຍ້ອນ ໄດ້ເຫັນຄວາມສໍາເຣັດ ຂອງວຽດນາມໃນການດຶງເອົາ ຊາວວຽດນາມ ພົ້ນທະເລ ຫລື ຊາວວຽດກຽວ ກັບຄືນໄປ ວຽດນາມໄດ້ ຈໍານວນ ຫລວງຫລາຍ ທັງຍັງ ສາມາດດຶງເອົາ ເງິນທຶນ ທີ່ວຽດກຽວ ສົ່ງກັບ ໄປໃຫ້ ຍາດພີ່ນ້ອງ ໃນວຽດນາມ ທີ່ໄດ້ຫລາຍກວ່າ 2 ພັນລ້ານໂດລາ ສະຫະຣັດ ໃນແຕ່ລະປີ ນັ້ນອີກດ້ວຍ.