ປະຊາຊົນ ຮ້ອງທຸກ ກັບ ການສັມປະທານ ທີ່ດິນ

ປະຊາຊົນ ທີ່ສູນເສັຽ ທີ່ດິນ ໃຫ້ນັກລົງທືນ ຕ່າງປະເທດ ຍັງພາກັນ ຮ້ອງທຸກຢູ່ ເພາະບໍ່ໄດ້ຮັບ ການແກ້ໄຂ ຈາກຣັຖບານ, ຕາມລາຍງານ ຈາກນະຄອນຫລວງວຽງຈັນ.

2008.10.20

ລາຍງານວ່າ ໂຄງການ ຂອງຣັຖບານລາວທີ່ໃຫ້ສັມປະທານທີ່ດິນແກ່ນັກລົງທືນ ຕ່າງປະເທດ ປູກຕົ້ນໄມ້ອຸດຫະກໍາ ໃນຫລາຍແຂວງຂອງລາວ ໄດ້ສ້າງຜົນກະທົບ ຕໍ່ສິດທິ ແລະ ຊີວິດການເປັນຢູ່ ຂອງປະຊາຊົນ ຢ່າງໃຫຍ່ຫລວງ. ​ເຊັ່ນວ່າທໍາລາຍ ປ່າປ້ອງກັນ ຍອດນໍ້າ ແລະ ປ່າຜລິດ, ທໍາລາຍ ແຫລ່ງທ່ອງທ່ຽວ ທໍາມະຊາດ, ທໍາລາຍແຫລ່ງຜລິດສະບຽງອາຫານ, ກວມເອົາດິນ ຂອງຣັຖ ແລະ ຂອງປະຊາຊົນ, ​ເຮັດໃຫ້ ປະຊາຊົນ ສູນເສັຽບ່ອນທໍາມາຫາກິນ, ​ທີ່ພັກອາໃສ, ​ແລະ ເຮັດໃຫ້ປະຊາຊົນທຸກຍາກຂື້ນຕື່ມ.


ຜົນສະທ້ອນ ທີ່​​ເກີດຂື້ນນີ້ ແມ່ນຍ້ອນວ່າ: ການນຸມັດໃຫ້ສັມປະທານ ທີ່ດິນ ​​ແກ່ນັກລົງທືນ ຕ່າງປະເທດ ບໍ່ມີການສໍາຣວດ ຈັດສັນ, ບໍ່ມີການກໍານົດ ເຂດປະເພດທີ່ດິນ, ບໍ່ມີການວາງແຜນ ນໍາໃຊ້ທີ່ດິນ ຈື່ງໄປກວມລວມ ເອົາທີ່ດິນ ປ່າສງວນ ແລະ ທີ່ດິນ ຂອງປະຊາຊົນ. ຍົກຕົວຢ່າງ ໂຄງການປູກຕົ້ນຢາງພາລາ ຂອງບໍຣິສັດ ວຽດນາມ ຢູ່​​ໃນເຂດເມືອງບາຈຽງ ຈະເຣີນສຸກ ແຂວງຈໍາປາສັກ ແລະເມືອເລົ່າງາມ ແຂວງສາຣະວັນ ຊື່ງມີເນື້ອທີ່ ທັງໝົດ 30,200 ​​ເຮັກຕາ ປະຊາຊົນໄດ້ສູນເສັຽ ທີ່ດິນໃຫ້ໂຄງການນີ້ ຈໍານວນຫລວງຫລາຍ. ປະຊາຊົນ ໄດ້ຮັບ ການຊົດເຊີຍ ຄ່າຜົນລະປູກ ແລະ ທີ່ດິນສະເລັ່ຽ 1 ລ້ານ ກັບ 5 ​ແສນກີບຕໍ່ນື່ງເຮັກຕາ ຕໍ່ຄອບຄົວ.


ກ່ອນມີການໃຫ້ ສັມປະທານ ທີ່ດິນ ນັ້ນ ປະຊາຊົນ ໄດ້ທໍາການລ້ຽງຊີບ ດ້ວຍການປູກ ກາເຟ ໝາກຖົ່ວລຽນ ໝາກນັດ ສິສຽດ ໄມ້ສັກ ແລະ ອື່ນໆ. ລາຍໄດ້ ຂອງປະຊາຊົນ ຈາກການປູກກາເຟ 1 ເຮັກຕາ ແມ່ນ 30 ລ້ານກີບ ຕໍ່ປີ, ລາຍໄດ້ ຈາກການປູກ ໝາກຖົ່ວລຽນ 1 ເຮັກຕາ ແມ່ນປະມານ 80 ລ້ານກີບ ຕໍ່ປີ. ຫລັງຈາກປະຊາຊົນໄດ້ເສັຽ ທີ່ດິນໃຫ້ໂຄງການ ປູກຝັງ ຂອງຕ່າງປະເທດແລ້ວ ເຂົາເຈົ້າ ກໍຈໍາເປັນຕ້ອງ ເປັນລູກຈ້າງ ຂອງນັກລົງທືນ ເຮັດວຽກ ໃນສວນຢາງພາຣາ ຫລື ສວນກາເຟ ແລະ ມີລາຍໄດ້ທີ່ບໍ່ແນ່ນອນ ພຽງແຕ່ 8 ​ແສນຫາ 1 ລ້ານກີບ ເທົ່ານັ້ນ.


ນັກວິຊາການກະຊວງ ກະສິກໍາ ແລະ ປ່າໄມ້ ເຄີຽຕັ້ງ ເປັນບັນຫາ ສົງໃສ ວ່າ ການປູກຕົ້ນາງພາຣາໃນ​​ເຂດພູພຽງ ບໍຣິເວນ ແລະ ການປູກຕົ້ນຢາງພາຣາໃນແຂວງສວັນນະເຂດ ແລະ ແຂວງອື່ນໆ ຈະໃຫ້ຜົນຜລິດ ທາງດ້ານເສຖກິດ ສູງກ່ວາ ການປູກກາເຟ ປູກຖົ່ວລຽນ ປູກໝາກກ້ວຍຫລືຜົນລະປູກ ອື່ນໆທີ່ປະຊາຊົນເຄີຽປູກມາ ຫລືບໍ່, ​ອັນນີ້ ບໍ່ທັນມີຂໍ້ມູນສືກສາໄວ້ລ່ວງໜ້າ.


ໃນແຂວງຫລວງບາງ ກໍເຊັ່ນກັນ ໂຄງການ ສ້າງສະໜາມກອບ ແລະຣີ ຊໍ້ ຂອງຣັຖບານ ແລະບໍຣິສັດ ເອກະຊົນ ຕ່າງຊາດ ໄດ້ກວມເອົາ ທີ່ດິນ ຂອງປະຊາຊົນ ໄປປະມານ 900 ​ເຮັກຕາ​, ເທົ່າປານນີ້ການເສັຽຄ່າ ຊົດເຊີຽ ທີ່ດິນ ໃຫ້ປະຊາຊົນ ກໍຍັງບໍ່ຖືກແກ້ໄຂ ຕາມທີ່ ລະບຽບກົດໝາຍ ບົ່ງໄວ້.


ອອກຄວາມເຫັນ

ອອກຄວາມ​ເຫັນຂອງ​ທ່ານ​ດ້ວຍ​ການ​ເຕີມ​ຂໍ້​ມູນ​ໃສ່​ໃນ​ຟອມຣ໌ຢູ່​ດ້ານ​ລຸ່ມ​ນີ້. ວາມ​ເຫັນ​ທັງໝົດ ຕ້ອງ​ໄດ້​ຖືກ ​ອະນຸມັດ ຈາກຜູ້ ກວດກາ ເພື່ອຄວາມ​ເໝາະສົມ​ ຈຶ່ງ​ນໍາ​ມາ​ອອກ​ໄດ້ ທັງ​ໃຫ້ສອດຄ່ອງ ກັບ ເງື່ອນໄຂ ການນຳໃຊ້ ຂອງ ​ວິທຍຸ​ເອ​ເຊັຍ​ເສຣີ. ຄວາມ​ເຫັນ​ທັງໝົດ ຈະ​ບໍ່ປາກົດອອກ ໃຫ້​ເຫັນ​ພ້ອມ​ບາດ​ໂລດ. ວິທຍຸ​ເອ​ເຊັຍ​ເສຣີ ບໍ່ມີສ່ວນຮູ້ເຫັນ ຫຼືຮັບຜິດຊອບ ​​ໃນ​​ຂໍ້​ມູນ​ເນື້ອ​ຄວາມ ທີ່ນໍາມາອອກ.